(ویب ڈیسک)وزیر خارجہ شاہ محمود قریشی کا کہنا ہے کہ پاکستان اس مشکل گھڑی میں اپنے لبنانی بھائیوں کے ساتھ کھڑا ہے ۔
تفصیلات کے مطابق وزیر خارجہ شاہ محمود قریشی نے لبنان کے وزیر خارجہ شربیل واہبہ سے ٹیلیفونک رابطہ کیا اور بیروت میں ہونے والے حالیہ دھماکوں اور اس المناک سانحے کے حوالے سے تفصیلی تبادلہ خیال کیا۔
وزیر خارجہ نے کہا کہ 4 اگست کو بیروت میں ہونے والے ہولناک دھماکوں اور ان کے نتیجے میں شدید جانی اور مالی نقصان پر ہم دل گرفتہ ہیں ۔
وزیر خارجہ نے اس المناک سانحے پر حکومت پاکستان اور پاکستانی قوم کی طرف سے لبنان کی حکومت اور عوام کے ساتھ تعزیت کی۔
شاہ محمود قریشی نے اس المناک سانحہ میں جاں بحق ہونے والوں کے لیے دعائے مغفرت کی اور غمزدہ خاندانوں کے ساتھ اظہار تعزیت کیا۔
انہوں نے نے بیروت دھماکوں میں زخمی ہونے والوں کی خیریت دریافت کی اور ان کی جلد صحت یابی کے لیے دعاؤں اور نیک تمناؤں کا اظہار کیا۔
وزیر خارجہ نے پاکستان کی جانب سے اس مشکل گھڑی میں لبنان کی حکومت اور عوام کے ساتھ مکمل یکجہتی کا اظہار کرتے ہوئے کہا کہ اس سانحے کے نتیجے میں ہونے والے شدید معاشی نقصان پر بھی بہت دکھ اور افسوس ہے ۔
شاہ محمود قریشی نے کہا کہ پاکستان اس مشکل گھڑی میں اپنے لبنانی بھائیوں کے ساتھ کھڑا ہے ۔
انہوں نے اپنے لبنانی ہم منصب کو بتایا کہ جذبہ خیر سگالی کے تحت پاکستان کی طرف سے ادویات اور خوراک کا عطیہ روانہ کر دیا گیا ہے جو آج شام تک لبنان پہنچ جائے گا۔
وزیر خارجہ نے کہا کہ اس المناک سانحے میں لبنان کی حکومت اور عوام کا عزم و حوصلہ قابلِ تحسین ہے ۔
دونوں وزرائے خارجہ کا حالات معمول پر آنے کے بعد جلد ملاقات پر بھی اتفاق ہوا۔
وزیراعظم عمران خان اور صدر پاکستان جناب عارف علوی نے بھی اس سانحے پر لبنانی قیادت کے ساتھ ہمدردی اور تعزیت کی۔
