ٹیسلا، اسپیس ایکس اور دیگر کمپنیوں کے مالک اور دنیا کے امیر ترین شخص ایلون مسک چاند پر آرٹی فیشل انٹیلی جنس (اے آئی) سیٹلائیٹ فیکٹری قائم کرنا چاہتے ہیں۔
نیویارک ٹائمز کی ایک رپورٹ کے رپورٹ کے مطابق ایلون مسک نے اس خواہش کا اظہار اپنی اے آئی کمپنی ایکس اے آئی کے ملازمین سے میٹنگ کے دوران کیا۔
اس موقع پر انہوں نے یہ بھی کہا کہ وہ چاند پر قائم کی جانب والی فیکٹری میں ایک بہت بڑی غلیل جیسی ڈیوائس بھی چاہتے ہیں جو سیٹلائیٹس کو خلا میں لانچ کرنے میں مدد فراہم کرے گی۔
مریخ کی جگہ اب زمین سے باہر کس جگہ ایلون مسک انسانی شہر بسانا چاہتے ہیں؟
ایکس اے آئی کی جانب سے فی الحال اس رپورٹ پر کوئی بیان جاری نہیں کیا گیا۔
یہ پہلی بار نہیں جب ایلون مسک کی جانب سے خلا میں فیکٹریوں کے قیام کی بات کی گئی ہے۔
چند روز قبل ایک بیان میں ایلون مسک نے کہا کہ تھا کہ اے آئی میں ہونے والی حالیہ پیشرفت کا انحصار بڑے ڈیٹا سینٹرز پر ہے جن کے لیے بہت زیادہ مقدار میں توانائی اور کولنگ ٹیکنالوجیز کی ضرورت ہوتی ہے ۔
انہوں نے کہا کہ عالمی سطح پر اے آئی کے لیے بجلی کی طلب کو پورا کرنا ممکن نہیں تو طویل المعیاد بنیادوں پر خلا میں اے آئی مراکز کا قیام لازمی ہوگا۔
اسی طرح ایک پوڈ کاسٹ میں بات کرتے ہوئے ایلون مسک نے کہا کہ 36 ماہ یا اس سے قبل اے آئی مراکز کو خلا میں پہنچا دیا جائے گا۔
اگر چاند پر فیکٹری کے قیام کا مشن کامیاب رہا تو بظاہر ایلون مسک کی جانب سے وہاں انسانی بستی کے قیام کو بھی ممکن بنایا جائے گا اور مریخ پر بھی ایسا کرنا آسان ہوگا۔
برسوں سے وہ یہ کہتے آرہے ہیں کہ انسانیت کے مستقبل کے تحفظ کے لیے ضروری ہے کہ مریخ پر انسانی شہر کا قیام ممکن بنایا جائے۔
