لاہور: محکمہ آرکیالوجی پنجاب نے ملتان اور ہڑپہ میں دو نئے عجائب گھر قائم کرنے کا فیصلہ کیا ہے۔

اس حوالے سے ڈائریکٹر جنرل آرکیالوجی ظہیر عباس ملک کی زیر صدارت ایک اجلاس ہوا جس میں نئے عجائب گھروں کے منصوبے میں پیشرفت کا جائزہ لیا گیا۔

اجلاس میں کنسلٹنٹ فرم نے تفصیلی پریذنٹیشن پیش کی۔ ڈائریکٹر کنزرویشن اینڈ ڈویلپمنٹ انجم قریشی اور ڈپٹی ڈائریکٹر ساؤتھ سلمان تنویر نے عجائب گھروں کی تعمیر اور نمائش کے عمل پر روشنی ڈالی اور منصوبے کی مختلف پہلوؤں کے حوالے سے تفصیلات فراہم کیں۔

اجلاس سے خطاب کرتے ہوئے ڈی جی آرکیالوجی ظہیر عباس ملک نے کہا کہ پنجاب کے آثار قدیمہ کی حفاظت اور عوام میں اپنے تاریخی ورثے سے آگاہی پیدا کرنے کے لیے عجائب گھروں کا وجود نہایت اہم ہے۔ اسی حکمت عملی کے تحت پنجاب کے تاریخی مقامات کے تحفظ اور بحالی کے لیے مؤثر اقدامات کیے جا رہے ہیں۔

ڈی جی آرکیالوجی نے جاری منصوبوں میں پیشرفت پر اطمینان کا اظہار کرتے ہوئے ان کی بروقت تکمیل کی اہمیت پر زور دیا۔ انہوں نے متعلقہ افسروں کو ہدایات جاری کیں کہ زیر التوا کاموں کو جلد از جلد مکمل کیا جائے اور اس بات کو یقینی بنایا جائے کہ عجائب گھر بین الاقوامی معیار کے مطابق ہوں۔

اجلاس کے دوران آئندہ مراحل کے لیے واضح روڈ میپ مرتب کیا گیا جس میں تعمیر کے کام کی تکمیل، نمائشوں کے انعقاد اور عجائب گھروں کے باضابطہ افتتاح کے لیے ٹائم لائنز شامل ہیں۔ ظہیر عباس ملک نے کہا کہ یہ منصوبے نہ صرف خطے کے عظیم تاریخی ورثے کو محفوظ کرنے میں معاون ثابت ہوں گے بلکہ ان عجائب گھروں کو ثقافتی تعلیم اور سیاحت کے مراکز بنانے میں بھی اہم کردار ادا کریں گے۔

انہوں نے اس امید کا اظہار کیا کہ یہ اقدامات ملکی ثقافتی ورثے کی بقا اور بین الاقوامی سطح پر پاکستان کے مثبت تشخص کے فروغ میں بھی مددگار ثابت ہوں گے۔

اسلام آباد: وزیرِاعظم محمد شہباز شریف نے سمندر پار پاکستانیوں کیلئے تاریخی قدم اٹھالیا۔

وزیرِ اعظم محمد شہباز شریف نے اسلام آباد میں بونا-راست (Buna-Raast) کنیکٹیوٹی منصوبے کا نفاذ کردیا۔ منصوبے کے تحت پاکستان کے ادائیگیوں کے ڈیجیٹل نظام راست کو عرب مانیٹری فنڈ کے تحت قائم بونا سے جوڑا جا رہا ہے.

وزیرِاعظم شہباز شریف کے ویژن کے تحت سمندر پار پاکستانیوں کو رقوم بھجوانے کے تیز، مؤثر اور کم لاگت منصوبے کا نفاذ شروع ہوگیا۔ راست اقدام کو بونا سے جوڑنے سے عرب ممالک میں مقیم لاکھوں پاکستانیوں کو تیز، مؤثر اور کم لاگت میں رقوم بھجوانے کی سہولت میسر ہوگی۔

منصوبے سے نہ صرف سمندر پار مقیم پاکستانیوں کیلئے رقوم کی منتقلی میں آسانی پیدا ہوگی بلکہ اس سے ترسیلات زر میں بھی اضافہ ہوگا۔ بونا-راست کنیکٹیوٹی کے تحت عرب ممالک میں مقیم پاکستانی با آسانی ڈیجیٹل طریقے سے رقوم کو اپنے پیاروں کے پاس بھیج سکیں گے.

اس موقع پر خطاب کرتے ہوئے وزیر اعظم نے کہا کہ یہ اہم اقدام جدید ڈیجیٹل انداز میں عرب دنیا کے ساتھ ہمارے تاریخی تعلقات کو مزید مضبوط کرے گا۔

انہوں نے کہا کہ اس تاریخی اقدام کا مقصد عرب دنیا میں ہمارے ساتھی پاکستانیوں کو اپنی رقم جلد وطن واپس بھیجنے میں سہولت فراہم کرنا ہے۔

شہباز شریف نے نشاندہی کی کہ یہ پاکستان کا پہلا کراس بارڈر فوری ادائیگی کا نظام ہے جو ترسیلات زر کو مزید سستی اور قابل رسائی بنائے گا۔

اقتصادی چیلنجوں کا ذکر کرتے ہوئے وزیراعظم نے کہا کہ وہ جلد ہی پانچ سالہ گھریلو اقتصادی پروگرام کا اعلان کریں گے۔ پچھلے کئی مہینوں سے اس پر اسٹیک ہولڈرز کے ساتھ بات چیت ہوئی ہے۔ انہوں نے کہا کہ یہ پروگرام معیشت اور زراعت اور آئی ٹی سمیت مختلف شعبوں کی بہتری کے لیے اقدامات کا تصور کرے گا۔

لاہور: گوالمنڈی چوکی میو اسپتال پولیس نے کارروائی کرتے جعلی ڈاکٹر کو گرفتار کر لیا۔

پولیس کے مطابق ملزم ڈاکٹر کا لباس پہن کر اسپتال میں گھوم رہا تھا، مشکوک جانتے ہوئے تلاشی لی جس پر ملزم نے جعلی ڈگری پیش کی۔

دوران تفتیش ملزم زیادہ دیر پولیس کو چکما نہ دے سکا اور ڈاکٹر نہ ہونے کا اعتراف کر لیا۔

انچارج چوکی میو اسپتال کے مطابق ملزم احسان کے خلاف مقدمہ درج کر کے تحقیقات کا آغاز کر دیا گیا ہے۔ ایس پی سٹی کیپٹن ریٹائرڈ قاضی علی رضا کے مطابق انسداد جرائم کے حوالے سے کڑی نگرانی کی جا رہی ہے۔

اسلام آباد: تحریک انصاف انٹرا پارٹی کیس 27 اگست کو سماعت کے لیے مقرر کر دیا گیا۔

چیف الیکشن کمشنر کی سربراہی میں 5 رکنی بینچ سماعت کرے گا، الیکشن کمیشن نے بیرسٹر گوہر اور رؤف حسن کو نوٹس جاری کر دیا۔

واضح رہے کہ الیکشن کمیشن نے گزشتہ سماعت پر تحریک انصاف سے جواب مانگا تھا، بیرسٹر گوہر نے الیکشن کمیشن سے جواب جمع کرانے کے لیے مہلت مانگی تھی۔