تھائی لینڈ میں حال ہی میں ایک ایسا واقعہ پیش آیا جس نے دیکھنے والوں کو حیرت اور مسکراہٹ کے ملے جلے جذبات میں مبتلا کر دیا۔
ایک جنگلی ہاتھی جس کا نام پلائی پیانگ لیک ہے اچانک ایک مقامی سپر مارکیٹ میں جا گھسا اور وہاں چاول کے میٹھے کیک اور مرغی کے انڈوں کا خوب مزہ لیا۔
یہ دیو قامت جانور جس کا وزن تقریباً چار ٹن ہے، مارکیٹ میں لگ بھگ دس منٹ تک گھومتا رہا۔
اس دوران اس نے کسی کو نقصان نہیں پہنچایا البتہ چھت میں پھنس گیا جس سے وہاں موجود لوگوں میں ہلچل مچ گئی۔
دکاندار کی حاضر دماغی
دکان کے مالک نے حاضر دماغی کا مظاہرہ کرتے ہوئے ہاتھی کو پرسکون انداز میں باہر نکلنے پر آمادہ کیا۔
ان کے مطابق یہ پہلا موقع ہے کہ میری دکان میں کوئی ہاتھی آیا ہو، میں چاہتا ہوں کہ ایسا دوبارہ نہ ہو، مجھے نقصان کا اندیشہ ضرور تھا مگر خوش قسمتی سے اس نے صرف میٹھے چاول اور انڈے کھائے اور چلا گیا۔
جکائی نے مزید حیرت کا اظہار کرتے ہوئے کہا کہ عموماً ہاتھی نمکین خوراک کو ترجیح دیتے ہیں، مگر یہ مہمان میٹھے چاولوں کا رسیا نکلا۔
اس تمام ہنگامے کے باوجود کل مالی نقصان صرف 22.70 پاؤنڈ کے برابر ریکارڈ کیا گیا۔
بعد ازاں جنگلی حیات کے محافظوں نے پلائی پیانگ لیک کو حفاظت کے ساتھ واپس جنگل منتقل کر دیا۔
ماحولیاتی ماہرین کے مطابق، حالیہ برسوں میں جنگلی ہاتھی انسانی خوراک کے ذائقے کے عادی ہونے لگے ہیں۔ وہ روایتی پتے اور گھاس چھوڑ کر اب گھروں اور گاڑیوں کی تلاشی لینے لگے ہیں تاکہ زیادہ توانائی بخش خوراک حاصل کی جا سکے۔
یہ رجحان ماہرین کے لیے تشویش کا باعث ہے، کیونکہ جنگلی حیات کا اس قدر شہری علاقوں میں داخل ہونا انسانوں اور جانوروں دونوں کے لیے خطرے کا سبب بن سکتا ہے۔
