لاہور (آن لائن)آشیانہ اقبال سکینڈل کی تحقیقات میں مزید پیشرفت میں سابق ڈی جی ایل ڈی اے احد چیمہ کےلئے انکشافات سامنے آگئے، نیب ذرائع کے مطابق احد چیمہ اور قریبی رشتہ دارون کی پیراگون سوسائٹی میں اراضی کا کھوج لگالیا گیا۔ احد چیمہ اور قریبی رشتہ داروں کی پیراگون سوسائٹی میں 4 ایکڑ اراضی ہے۔ نیب نے پیراگون سوسائٹی میں اراضی کے شواہد بھی جمع کر لئے۔ اراضی سے متعلق شواہد پیراگون سٹی کے دفتر سے ملنے والے ریکارڈ سے ملے۔ احد چیمہ اور رشتہ دارون کی اراضی کی تصدیق کےلئے متعلقہ اداروں سے نیب نے رابطہ کر لیا ہے۔ احد چیمہ سے متعلق نئے انکشافات کے بعد ریمانڈ میں توسیع کی استدعا کی جائے گی۔ تین روز قبل پراگون سٹی میں چھاپے سے مزید انکشافات کی توقع ہے۔ پنجاب کی ترقیاتی سکیموں میں میگاکرپشن کرنے کے الزامات میں نیب کے زیر حراست آفیسر سابق ڈی جی ایل ڈی اے احد چیمہ کی اہلیہ کے خلاف بھی کرپشن الزامات کی تحقیقات شروع کر دی گئی ہیں جبکہ انکشاف ہوا ہے صائمہ احد چیمہ کو قواعد و ضوابط کے خلاف ڈپٹی کمشنر اوکاڑہ تعینات کیا گیا تھا۔صائمہ احد چیمہ کا تعلق انکم ٹیکس گروپ سے ہے اور وہ ڈسٹرکٹ مینجمنٹ کی کسی پوسٹ پر تعیناتی کی اہل نہیں تھی اب انہیں ایڈیشنل سیکرٹری خزانہ پنجاب تعینات کر دیا گیا ہے ادھر مزید انکشاف ہوا ہے کہ نیب کو تحقیقات کے دوران احد چیمہ نے رضاکارانہ طور پر تعاون کی پیش کش کی ہے 10اسے افسران کی لسٹ نیب کو فراہم کی ہے جو پنجاب کے تمام ترقیاتی کاموں میں کرپشن کرتے رہے تاہم ان افسران کو فوری طور پر گرفتار نہ کرنے کا فیصلہ کیا گیا ۔ فہرست میں موجود افسران کے خلاف تحقیقات کا آغاز کر دیا گیا ہے اور متعلقہ میگاپراجیکٹس کا مزید ریکارڈ حاصل کرنے کی کوشش کی جا رہی ہے۔
