لاہور: (ویب ڈیسک) گورنر پنجاب محمد بلیغ الرحمان نے کہا ہے کہ ماحولیاتی آلودگی اور گلوبل وارمنگ پاکستان سمیت پوری دنیا کے لیے ایک چیلنج ہے، اس چیلنج سے نمٹنے کے لیے مشترکہ کوششوں کی ضرورت ہے۔
عالمی یوم ماحولیات پر پیغام میں گورنر پنجاب بلیغ الرحمن کا کہنا تھا کہ گلوبل وارمنگ کم کرنے کے لیے رینیوایبل انرجی کی طرف جانے کی ضرورت ہے۔ حکومت نے حال ہی میں سولر پینلز پہ سیلز ٹیکس ختم کیا ہے، یونیورسٹیوں میں ماحولیاتی تبدیلی پہ تحقیق کی ضرورت ہے۔
گورنر پنجاب نے کہا کہ جامعات سے ماحولیاتی تبدیلیوں پر کی گئی تحقیق کی روشنی میں تجاویز طلب کی ہیں، شجر کاری سے ماحولیاتی آلودگی کم کی جا سکتی ہے، ہم سب کو اپنی آنے والی نسلوں کے لیے صاف ماحول دینا ہے،معاشرے میں تمام افراد کو ماحولیاتی آلودگی کم کرنے میں اپنا کردار ادا کرنا ہو گا۔
