گلگت بلتستان (نیوز ڈیسک)گلگت بلتستان خیبر پختونخوااور کشمیر کے کچھ بالائی علاقوں میں بارش اور برفباری کا سلسلہ وقفے وقفے سے جاری رہا جس سے سردی کی شدت ایک بار پھر بڑھ گئی ہے۔ادھر میدانی علاقوں میں روزبروز درجہ حرارت میں اضافہ ہورہاہے ۔گلگت بلتستان کے ضلع ہنزہ اور نگر کے بالائی مقامات پر ہلکی برف باری کا سلسلہ جاری رہا ۔ دیامر ،استور کے پہاڑوں ، درختوں پر ایک بار پھر سفیدی چھا گئی ہے۔ چلاس میں ہلکی بارش سے موسم خوشگورا ہوگیا ۔ فیصل آباد میں جمعرات کی صبح ہونے والی بارش نے موسم تبدیل کردیا جبکہ دیگر علاقوں میں کہیں گرمی تو کہیں موسم کچھ بہتر ہے ۔ سندھ کے شہروں میں صبح کے وقت موسم میں خنکی رہتی ہے لیکن دوپہرمیں موسم گرم ہوجاتا ہے ۔آئندہ 24گھنٹوں کے دوران کشمیر اور بالائی پنجاب میں راولپنڈی، گوجرانوالہ، لاہور، اسلام آباد میں کہیں کہیں جبکہ ہزارہ، مردان، کوہاٹ، بنوں اور گلگت بلتستان میں چند مقامات پر بارش اور پہاڑوں پر ہلکی برف باری کا امکان ہے۔دوسری جانب ملک کے بالائی علاقوں میں جاتی سردی تھم گئی اور میدانی علاقوں میں سورج نے آب و تاب سے چمکنا شروع کردیاہے۔
