میشا شفیع علی ظفر سے گلے ملتی تھی دونوں میں اچھے تعلقات تھے : گواہ نے اہم راز فشا کر دئیے

لاہور (نیوزرپورٹر) ایڈیشنل ڈسٹرکٹ اینڈ سیشن جج کی عدالت میں گلوکار علی ظفر اور گلوکارہ میشاہ شفیع کے مابین ہتک عزت کے دعویٰ پر سماعت کے دوران علی ظفر کی گواہ کنزہ منیر نے بتایا ہے کہ میشاہ شفیع کنسرٹ کی ریہرسل کے دوران آتی رہی اور علی ظفر کے گلے ملتی رہی اور اس دوران علی ظفر کے ساتھ خوش ہو کر بات چیت کرتی تھی اور اس دوران وہاں پر متعدد لوگ موجود ہوتے تھے۔ میشا شفیع علی ظفر کے ساتھ بیرون ملک بھی گئی دونوں کے درمیان اچھے تعلقات تھے ۔ کنزہ منیر نے مزید کہا کہ کنسرٹ کی ریکارڈنگ کے دوران میشا شفیع آئی اور علی ظفر کے گلے ملی اور سلام کیا ان حالات میں علی ظفر کا میشا شفیع کو ہراساں کرنا ناممکن ہے یہ جھوٹا الزام ہے۔ عدالت نے گواہ کا ریکارڈ قلمبند کرنے کے بعد مزید سماعت 18 مئی تک ملتوی کرتے ہوئے مزید گواہوں کو طلب کر لیا ہے ۔دوران سماعت علی ظفر کمرہ عدالت میں موجود رہے۔