ابوجا : (ویب ڈیسک) نائیجیرین نیشنل یونیورسٹیز کمیشن (این یو سی ) نے ملک کی تمام یونیورسٹیوں کو 22 فروری سے 14 مارچ تک عام انتخابات کی وجہ سے بند کرنے کا حکم جاری کر دیا، انتخابات 25 فروری کو منعقد ہوں گے۔
غیر ملکی خبر رساں ادارے کے مطابق این یو سی کی جانب سے یونیورسٹیوں کو بند کرنے کا فیصلہ انتخابات کے لئے پولنگ کے دوران عملے اور طلباء کی حفاظت اور تحفظ کے خدشات کے بعد کیا گیا ہے۔
ملک میں جاری عدم تحفظ کے مسائل کی وجہ سے یہ تشویش پائی جاتی ہے کہ آیا انتخابات 25 فروری کو طے شدہ منصوبے کے مطابق آگے بڑھ سکیں گے یا نہیں، تاہم الیکشن کمیشن کے سربراہ نے انتخابات منصوبے کے مطابق ہونے کا عزم ظاہر کیا ہے۔
خیال رہے کہ نائیجریا میں ہونے والے انتخابات میں حق رائے دہی استعمال کرنے کے لئے رجسٹرڈ ہونے والوں میں نوجوانوں کی بڑی تعداد شامل ہے۔
