ایلومینیم فوائل سے وائی فائی سگنل بہتر ہو سکتے ہیں۔
گھروں میں وائی فائی سگنل کمزور ہونے کی شکایت عام ہے لیکن ایک نئے تجربے میں دعویٰ کیا گیا ہے کہ راؤٹر کے پیچھے ایلومینیم فوائل لگانے سے انٹرنیٹ کی رفتار میں کچھ حد تک بہتری آسکتی ہے۔
غیر ملکی ٹیک ویب سائٹ کے مطابق ایک صارف نے اپنے وائی فائی راؤٹر کے پیچھے ایلومینیم فوائل لگا کر انٹرنیٹ اسپیڈ کا تجربہ کیا، تجربے کے دوران فوائل لگانے سے پہلے اور بعد میں نیٹ اسپیڈ کو خصوصی ایپ کے ذریعے جانچا گیا۔
نتائج کے مطابق ڈاؤن لوڈ اسپیڈ میں تقریباً 58 فیصد اضافہ ریکارڈ کیا گیا جبکہ اپ لوڈ اسپیڈ میں معمولی 3 فیصد بہتری دیکھی گئی تاہم پنگ یا ردعمل کا وقت 12 ملی سیکنڈ بڑھ گیا جو آن لائن گیمنگ کے شوقین افراد کے لیے منفی ثابت ہوسکتا ہے۔
ماہرین کے مطابق وائی فائی سگنلز دراصل ریڈیو ویوز ہوتے ہیں جو روشنی کی طرح منعکس بھی ہوسکتے ہیں، ایلومینیم فوائل چونکہ ریڈیو ویوز کو منعکس کرنے کی صلاحیت رکھتا ہے اس لیے یہ بعض صورتوں میں سگنلز کو گھر کے مخصوص حصوں کی جانب موڑ سکتا ہے۔
رپورٹ میں کہا گیا ہے کہ اگرچہ نتائج ہر صارف اور گھر کے سیٹ اپ کے مطابق مختلف ہوسکتے ہیں تاہم یہ سادہ گھریلو تجربہ بعض افراد کے لیے فائدہ مند ثابت ہوسکتا ہے۔
ماہرین کا کہنا ہے کہ یہ طریقہ مکمل حل نہیں بلکہ محدود بہتری فراہم کرسکتا ہے، خاص طور پر اُن گھروں میں جہاں وائی فائی سگنل کمزور ہوں۔
