راولپنڈی: اے این ایف کی مختلف کارروائیوں میں 70 کروڑ روپے مالیت کی منشیات برآمد کرلی گئی۔

ترجمان اینٹی نارکوٹکس فورس کے مطابق ملک بھر میں انسداد منشیات اسمگلنگ کی کارروائیاں جاری ہیں، اسی سلسلے میں 4 مختلف آپریشنز کے دوران 70 کروڑ روپے مالیت کی 129 کلو منشیات برآمد کرکے 6 ملزم کو گرفتار کرلیا گیا ہے۔

کراچی ائرپورٹ پر کوریئر آفس سے انڈونیشیا بھیجے جانے والے پارسل سے 14.5 کلو آئس برآمد کرلی گئی۔ اسی طرح بس اسٹاپ حیدرآباد کے قریب گاڑی سے 105 کلو چرس برآمد کرکے 3 ملزمان کو گرفتار کیا گیا ہے۔

اُدھر راولپنڈی میں پارک کے قریب 2 ملزمان سے 8.4 کلو چرس برآمد ہوئی۔ گڈاپ ٹاؤن کراچی میں ملزم سے 700 گرام چرس برآمد کی گئی۔

گرفتار کیے گئے تمام ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

کراچی: شہر قائد میں نامعلوم مسلح افراد نے گھر میں گھس کر فائرنگ کرکے بلوچستان سے آئے ہوئے 2 ماہ قبل شادی کرنے والے شخص کو قتل کردیا۔

پولسی کے مطابق تھانہ موچکو کی حدود میں بلدیہ ٹاؤن رئیس یار محمد گوٹھ جامعہ فاروقیہ مسجد و مدرسے کے قریب گھرمیں نامعلوم مسلح ملزمان کی فائرنگ سےایک شخص جاں بحق ہوگیا جس کی لاش ایمبولینس کے ذریعے سول اسپتال منتقل کی گئی جہاں اس کی شناخت 40 سالہ یحییٰ ولد علی دوست کےنام سے کی گئی ۔

مقتول یحییٰ بلوچستان کے شہروڈھ کا رہائشی اورڈرائیور تھا۔ مقتول نے2 شادیاں کی ہوئی تھیں اورپہلی بیوی سے اس کے 2 بچے ہیں جب کہ اس نے دوسری شادی 2 سے 3 ماہ قبل کی تھی اور دوسری بیوی کے ساتھ گھومنے کے لیے بلوچستان سے کراچی آیا ہوا تھا۔

مقتول رئیس یار محمد گوٹھ میں گزشتہ 7 روز سے رہائش پذیر تھا۔ مقتول کی بیوی کے مطابق2 نامعلوم مسلح ملزمان گھرمیں داخل ہوئے اورفائرنگ کرکےاس کے شوہر کوقتل کیا اورفرارہوگئے۔

پولیس کا کہنا ہے کہ مقتول کو ماتھے ، گلے اور پیٹ میں 3 گولیاں لگیں جو موت کا سببب بنیں۔ فائرنگ کا واقعہ ذاتی تنازع کا شاخشانہ معلوم ہوتا ہے، تاہم پولیس نے مزید تفتیش شروع کردی ہے۔

اسلام آباد: پی ٹی آئی رہنما علی محمد خان کا کہنا ہے کہ بانی پی ٹی آئی کا ایک سال جیل میں ضائع کیا گیا اسے 25 کروڑ عوام کا بھی وقت ضائع ہوا، بانی پی ٹی آئی نے کہا جلسہ صرف موخر کیا گیا منسوخ نہیں، بانی پی ٹی آئی نے کہا ختم نبوت کا اہم مسئلہ تھا، مذہبی جماعتیں ساری اسلام آباد میں تھیں، ختم نبوت کے اہم مسئلے کی وجہ سے جلسہ مؤخر کیا گیا۔

بانی پی ٹی آئی سے اڈیالہ جیل میں ملاقات کے بعد میڈیا سے گفتگو کرتے علی محمد خان کا مزید کہنا تھا کہ حکومت نے بھی ہمارا این او سی منسوخ کیا تھا، پورے ملک سے موبلائزیشن تھی لوگ تیار تھے، عمران خان صرف سیاست دان نہیں ایک لیڈر بھی ہے، انہوں نے کل حکومت اور ریاست کو ایک موقع اور دیا ہے۔

علی محمد خان نے کہا کہ عمران خان کا کہنا ہے کہ 8 ستمبر کا جلسہ کسی صورت موخر نہیں ہوگا، انہوں ںے گزشتہ ایک سال میں چار مرتبہ قرآن پاک کو تفسیر کے ساتھ پڑھا ہے، میرا جیل سے باہر آنا صرف اللہ کے ہاتھ میں ہے۔

علی محمد خان نے بتایا کہ عمران خان نے کہا ہے کہ اچھے دن آئیں گے، انتشاری ہم نہیں انتشاری کوئی اور لوگ ہیں، نو مئی ہمارا پر امن احتجاج تھا، ہمارے احتجاج کو تشدد میں تبدیل پلاننگ سے کیا گیا، بانی پی ٹی آئی چاہتے ہیں پاکستان ترقی کرے۔

راولپنڈی: آئندہ پی ٹی آئی کا جلسہ منسوخ ہونے کی اطلاع ملنے پر کارکنوں کے لیے عمران خان نے کیا پیغام دیا، علیمہ خان نے بتا دیا۔

اڈیالہ جیل کے باہر میڈیا کے نمائندوں سے بات کرتے ہوئے عمران خان کی بہن علیمہ خان نے کہا کہ جیل میں اسٹیبلشمنٹ کے بغیر کچھ ممکن نہیں۔ صبح سات بجے جیل میں ملاقات ہونا ہمارے لیے بھی عجیب بات تھی۔ بانی پی ٹی آئی کو اعظم سواتی نے آکر مذہبی جماعتوں کے احتجاج سے متعلق بتایا یا ان کو پہلے پتا تھا، دونوں چیزیں ممکن ہیں۔ ہم سب حیران تھے اچانک کیسے جلسہ ملتوی ہوگیا۔

علیمہ خان نے مزید کہا کہ بانی پی ٹی آئی نے کہا ہے جلسہ اس لیے مؤخر کیا گیا کہ مجھے بتایا گیا انتشار کا خدشہ ہے۔ مجھے بتایا گیا کہ مذہبی جماعتیں اسلام آباد میں اکٹھی ہورہی ہیں۔

انہوں نے مزید بتایا کہ بانی چیئرمین پی ٹی آئی نے کہا کہ اعظم سواتی اور بیرسٹر گوہر کو کہا ہے کہ 8 ستمبر والا جلسہ ملتوی نہیں ہوگا۔ 8 ستمبر کا جلسہ ہر صورت ہوگا، کارکنوں کو ہدایات دی گئی ہیں کہ اگر اب جلسہ منسوخ کرنے کی اطلاع آئے تو آپ نے نہیں ماننا۔ 8 ستمبر کو عوام ہر صورت اسلام آباد پہنچیں۔

علیمہ خان نے کہا کہ عمران خان کا کہنا ہے کہ عوام چوری شدہ مینڈیٹ کی واپسی کے لیے گھروں سے ضرور نکلیں۔ کس کو سمجھ نہیں آرہی کہ 7 بجے ملاقات کیسے ہوئی ہوگی۔