پاکستان کی سینیئر اداکارہ بشریٰ انصاری نے پاکستان کے دارالحکومت اسلام آباد سے جڑی اپنی زندگی کی تلخ یادوں سے پردہ اٹھاتے ہوئے کہا ہے کہ یہ شہر انہیں اداس کردیتا ہے۔
اپنے یوٹیوب چینل پر اپلوڈ کردہ ولاگ میں گفتگو کرتے ہوئے بشریٰ انصاری نے اسلام آباد میں اپنی مصروفیات کا احوال سنناتے ہوئے یہاں اپنے اوپر گزری آزمائش کا بھی اشارہ دیا۔
اگرچہ اداکارہ نے کھل کر خود کو درپیش مسائل بتانے سے گریز کیا لیکن ان کی گفتگو سے اندازہ ہوتا ہے کہ ان کی پہلی شادی خاصی پریشانی اور مشکلات کا شکار تھی۔
اداکارہ نے کہا کہ میں اسلام آباد میں مقیم رہی ہوں، یہاں پی ٹی وی اسلام آباد سینٹر پر کام بھی کیا ہوا ہے، یہاں بچوں کو اسکول چھوڑنے بھی جاتی تھیں، بہت سی تکلیف دہ یادیں بھی ہیں۔
انہوں نے کہا کہ میں اسلام آباد 1989 میں آئی اور 1991 میں واپس گئی اور ان دو برس میں نے بہت تکلیف اٹھائی، بہت پریشان رہتی ہیں لیکن اپنے مسائل میں نے آپ کو نہیں بتائے، سڑکوں پر ماری ماری پھرتی تھی، بچوں کو لانا لے جانا پھر انہیں کھلانا پلانا حالانکہ میرے دل میں سوراخ تھا۔
اداکارہ نے مسکراتے ہوئے کہا کہ دکھ بھرے دل کے ساتھ مائیں سب کام کرتی ہیں، مائیں بچوں کو نہیں پتا چلنے دیتیں ، ان پر جو بھی گزر رہی ہوں بچوں کی زندگیوں میں پریشانی نہ آئے، بہت کچھ ہورہا ہوتا ہے لیکن مائیں چھپاتی ہیں اور کوشش کرتی ہیں کہ بچے متاثر نہ ہوں۔
انہوں نے گفتگو کو جاری رکھتے ہوئے کہا کہ لیکن بچوں کو معلوم ہوجاتا ہے یہ بھی میں نے محسوس کیا، شروع میں میں چاہتی تھی کہ انہیں کچھ پتا نہ چلے، انہیں سلا کر چپکے سے کمرے میں بند ہو کر رویا کرتی تھی لیکن آہستہ آہستہ بچے متاثر ہوتے ہیں۔
بشریٰ انصاری نے کہا کہ چاہے آپ کی کوشش ہو کہ انہیں کچھ پتا نہ چلے کچھ چیزیں وہ اپنی آنکھوں سے دیکھ لیتے ہیں اور کچھ چیزیں وہ سمجھ جاتے ہیں، اس کے بڑے اثرات ہوتے ہیں۔
انہوں نے یاد کیا اس وقت نریمان (بڑی بیٹی) کو انزائٹی اٹیک ہوتا تھا لیکن اس وقت مجھے پتا ہی نہیں تھا کہ یہ کیا ہوتا ہے اور اسے سانس کا مسئلہ تھا تو اس کی سانس رک جاتی تھی تو میں سمجھتی تھی کہ اس کی طبیعت خراب ہے لیکن وہ سب کچھ دیکھ رہی تھی جو مجھ پر گزر رہی تھی اور زیادہ متاثر ہورہی تھی البتہ چھوٹی بیٹی خاموش ہوگئی تھی۔
اداکارہ نے کہا کہ اسلام آباد آکر مجھے یہاں گزارے ساڑھے 3 سال یاد آجاتے ہیں، اگرچہ دیگر شہروں میں بھی وہی عجیب و غریب معاملات درپیش تھے لیکن میں نے یہاں بہت مصیبتیں اٹھائیں اور بہت مسائل تھے، اس لیے اسلام آباد مجھے بہت اداس کردیتا ہے، میرا دل گھبرا جاتا ہے اور میں یہاں نہیں رہنا چاہتی۔
خیال رہے کہ بشریٰ انصاری نے پہلی شادی پروڈیوسر اقبال انصاری سے کی تھی اور شادی کے 36 سال بعد ان کے طلاق لے لی تھی۔
اداکارہ نے ایک انٹرویو میں کہا تھا کہ انہیں جب پہلی بار انہیں طلاق لینے کا خیال آیا، اس وقت ان کی بچیاں اسکول جاتی تھیں اور انہوں نے یہ سوچ کر طلاق لینے کا فیصلہ ٹال دیا کہ لوگ ان کی بچیوں کو کیا کہیں گے؟
بشریٰ انصاری نے بتایا کہ جب ان کی بیٹیوں کی شادیاں ہوگئیں اور ان کے بچے بھی ہوگئے، تب انہوں نے طلاق لینے کا فیصلہ کیا۔
بشریٰ انصاری نے پہلی بار مئی 2023 میں دوسری شادی کا اعتراف کیا تھا، تاہم ان کی دوسری شادی کی خبریں نومبر 2019 میں آنا شروع ہوئی تھیں کہ انہوں نے ڈراما نگار اقبال حسین سے دوسری شادی کرلی۔
