کراچی(ویب ڈیسک) اداکاراظہارقاضی کی 11 ویں برسی آج منائی جارہی ہے۔ٹیلی وڑن اور فلم کی اسکرین پر 2 دہائیوں تک صلاحیتوں کے جوہر دکھانے والے داکار اظہار قاضی 1955 میں کھارادر کے علاقے میں پیدا ہوئے، بھارتی فلم اسٹار امیتابھ بچن سے گہری مشابہت ابتدائی دنوں میں ان کے کیریئر کے لیے معاون ثابت ہوئی، اظہا رقاضی نے فنی کیریئر کا آغاز 1982 میں فاطمہ ثریا بجیا کی ٹی وی سیریل انا سے کیا، ڈرامہ سیریل انا میں اظہار قاضی اور مہرین الٰہی کی جوڑی کو اداکار شکیل اور غزالہ کیفی کے بعد سب سے مقبول جوڑی قرار دیا گیا۔اظہار قاضی نے ٹی وی سیریل دائرہ، گردش، زخم، گناہ گار اور پانی پے نام میں بھی کردار نگاری کی، ٹیلی وڑن پر اپنی بے پناہ مصروفیت کی وجہ سے انھوں نے اسٹیل ملز میں اپنی ملازمت کو خیرباد کہہ دیا، اظہار قاضی نے1986 میں نذرشباب کی فلم روبی سے فلمی کیریئر کی شروعات کی اور تقریباً 90 فلموں میں کام کیا، اظہار قاضی کو نگار فلم اور نیشنل ایوارڈز سمیت کئی اعزازات سے نوازا گیا، 24 دسمبر 2007 کو گھر میں ایک تقریب کے دوران انھیں دل کا دورہ پڑا جو جان لیوا ثابت ہوا۔
