قومی ویمن ٹیم کی سابق کپتان ندا ڈار نے 4 ستمبر کو 2 ماہ بعد ٹی20 ورلڈکپ 2024 کی جیت پر بھارتی ٹیم کو مبارکباد پیش کرکے تنقید کی زد میں آگئیں۔
بھارت نے 29 جون کو امریکا اور ویسٹ انڈیز میں شیڈول ٹی20 ورلڈکپ کے فائنل میں جنوبی افریقا کو شکست دیکر دوسری بار ٹرافی اپنے نام کی تھی۔ جس کے بعد کپتان روہت شرما اور ویرات کوہلی نے ٹی20 انٹرنیشنل میں اپنے کیرئیر کے اختتام کا اعلان کیا تھا۔
قومی ٹیم ویمن ٹیم کی سابق کپتان ندا ڈار نے بھارت کی جیت کے 2 ماہ بعد مبارکباد کا پیغام دیا تو شائقین و فینز نے انہیں تنقید کا نشانہ بنایا، جس کے بعد ویمن کرکٹر نے پوسٹ ڈیلیٹ کردی۔
انہوں نے سماجی رابطے کی سائٹ ایکس (ٹوئٹر) پر پوسٹ میں لکھا کہ بھارت کو ٹی20 ورلڈکپ 2024 جیتنے پر مبارکباد! روہت شرما اور ویرات کوہلی نے عالمی کرکٹ میں بےپناہ اہم کردار ادا کیا، آپ کی قیادت، مہارت، اور لگن نے دنیا بھر میں لاکھوں لوگوں کو متاثر کیا، ریٹائرمنٹ مبارک ہو، لیجنڈز۔
