لاہور (شوبزڈیسک) شوبز شخصیات نے نئے سال کیلئے اپنی نیک خواہشات کا اظہار کرتے ہوئے اس امید کا اظہار کیا ہے کہ سال 2019ءپاکستان میں امن ، خوشحالی اور ترقی کا سال ثابت ہوگا ، ہر شخص کو نئے سال میں پاکستان کی ترقی اور خوشحالی کےلئے انفرادی اور اجتماعی کاوشوں کے عزم کا اعادہ کرنا چاہیے اور اپنا حصہ ڈالنے کیلئے اپنے لئے اہداف مقرر کرنے چاہئیں ۔ اداکارہ ثنا ،میرا ،نیلم منیر، ریشم ، میرا ،جاوید شیخ،ببرک شاہ،عمائمہ ملک ، ماورا حسین ، عروہ حسین ، مہوش حیات ،ہمایوں سعید ، فیصل قریشی ،احسن خان ،افضل خان ، افتخار ٹھاکر ، ناصر چینوٹی ، نسیم وکی نے اپنے بیانات میں کہا کہ ہماری دعا ہے کہ 2019ءپاکستان میں خوشیوں کےساتھ امن اور خوشحالی لے کر آئے اور ملک سے دہشتگردی جیسے ناسور کا مکمل خاتمہ ہو اور پاکستان ہر شعبے میں ترقی کی منازل طے کرے ۔نیا سال پاکستان کی فلم انڈسٹری کےلئے بھی ترقی کا سال ثابت ہو۔
اور ہمیں اس کےلئے مل کر چلنے کے عزم کا اعادہ کرنا چاہیے ۔شوبز شخصیات نے کہا کہ ملک کی ترقی کےلئے سب کو اپنا انفرادی اور اجتماعی کردار ادا کرنا ہوگا اور اس کے لئے ہر شخص کو پاکستان کی ترقی اور خوشحالی میں اپنا حصہ ڈالنے کےلئے اہداف مقرر کرنے چاہئیں ۔ جس کے تحت بیشک ایک شخص کہیں ایک درخت لگا دے ،کسی ایک غریب اور نادار کی ذمہ داری اٹھا لے اوراسی طرح مستحق افراد کے بچوں کو تعلیم کے زیور سے آراستہ کرنے کےلئے کردار ادا کیا جائے ۔
