راولپنڈی (بیورورپورٹ )چیئرمین مترکہ وقف املاک بورڈ صدیق الفاروق نے کہا ہے کہ شیخ رشید کو لال حویلی نہیں بلکہ اس کے ساتھ منسلک جگہ خالی کرنے کا نوٹس جاری کیا گیا ہے جس پر انہوں نے ناجائز قبضہ کیا۔عوامی مسلم لیگ کے سربراہ شیخ رشید نے کہا تھا کہ متروکہ وقف املاک بورڈ نے لال حویلی میں ان کی رہائش کو ناجائز قبضہ قرار دیتے ہوئے اسے 15 دن میں خالی کرنے کا نوٹس جاری کیا ہے لیکن لال حویلی میری ہے اور میرا جنازہ بھی لال حویلی سے ہی نکلے گا۔ نجی ٹی وی سے گفتگو کرتے ہوئے صدیق الفاروق نے کہا کہ شیخ رشید نے لال حویلی سے منسلک متروکہ وقف املاک بورڈ کی جگہ پر قبضہ کیا ہماری جگہ ناجائز طور پر حویلی میں شامل کی گئی، ان کے زیر قبضہ ہال اور کمرے ناجائز ہیں۔ انہوں نے کہا کہ شیخ رشید نے 10 مرلے پر ناجائز قبضہ کیا ہوا ہے جن میں 5 مرلے کا ہال اور 6 دکانیں شامل ہیں اور دکانوں کے کرایہ داروں کو بھی جبری نکال دیا گیا تھا جبکہ شیخ رشید اور ان کے بھائی نے جگہ الاٹ کرنیکی درخواست بھی دی جسے مسترد کیا گیا۔ انہوں نے کہا کہ شیخ رشید کے زیر قبضہ کروڑوں روپے کی سرکاری زمین ہے جس پر پرویز مشرف کے دور میں اقتدار کے نشے میں قبضہ کیا گیا، اسے خالی کرانا ہو گا۔ قبل ازیں عوامی مسلم لیگ کے سربراہ شیخ رشید نے کہا تھا کہ متروکہ وقف املاک بورڈ نے لال حویلی میں ان کی رہائش کو ناجائز قبضہ قرار دیتے ہوئے اسے 15 دن میں خالی کرنے کا نوٹس جاری کیا ہے۔ شیخ رشید کا کہنا تھا کہ حکومت اوچھے ہتھکنڈووں پر اتر آئی ہے اور خوفزدہ ہو کر اپنے لئے خود مسائل پیدا کر رہی ہے۔ انہوں نے کہا کہ پش اپس سے ڈرنے والی حکومت میں لال حویلی خالی کرانے کی ہمت نہیں اور اگر ہمت ہے تو خالی کرا کر دیکھ لیں۔
جنازہ بھی لال حویلی سے اُٹھے گا ….
