صدر مملکت عارف علوی نے گورنر سندھ عمران اسماعیل کا استعفیٰ منظور کر لیا۔
تفصیلات کے مطابق صدر مملکت نے گورنر سندھ عمران اسماعیل کا استعفیٰ منظور کر لیا، نوٹیفکیشن بھی جاری ہو گیا۔
اسپیکر سندھ اسمبلی آغا سراج درانی قائم مقام گورنر سندھ ہوں گے، آغا سراج کو قائمقام گورنر مقرر کرنے کا نوٹیفکیشن اسمبلی سیکریٹریٹ کو موصول ہو گیا۔
دوسری جانب صدر مملکت ڈاکٹر عارف علوی نے گورنر پنجاب عمر سرفراز چیمہ کو عہدے پر کام جاری رکھنے کی ہدایت کرتے ہوئے کہا ہے کہ برطرفی کی سمری پر فیصلہ ہونے تک وہ اپنے فرائض انجام دیتے رہیں گے۔
صدر کی گورنر پنجاب کو عہدے پر کام جاری رکھنے کی ہدایت
واضح رہے کہ گزشتہ روز وفاقی حکومت نے گورنر پنجاب عمر سرفراز چیمہ کو عہدے سے ہٹا دیا تھا، تاہم چیمہ نے اپنی برطرفی پر رد عمل دیتے ہوئے کہا تھا کہ وزیر اعظم کے پاس مجھ کو عہدے سے ہٹانے کا اختیار نہیں ہے، یہ اختیار صرف صدر مملکت کے پاس ہے۔
انھوں نے کہا تھا کہ مجھے عہدے سے ہٹانے کے لیے وزیر اعظم پہلے ایک سمری بھیجیں گے، جسے صدر نوٹیفائی کریں گے، جب تک صدر ڈی نوٹیفائی نہیں کرتے میں گورنر رہوں گا۔
