اسلام آباد (اے پی پی) سکواش کے سابق ایشین چیمپئن عامر اطلس نے پاکستان سکواش فیڈریشن کے صدر ائیر چیف مارشل مجاہد انور خان سے اپیل کہ ہے کہ وہ ملکی مفاد کےلئے سکواش کھیلنا چاہتا ہے اور ایشین گیمز کےلئے ٹرائلز کے ذریعے قومی ٹیم میں شامل کیا جائے، گذشتہ روز اے پی پی سے گفتگو کرتے ہوئے انہوں نے کہا کہ سندھ سکواش ایسوسی ایشن کے زیراہتمام آئندہ ماہ 6 جولائی سے 11 جولائی تک کراچی میں کھیلے جانے والی جوبلی انشورنس پاکستان سرکٹ تھری ٹورنامنٹ کھیلنے کی بھی خواہش کی تھی کہ ٹورنامنٹ میں شرکت کےلئے مجھے وائلڈ کارڈ یا لوکل کوالیفائنگ راﺅنڈ کے ذریعے کھیلنے کی اجازت دی جائے لیکن ابھی تک نہ ہی مجھے وائلڈ کارڈ اور نہ ہی کوالیفائنگ راﺅنڈ میں رکھا جا رہا ہے اس ٹورنامنٹ کے لئے دس ہزار ڈالر کی انعامی رقم رکھی گئی ہے۔ انہوں نے کہا کہ مجھے ٹورنامنٹ کھیلنے کا موقع دیا گیا تو میں قوم کو مایوس نہیں کروں گا۔ انہوں نے پاکستان سکواش فیڈریشن کے صدر ائیر چیف مارشل مجاہد انور خان سے اپیل کی ہے کہ میں تین ماہ سے پریکٹس کر رہوں اور مجھے ڈائرکٹ نہیں بلکہ ٹرائلز کے ذریعے قومی ٹیم میں شامل کیا جائے اور لوکل ٹورنامنٹس بھی کھیلنے کی اجازت دی جائے۔ ایک سوال کے جواب میں عامر اطلس نے کہا کہ تاریخ گواہ ہے کہ جب بھی مجھے پاکستان سکواش فیڈریشن نے موقع دیا تو میں نے گولڈ میڈلز حاصل کئے اور مایوس نہیں کیا۔ انہوں نے کہا کہ میں ہرسطح پر ٹرائلز دینے کےلئے تیار ہوں۔ پاکستان سکواش فیڈریشن کو مجھ سے فائدہ اٹھانا چاہئے اور میرے کھیلنے سے ملک و قوم کو فائدہ ہوگا۔
