ممبئی: ساؤتھ انڈین فلم انڈسٹری کے معروف کنڑ اداکار و ہدایتکار رشب شیٹی نے کہا ہے کہ بالی ووڈ فلموں میں بھارت کی منفی تصویر کشی کی جاتی ہے۔
بھارتی میڈیا کے مطابق حال ہی میں رشب شیٹی نے 70ویں نیشنل فلم ایوارڈز میں اپنی سُپر ہٹ فلم ‘کنتارا’ میں اپنی اداکاری کے لیے بہترین اداکار کا ایوارڈ جیتا۔
ایوارڈ جیتنے کے بعد، رشی شیٹی نے بھارتی خبررساں ادارے کو خصوصی انٹرویو دیا جس میں اُنہوں نے ہندی فلم انڈسٹری یعنی بالی ووڈ سے متعلق اپنی رائے کا اظہار کیا۔
رشب شیٹی نے کہا کہ بالی ووڈ اپنی فلموں کے ذریعے بھارت کی منفی تصویر کشی کرتا ہے جس کی وجہ سے عالمی سطح پر بھارت کو بُرا سمجھا جاتا ہے۔
اُنہوں نے کہا کہ بھارت سے متعلق منفی تاثر دینے والی بالی ووڈ فلموں کو عالمی تقریبات میں مدعو کیا جاتا ہے اور ان کا سرخ قالین پر استقبال کیا جاتا ہے۔
رشب شیٹی نے مزید کہا کہ میری قوم، میری ریاست، میری زبان میرا فخر ہے اور میں اپنی فلموں کے ذریعے بھارت کو مثبت انداز میں دکھانا چاہتا ہوں۔
بالی ووڈ کے بارے میں متازعہ بیان دینے پر ہندی فلم انڈسٹری کے مداحوں کی جانب سے رشب شیٹی کو تنقید کا نشانہ بنایا جارہا ہے۔
مداحوں کا کہنا ہے کہ رشب شیٹی منافق انسان ہیں، اُن کی اپنی فلموں میں بھی غیراخلاقی مناظر دکھائے جاتے ہیں۔
