نئی دہلی: بھارتی ریاست آندھرا پردیش کی دوا ساز فیکٹری میں ہونے والے دھماکے میں 17 افراد ہلاک اور 40 زخمی ہوگئے۔
بھارتی میڈیا کے مطابق آندھرا پردیش کے ضلع کلکٹر میں 40 ایکڑ پر محیط دوا ساز فیکٹری ایسینشیا ایڈوانسڈ سائنسز کے مینوفیکچرنگ پلانٹ میں خوفناک آگ بھڑک اُٹھی۔ دھماکا اس وقت ہوا جب ملازمین لنچ کر رہے تھے۔
یہ فیکٹری 2019 میں قائم کی گئی تھی۔
خوفناک آتشزدگی کے نتیجے میں آگ شعلے آسمان سے باتیں کرنے لگے۔ فیکٹری میں افراتفری مچ گئی۔ امدادی کاموں کے دوران 50 سے زائد زخمی ملازمین کو اسپتال منتقل کیا گیا۔
اسپتال انتظامیہ نے میڈیا کو بتایا کہ 15 ملازمین کو مردہ حالت میں لایا گیا جب کہ 2 نے دوران علاج دم توڑ دیا۔ اب بھی 40 کے قریب زخمی زیر علاج ہیں جن میں سے 5 کی حالت تشویشناک ہے۔
پولیس کا کہنا ہے کہ تاحال آگ لگنے کی وجہ کا تعین نہیں ہوسکا لیکن ایسا لگتا ہے کہ کیمیکل ری ایکٹر میں دھماکا ہوا ہوگا۔
رائٹرز نے دوا ساز کمپنی سے حادثے کی معلومات جاننے کے لیے رابطہ کیا تاہم فوری تبصرے کی درخواست کا جواب نہیں دیا گیا۔
یاد رہے کہ گزشتہ برس اناکاپلی ضلع میں ساہتی فارما کے ایک یونٹ میں سالوینٹ ری ایکٹر میں پھٹنے سے لگنے والی آگ میں 2 ملازمین جھلس کر ہلاک اور 5 دیگر زخمی ہوگئے تھے۔
