پاکستان انٹرنیشنل ایئر لائنز نے کرایوں میں بڑی کمی کا اعلان کردیا۔

ترجمان پی آئی اے کا کہنا ہے کہ رعایتی کرائے فوری طور پر نافذ العمل ہوں گے جن کے ٹکٹ 31 اگست 2024  تک جاری کرائے جا سکیں گے۔ ترجمان نے مزید کہا کہ رعایتی کرائے پر 30 ستمبر 2024 تک سفر کیا جا سکے گا۔

رعایتی کرایوں سے پاکستان سے مدینہ منورہ جانے والے عمرہ زائرین بھی مستفید ہوسکیں گے۔

  اسلام آباد: ایشیائی ترقیاتی بینک (اے ڈی بی) نے رئیل اسٹیٹ سیکٹر میں ٹیکس ریفارمز اور ٹیکس چھوٹ ختم کرنے کی تجویز دے دی ہے۔

اے ڈی بی کے مطابق اوپن پلاٹس پر چھ سال بعد ٹیکس استثنیٰ ختم اور پراپرٹی ڈویلپمنٹ پر ٹیکس عائد ہونا چاہیے، پراپرٹی ڈویلپمنٹ پر ٹیکس استثنیٰ ہونے کے باعث مینوفیکچرنگ اور ایگری بزنسز میں سرمایہ کم ہو رہی ہے، مینو فیکچرنگ اور ایگری بزنسز میں سرمایہ کاری نہ ہونا گروتھ اور پیداوار میں رکاوٹ کا سبب ہے۔

ایشیائی ترقیاتی بینک کا کہنا ہے کہ غیر منقولہ پراپرٹی کی فروخت اور سرمایہ کاری پر اسٹینڈرڈ ٹیکس عائد کیا جانا چاہیے، پراپرٹی ڈویلپمنٹ پر ٹیکس مراعات دے کر حکومت کو ریونیو سے محروم رکھا گیا، ٹیکس استثنیٰ ہونے کے باعث لوکل سرمایہ کاری رئیل اسٹیٹ سیکٹر میں ہوئی ہے۔

اے ڈی بی کے مطابق پاکستان نیشنل اربن اسیسمنٹ رپورٹ میں انرجی ریفارمز، واٹر سپلائی ریفارمز کے لیے اقدامات کا مطالبہ کیا گیا ہے۔ واٹر سپلائی، ٹرانسپورٹ سسٹم، بلڈنگ ڈیزائن میں توانائی کے بہتر استعمال کے لیے اقدامات ناگزیر ہیں۔

رپورٹ میں کہا گیا کہ پاکستان میں بڑھتی ہوئی آبادی کے باعث متبادل انرجی کے ذرائع کو بھی وسعت دینا ہوگی، واٹر ریسورسز مینجمنٹ پلان سے پینے کے لیے صاف پانی کی فراہمی اور پانی ضائع کرنے پر پیلنٹی ہوگی۔ اربن ڈویلپمنٹ کے لیے سالڈ ویسٹ مینجمنٹ اور ٹرانسپورٹ سسٹم میں اصلاحات لانا ہوں گی۔

  کراچی: پیپلز پارٹی کے چیئرمین بلاول بھٹو زرداری نے کہا ہے کہ اگلی بار جب وزیراعظم یہاں آئیں تو انہیں جناح اسپتال، این آئی سی وی ڈی، این آئی سی ایچ کا دورہ کرائیں گے، ہم لاہور میں ایسے اسپتال بنانے کے لیے تیار ہیں جہاں لوگوں کو مفت علاج ملے۔

جناح اسپتال کراچی میں دو جدید وارڈز اور سائبر نائف کا افتتاح کرنے کی تقریب سے خطاب کرتے بلاول بھٹو نے کہا کہ پاکستان کے بہترین اسپتال سندھ میں موجود ہیں، کوئی بھی میڈیا ہو پاکستان کے خلاف منفی خبریں شائع کرتا ہے، صوبے کے تین بڑے اسپتال اس صوبے میں گڈ گورننس کا ثبوت ہیں، سندھ کے بارے میں مشہور کیا جاتا ہے کہ ہم کچھ کرتے ہی نہیں، ہم نے کوئی میگا پروجیکٹ نہیں بنایا۔

انہوں نے کہا کہ پیپلز پارٹی سندھ میں عوام کی خدمت کررہی ہے، ہم دعوے نہیں کرتے بلکہ کام بھی کرتے ہیں، پورے پاکستان میں سائبر نائف سرجری کی ایک ہی مشین ہے جو جناح اسپتال میں ہے، دنیا بھر میں یہ مہنگا ترین علاج ہے ایک ٹریٹمنٹ پر ایک لاکھ ڈالر خرچ ہوتے ہیں، پیشنٹ ایڈ فاونڈیشن اور سندھ حکومت نے مل کر آج تیسری سائبر نائف سرجری مشین متعارف کرائی ہے جوکہ مفت علاج ہے پاکستان کے شہریوں کے لیے۔

بلاول نے کہا کہ تمام صوبوں میں ’’پیٹ اسکین‘‘ بھی پیسوں کے عوض ہے جبکہ یہاں یہ بھی مفت ہے، جے پی ایم سی کے صرف کینسر کے شعبے میں دنیا کے پندرہ ممالک اور پاکستان کے 167 شہروں سے لوگ علاج کرانے آتے ہیں۔

انہوں ںے وزیراعلیٰ سے کہا کہ اگلی بار جب وزیراعظم یہاں آئیں تو انہیں جناح اسپتال، این آئی سی وی ڈی، این آئی سی ایچ کا دورہ کرائیں، پھر ہم ان سے درخواست کریں گے کہ صوبہ پنجاب میں ہم ایسے اسپتال بنانے کے لیے تیار ہیں جبکہ بلوچستان میں ہم خود کوشش کررہے ہیں، ہم چاہتے ہیں لاہور میں بھی ایسے اسپتال بنیں اور لوگوں کو مفت علاج ملے۔

انہوں نے مزید کہا کہ پنجاب اور بلوچستان میں بھی این آئی سی ایچ بنانے کی کوشش کررہے ہیں، پنجاب کی مدد کیلیے ہم وزیراعلیٰ سندھ مراد علی شاہ اور وزیر صحت سندھ عذرا پیچوہو کو بھیجنے کیلئے تیار ہیں، تاکہ لاہور میں بھی کراچی کے اسپتالوں جیسی مفت علاج کی سہولیات ہوں۔

  اسلام آباد: سپریم کورٹ نے اسلام آباد ہائی کورٹ کو آڈیو لیک کیس میں مزید کارروائی سے روکتے ہوئے شہریوں کی جاسوسی کو غیر قانونی قرار دینے اور چیئرمین پی ٹی اے و ممبران کیخلاف توہین عدالت میں شوکاز نوٹس جاری کرنے کے 25 جون کے حکمنامے کو معطل کردیا۔

سپریم کورٹ میں بشریٰ بی بی اور نجم الثاقب آڈیو لیک کیس میں ہائیکورٹ کے فیصلے کیخلاف وفاقی حکومت کی اپیل پر سماعت ہوئی۔

ایڈیشنل اٹارنی جنرل عامر رحمان عدالت میں پیش ہوئے اور دلائل دیے کہ 29 مئی کے اسلام آباد ہائی کورٹ کے حکمنامے میں اتھارٹیز کو فون ٹیپنگ سے روک دیا گیا، ہائی کورٹ کے حکمنامے کے سبب انٹیلی جنس ایجنسیز کاؤنٹر انٹیلی جنس نہیں کر پا رہیں اور کسی دہشت گرد کو بھی اب نہیں پکڑ پا رہیں، آئی ایس آئی، آئی بی کو فون ٹیپنگ اور سی ڈی آر سے بھی روکا گیا۔

جسٹس امین الدین خان نے پوچھا کہ کیا ہائیکورٹ نے یہ تعین کیا ہے کہ آڈیو کون ریکارڈ کر رہا ہے؟ ایڈیشنل اٹارنی جنرل نے جواب دیا کہ ابھی تک یہ تعین نہیں ہوسکا، تفتیش جاری ہے۔

جسٹس نعیم اختر افغان نے ریمارکس دیے کہ بدقسمتی سے اس ملک میں سچ تک کوئی نہیں پہنچنا چاہتا، سچ جاننے کیلئے انکوائری کمیشن بنا اسے سپریم کورٹ سے اسٹے دے دیا، سپریم کورٹ میں آج تک دوبارہ آڈیو لیکس کیس مقرر ہی نہیں ہوا، پارلیمان نے سچ جاننے کی کوشش کی تو اسے بھی روک دیا گیا، نہ پارلیمان کو کام کرنے دیا جائے گا نہ عدالت کو تو سچ کیسے سامنے آئے گا؟

جسٹس امین الدین خان نے کہا کہ یہ بھی تو ہو سکتا ہے جن سے بات کی جا رہی ہو آڈیو انہوں نے لیک کی ہو، کیا اس پہلو کو دیکھا گیا یے؟ آج کل تو ہر موبائل میں ریکارڈنگ سسٹم موجود ہے۔

عدالت نے وفاقی حکومت کی اپیل سماعت کیلئے منظور کرتے ہوئے فریقین کو نوٹس جاری کردیے اور اسلام آباد ہائی کورٹ کے 25 جون کا حکمنامہ معطل کردیا۔ عدالت نے تاحکم ثانی اسلام آباد ہائی کورٹ کو مزید کارروائی سے بھی روک دیا۔

سپریم کورٹ نے حکم نامہ جاری کرتے ہوئے کہا کہ ایڈیشنل اٹارنی جنرل نے بتایا ہائی کورٹ نے آرٹیکل 199 کے اختیار سماعت سے تجاوز کیا، کیونکہ سپریم کورٹ کے دو عدالتی فیصلوں میں اصول طے شدہ ہے ہائیکورٹ ازخود نوٹس نہیں لی سکتی، عدالت کو بتایا گیا 31 مئی کی ہائیکورٹ کی سماعت میں جو پانچ سوالات طے کیے گئے وہ درخواست گزاروں کا کیس ہی نہیں تھا اور ہائی کورٹ تفتیش نہیں کر سکتی۔

سپریم کورٹ نے قرار دیا کہ 29مئی 2024 کے اسلام آباد ہائی کورٹ کے حکمنامے کا جائزہ لیا گیا، 29 مئی کے اسلام آباد ہائی کورٹ کے حکمنامے کو اگلی عدالتی کارروائی میں توسیع نہیں دی گئی، اس لیے حکمنامہ معطل کرنے کی ضرورت نہیں۔

 لاہور: وزیراعلیٰ پنجاب مریم نواز نے کہا ہے کہ عوام کی خدمت کے لیے تعلیم، صحت اور دیگر فلاحی منصوبے حکومت کی اولین ترجیح ہیں۔

انسانیت کے عالمی دن کے موقع پر اپنے پیغام میں مریم نواز نے کہا کہ دنیا بھر میں انسانوں کی خدمت کرنے والوں کو سلام اور خراجِ تحسین پیش کرتی ہوں۔ انسانیت کی خدمت کاعظیم مقصد قوموں کو ترقی کی راہ پر گامزن کرتا ہے۔

انہوں نے کہا کہ خدمت میں مصروف تمام ریسکیو ورکرز، ڈاکٹرز، نرسز، امدادی کارکنان کو سلام پیش کرتی ہوں۔ انسانیت کی خدمت کو عبادت سمجھتی ہوں۔ عوام کی خدمت کے لیے تعلیم، صحت اور فلاحی منصوبے اولین ترجیح ہیں۔ انسانیت کی خدمت ہمار ا منشور اور نصب العین ہے۔

مریم نواز کا کہنا تھا کہ انسانیت کی خدمت کے لیے پاکستان کا پہلی ائرایمبولینس پراجیکٹ لانچ کیا ہے ۔ خدمت کا عزم نبھاتے ہوئے اسپتال اور مراکز صحت کی اپ گریڈیشن شروع کی ہے۔ فیلڈ اسپتال، کلینک آن ویلز اور مفت ادویات دہلیز پر پہنچائی جارہی ہیں۔

وزیراعلیٰ پنجاب نے کہا کہ انسانیت کی خدمت کا مشن پورا کرنے کے لیے ریسکیو 1122 کو موٹر ویز پر تعینات کیا جارہا ہے۔ ایسے معاشرے کی تشکیل چاہتے ہیں جہاں ہر انسان کو عزت و وقار کے ساتھ جینے کا حق حاصل ہو۔ انسانیت کے خدمت گار بنیں، جو مشکل میں ہو اس کی مدد کریں، یہ فرض بھی ہے اور ہماری روایت بھی۔ انہوں نے کہا کہ انسانیت کی خدمت سنت نبویﷺ بھی ہے اور اس سے اللہ تعالیٰ بھی راضی ہوتے ہیں۔