امریکی ٹیکنالوجی کمپنی ایپل جلد ہی عالمی سطح پر آئی فون 18 سیریز لانچ کرنے جا رہی ہے، جس کی لانچ ستمبر 2026 میں متوقع ہے۔
آئی فون 18 سیریز میں ریگولر آئی فون 18، آئی فون 18 ایئر، آئی فون 18 پرو، اور آئی فون 18 پرو میکس شامل ہوں گے، آئی فون 18 سیریز کی قیمت اور رنگ درج ذیل ہیں:
آئی فون 18 کی متوقع قیمت
آئی فون 18 اتنا سستا نہیں ہوگا جتنا آئی فون 17 تھا، ایپل نے بنیادی طور پر پہلے کے 128 جی بی کے مقابلے میں زیادہ میموری والا ویریئنٹ (256 جی بی) بطور بَیس ماڈل متعارف کروایا تھا، اور اس کی قیمت تقریباً وہی رکھی تھی جو پہلے 128GB ویریئنٹ کی ہوا کرتی تھی۔ اس کی وجہ سے لوگ آئی فون 17 کے بَیس ماڈل کی طرف پہلے سے کہیں زیادہ راغب ہوئے تھے۔
تاہم، اُس وقت حالات مختلف تھے، اب میموری کی لاگت کہیں زیادہ بڑھ چکی ہے، اس کی وجہ مغربی ممالک میں جغرافیائی سیاسی کشیدگی کے باعث پیدا ہونے والے عالمی سپلائی چَین کے مسائل ہیں۔ ایپل کے لیے ڈیوائسز کی تیاری اور شپنگ کی لاگت میں اضافہ ہوا ہے۔ اپنے منافع کے مارجن کو برقرار رکھنے کے لیے ایپل کے پاس آئی فون 18 کے بَیس ماڈل کی قیمت بڑھانے کے علاوہ کوئی اور راستہ نہیں ہوگا۔
تاہم، امکان ہے کہ آئی فون 18 پرو ماڈلز کی قیمت میں کوئی اضافہ نہیں ہوگا، اس کی وجہ یہ ہے کہ آئی فون 18 پرو ماڈلز میں اب بھی کمپنی کے لیے کافی منافع موجود ہے، لہٰذا زیادہ میموری لاگت کے باوجود ایپل آئی فون 18 پرو ڈیوائسز کی قیمت کو مسابقتی رکھنے کے قابل ہوگا۔
آئی فون 18 پرو کے رنگ
توقع ہے کہ آئی فون 18 پرو ماڈلز نئے رنگوں کے ساتھ پیش کیے جائیں گے، غالب امکان ہے کہ صارفین کے لیے ایک نیا نیلا اور میجنٹا رنگ متعارف کروایا جائے گا۔ یہ بھی متوقع ہے کہ ایپل آئی فون 18 پرو ماڈلز کے لیے دوبارہ سیاہ رنگ کا ویریئنٹ متعارف کروائے۔ ڈیزائن کے بارے میں توقع ہے کہ وہ آئی فون 17 پرو ماڈلز جیسا ہی ہوگا۔ کیمرا آئی لینڈ بھی غالباً ویسا ہی رہے گا تاہم، ہمیں کیمرا اور پروسیسر کی کارکردگی میں بڑی اپ گریڈز کی توقع ہے۔
آئی فون 18 سیریز کی متوقع لانچ
توقع ہے کہ آئی فون 18 سیریز جلد لانچ کی جائے گی، اس کی لانچ ستمبر 2026 کے دوسرے ہفتے میں متوقع ہے۔ فی الحال ایپل کی توجہ ورلڈ وائیڈ ڈیولپرز کانفرنس 2026 پر مرکوز ہے۔ اس کانفرنس کا انعقاد 8 جون سے 12 جون 2026 کے درمیان ہوگا۔ ایپل آئی فونز، میک، اور آئی پیڈز سمیت نئی مصنوعات کے لیے نئی نسل کا سافٹ ویئر متعارف کروائے گا۔
کانفرنس کے دوران ایپل جو سافٹ ویئر پری ویو پیش کرے گا، اس کے ذریعے دنیا کو آئی فون 18 سیریز کے تجربے کی ایک جھلک دیکھنے کو ملے گی۔
