شارجہ(آئی این پی) کراچی کنگز کے کپتان عماد وسیم کا کہنا ہے کہ وہ انجری سے صحت یابی کے لیے دعا کرنے پر اپنے مداحوں کے بے حد مشکور ہیں ۔ سماجی رابطے کی ویب سائٹ ٹوئٹر پر اپنے ایک پیغام میں عماد وسیم کا کہنا تھا کہ وہ بہت تیزی کے ساتھ صحت یاب ہو رہے ہیں اور اپنی انجری سے نجات پا رہے ہیں۔
نوجوان آلرانڈر کا کہنا تھا کہ وہ کراچی کنگز اور پشاور زلمی کے درمیان ہونے والے انتہائی اہم میچ میں شرکت نہیں کر پائیں گے تاہم ڈریسنگ روم سے اپنی ٹیم کی سپورٹ کریں گے۔11مارچ کو لاہور قلندرز اور کراچی کنگز کے درمیان ہونے والے میچ میں کراچی کے کپتان عماد وسیم بالر محمد عامر کی گیند پر لاہور کے سہیل خان کا کیچ لیتے ہوئے پیچھے کی جانب گر گئے تھے اور اس دوران ان کا سر زمین سے ٹکرا گیا تھا، جس کے بعد انہیں فوری طور پر ہسپتال منتقل کیا گیا تھا۔سماجی رابطے کی ویب سائٹ ٹوئٹر پر اپنے ایک پیغام میں کراچی کنگز کے مالک سلمان اقبال کا کہنا تھا کہ عماد وسیم اس وقت ہسپتال میں ہی ہیں، اور وہ بہت تیزی کے ساتھ صحت یاب ہورہے ہیں۔خیال رہے کہ 11 مارچ کو ہونے والے پی ایس ایل کے سنسنی خیز مقابلے میں لاہور قلندرز نے ایونٹ کی روایتی حریف کراچی کنگز کو سپر اوور میں 2 رنز سے شکست دے کر اس کے سامنے پلے آف مرحلے میں پہنچے کے لیے مشکلات پیدا کردیں۔
