لاہور (ویب ڈیسک)لاہور ہائی کورٹ نے شہباز شریف اور مریم نواز سمیت شریف خاندان اور مسلم لیگ (ن) پنجاب کے صدر رانا ثنااللہ کے خلاف قائم مقدمات کی سماعت کرنے والے تین ججوں کو رپورٹ کرنے کے لیے مراسلہ جاری کردیا۔لاہور ہائی کورٹ کے رجسٹرار کی جانب سے جج مسعود ارشد، محمد نسیم ارشد اور مشتاق الہٰی کو ہائی کورٹ میں رپورٹ کرنے کے لیے باقاعدہ طور پر مراسلہ جاری کر دیا۔مراسلے میں مذکورہ ججوں کو مخاطب کرتے ہوئے کہا گیا ہے کہ وزارت قانون و انصاف نے 26 اگست کو ایک نوٹی فکیشن جاری کیا تھا جس کے تحت ‘چیف جسٹس ہائی کورٹ نے آپ کی تبدیلی اور مزید احکامات کے اجرا تک ہائی کورٹ میں رپورٹ کرنے کی ہدایات دی ہیں’۔ہائی کورٹ کی جانب سے جاری مراسلے میں ججوں کی تبدیلی کے حوالے سے کوئی وجہ بیان نہیں کی گئی ہے۔واضح رہے کہ لاہور کی انسداد منشیات عدالت کے جج ارشد مسعود رکن قومی اسمبلی رانا ثنا اللہ کے خلاف اینٹی نارکوٹکس فورس (اے این ایف) کی جانب سے دائر کیے گئے مقدمے کی سماعت کر رہے تھے۔جج رانا مسعود ارشد کو 28 اگست 2019 کو اس وقت سماعت سے روک دیا گیا تھا جب وہ رانا ثنااللہ کی ضمانت کے حوالے سے ان کے وکلا کے دلائل سن چکے تھے جبکہ پراسیکیوٹر کو اپنے دلائل پیش کرنا تھے۔اے این ایف کے وکیل نے عدالت سے استدعا کی تھی کہ میری گزشتہ رات ہی تقرری ہوئی ہے اس لیے مجھے کیس کو پڑھنے کے لیے کچھ وقت دیا جائے۔جس کے باعث عدالت نے ایک گھنٹے بعد وکیل کو دوبارہ طلب کرتے ہوئے سماعت میں وقفہ دے دیا تھا۔سماعت کے دوبارہ آغاز پر جج مسعود ارشد نے کمرہ عدالت میں بتایا تھا کہ ’مجھے ابھی واٹس ایپ میسج موصول ہوا ہے اور ہائی کورٹ نے مجھے کام کرنے سے روک دیا ہے جبکہ میری خدمات بھی واپس کر دی گئی ہیں‘۔جج کا کہنا تھا ہوں نے واضح کیا تھا کہ وہ رانا ثنا اللہ کے خلاف کیس کی مزید سماعت نہیں کرسکتے تاہم رانا ثنا اللہ یا کسی کا بھی کیس ہوتا تو فیصلہ میرٹ پر ہونا تھا۔رانا ثنا اللہ کے وکیل فرہاد علی شاہ نے ردِ عمل دیتے ہوئے کہا تھا کہ ہمیں نظر آ گیا ہے کہ اے این ایف کا کیس کتنا مضبوط ہے، انہوں نے دعویٰ کیا کہ ہمیں پتا چل گیا تھا کہ سماعت میں ایک گھنٹے کا وقفہ کیوں دیا گیا ہے۔جس پر جج مسعود ارشد نے کہا کہ میں اللہ کو جواب دہ ہوں اور اللہ کی رضا کے لیے کام کیا ہے۔احتساب عدالت کے جج نعیم ارشد مریم نواز اور یوسف عباس کے خلاف چوہدری شوگر ملز کیس اور شہباز شریف، حمزہ شہباز اورسلمان شہباز کے خلاف رمضان شوگر ملز کیس کی سماعت کررہے تھے۔جج نعیم ارشد کو مقدمہ سننے والے جج کو چھٹیوں پر جانے کے بعد ان مقدمات کی سماعت کے لیے مقرر کیا گیا تھا۔جج مشتاق الہٰی کسی بڑے سیاسی رہنما کا مقدمہ تو نہیں سن رہے تھے تاہم وہ قومی احتساب بیورو (نیب) کی جانب سے دائر مقدمات سننے والے بنچوں میں شامل تھے۔
