راولپنڈی: پاکستان کرکٹ ٹیم کے اسسٹنٹ کوچ اظہر محمود نے راولپنڈی کی پچ پر سوال اٹھا دیے،ان کا کہنا ہے کہ ٹیم سلیکشن کے بعد ہم توقع کرتے تھے کہ پچ فاسٹ بولرزکے لیے سازگار ہوگی مگر ایسا نہ ہوسکا، دوسرے ٹیسٹ میں سیمنگ اور باؤنسی ٹریک بنانا چاہیے۔

تیسرے دن کے اختتام پرپریس کانفرنس میں اظہر محمود نے کہا کہ پہلے دن تین گھنٹے دھوپ نہیں نکلی اس وجہ سے پچ تبدیل ہوگئی، اگر ہم کسی اسپنر کو کھلاتے تو ایک بیٹر کو ٹیم سے کم کرنا پڑتا،بنگلہ دیش نے اسپنر کو کھلایا لیکن انھیں بھی خاطر خواہ نتائج نہ مل سکے، قومی کوچ نے مزید کہا کہ ہفتے کو اگر ہم جلدی وکٹیں لیتے ہیں تو اس کے بعد میچ میں گرفت مضبوط ہو سکتی ہے،تمام بولرز میچ جیتنے کے لیے اپنا کردارادا کر رہے ہیں-

اظہر محمود نے کہا کہ جو کمبی نیشن ہم نے بنایا اس طرح کی پچ نہیں بن سکی، دوسرے ٹیسٹ میں جس طرح کی پلاننگ ہم کر رہے ہیں ہمیں بہتر پچ درکار ہو گی۔ایک سوال پر سابق آل راؤنڈر نے کہا کہ شاہین شاہ آفریدی نے ابھی ردھم نہیں پکڑا،وہ مزید بہتری کی کوشش کر رہے ہیں، شاہین ہمارے بہترین بولر ہیں،ان کا ردھم میں آنا بہت ضروری ہے، 20 وکٹیں لے کر ہی ہم میچ جیت سکتے ہیں۔

اسسٹنٹ کوچ نے کہا کہ خرم شہزاد نے بہترین بولنگ کی،میں محمد علی کی کارکردگی سے بھی مطمئن ہوں ،عامر جمال فٹنس حاصل کرنے کے آخری مراحل میں ہیں۔ اظہر محمود نے کہا کہ نسیم شاہ انجری کے بعد واپس آئے ہیں، ٹی ٹوئنٹی کے بعد یہ ان کا یہ پہلا ٹیسٹ ہے،عامر جمال کی شکل میں ہمارے پاس بہترین آل راؤنڈر موجود ہے، عامر اور سلمان علی آغا پاکستان کا مستقبل ہیں، ہمیں آل راؤنڈر تیار کرنا پڑیں گے، اس کے لیے وقت درکار ہو گا،انھوں نے کہا کہ میر حمزہ بھی بہت اچھا بولر ہے، اگلے میچ میں بھی یہی ٹیم کھیلے گی۔

بھارتی اوپنر شیکھر دھون کی جانب سے انٹرنیشنل اور ڈومیسٹک کرکٹ سے ریٹائرمنٹ کا اعلان کردیا گیا۔

سماجی رابطوں کے پلیٹ فارم پر اپنی ریٹائرمنٹ کا اعلان کرتے ہوئے بھارتی کرکٹر شیکھر دھون نے کہا کہ کرکٹ چھوڑتے وقت یہ سکون ہے کہ ملک کے لیے کھیلنے کی خواہش پوری ہوئی ۔ انہوں نے اپنے پیغام میں بھارتی بورڈ (بی سی سی آئی) کا بھی شکریہ ادا کیا۔

واضح رہے کہ 38 سالہ شیکھر دھون نے 34 ٹیسٹ، 167 ون ڈے اور 68 ٹی ٹوئنٹی میچز کھیل رکھے ہیں۔

اپنے سوشل میڈیا پیغام میں شیکھر دھون کا کہنا تھا کہ مجھے اس بات کا افسوس نہیں ہے کہ میں اب بھارت کے لیے مزید نہیں کھیل سکوں گا، میرے لیے زیادہ خوشی کا سبب یہ ہے کہ میں نے اپنے ملک کے لیے کھیلا ہے، یہی میرے لیے بہت بڑی بات ہے۔

انہوں نے کہا کہ آج میں جہاں موجود ہوں، یہاں سے ماضی میں جھانکنے پر صرف یادیں ہیں اور مستقبل میں دیکھنے پر پوری دنیا ہے۔ میرا ہمیشہ سے ایک ہی جنون تھا کہ میں بھارت کے لیے کھیلتا اور میری یہ خواہش پوری ہوئی۔ انہوں نے اپنے کوچز، اہل خاندان، ٹیم اور بھارتی بورڈ کا شکریہ ادا کیا۔

کراچی: آئی سی سی نے ٹیسٹ کرکٹ کو بچانے کے لیے ملٹی ملین ڈالرز کا فنڈ قائم کرنے کی منصوبہ تیار کیا ہے۔

قبل ازیں بھارتی بورڈ نے اپنے ٹیسٹ کرکٹرز کو مالی فائدہ پہنچانے کے لیے مراعاتی اسکیم متعارف کرائی تھی، برطانوی میڈیا کے مطابق انٹرنیشنل کرکٹ کونسل ٹیسٹ کرکٹ کے لیے کم از کم 15 ملین امریکی ڈالر کے فنڈ وقف کرنے پر غور کر رہی ہے، جس سے اس طرز کی کرکٹ کھیلنے والے کھلاڑیوں کی میچ فیس میں اضافے کے ساتھ ٹی ٹوئنٹی فرنچائز لیگز میں ٹیلنٹ کی منتقلی سے نمٹنے میں مدد ملے گی، آسٹریلیوی کرکٹ بورڈ کے تجویز کردہ اقدام کو اگلا چیئرمین بننے کی دوڑ میں سب سے آگے موجود سیکریٹری بی سی سی آئی جے شاہ کی حمایت حاصل ہے ، انگلینڈ اینڈ ویلز کرکٹ بورڈ بھی اس کا حمایتی ہے۔

یہ فنڈ ٹیسٹ کھلاڑیوں کے لیے میچ کی کم از کم فیس میں اضافہ کرے گا ، ٹیموں کو بیرون ملک دوروں پر بھیجنے کے اخراجات کو بھی پورا کیا جا سکے گا، یہ فنڈ ویسٹ انڈیز جیسے کرکٹ بورڈز کی مدد کرے گا جو فی الحال عالمی ٹی ٹوئنٹی مقابلوں میں دیے جانے والے معاوضوں کا مقابلہ کرنے کے لیے برسر پیکار ہیں، رپورٹ کے مطابق مذکورہ فنڈ سے ٹیسٹ کھلاڑی کو 10 ہزار ڈالرز کی ادائیگی ممکن ہوسکے گی، جدوجہد کرنے والے ممالک کے لیے بیرون ملک دوروں کے اخراجات ادا ہو پائیں گے۔

دریں اثنا آسٹریلیوی کرکٹ بورڈ کے سربراہ مائیک برڈ نے اس تصور کی تا ئید کرتے ہوئے کہا کہ ہمیں رکاوٹوں کو دور کرنے اور ٹیسٹ کرکٹ کو بہتر سے بہترین بنانے کی ترغیب دینے کی ضرورت ہے، یہ امر قابل ذکر ہے کہ اس فنڈ سے تین امیر ترین کرکٹ ممالک بھارت، آسٹریلیا اور انگلینڈ کو فائدہ پہنچنے کا امکان نہیں ہے ، وہ پہلے ہی اپنے کھلاڑیوں کو کافی بہتر معاوضوں کی ادائیگی کر رہے ہیں، البتہ اس منصوبے کا انحصار آئی سی سی کے براڈ کاسٹر سے مالی تنازع کے سازگار حل پر ہوگا۔