بالی وڈ سمیت ہالی وڈ میں بھی یکساں مقبولیت کی حامل پریانکا چوپڑا نے دنیا کی ان دونوں مشہور فلم انڈسٹریوں میں واضح فرق بتادیا۔
پریانکا چوپڑا نے امریکاکا رخ یوں تو اپنی اداکاری اور گلوکاری کے فن کو آزمانے کیلئے کیا تھا لیکن وہ وہاں نک جونس کی محبت میں مبتلا ہوگئیں اور یکم دسمبر 2018 کو اپنی محبت کو شادی جیسے مضبوط بندھن میں باندھ دیا۔
اس اسٹار جوڑی کے ہاں بیٹی کی پیدائش 15 جنوری 2022 ء کو سروگیسی کے ذریعے ہوئی جس کا نام ’مالتی میری‘ رکھا۔
پریانکا چوپڑا جو اب امریکا میں مقیم ہیں گزشتہ ہفتے کافی عرصے بعد بھارت واپس آئیں۔جہاں انہوں نے اپنے نئے برانڈ ’Max Factor’ کی لانچنگ میں شرکت کی۔ ایک تازہ انٹرویو میں انہوں نے بالی وڈ اور ہالی وڈ میں کام کرنے کے فرق پر بات کی۔
اداکارہ کا ماننا ہے کہ بالی وڈ میں جگاڑ کا بہت زیادہ استعمال ہوتا ہے، یعنی کم وسائل میں بھی تخلیقی طریقوں سے کام مکمل کر لیا جاتا ہے، جبکہ ہالی وڈ میں زیادہ منظم طریقے سے اور وسائل کے ساتھ کام کیا جاتا ہے۔
دوران انٹرویو جب ان سے پوچھا گیا کہ وہ بالی وڈ اور ہالی وڈ میں کام کرنے کے تجربے کا کیسے موازنہ کریں گی، تو جواب میں پریانکا چوپڑا کا کہنا تھا کہ،’میرا خیال ہے کہ ہر ملک کے اپنے منفرد طریقے اور ثقافتی انداز ہوتے ہیں جن کے مطابق ہم کام کرتے ہیں۔’
اداکارہ کے مطابق ،’ سب سے بڑا فرق جو میں نے دیکھا ہے، وہ یہ ہے کہ ہالی وڈ میں بہت زیادہ پیپر ورک ہوتا ہے۔ اگلے دن سے پہلے آپ کو 100 ای میلز موصول ہو جائیں گی۔ وقت بہت مخصوص ہوتا ہے اور یہ اس بات پر منحصر ہوتا ہے کہ آپ نے پچھلی رات کب شوٹنگ ختم کی۔’
پریانکا نے مزید کہاکہ،’لیکن اس سے برعکس بالی وڈ میں ہمارے پاس بہت زیادہ ‘جگاڑ’ ہوتا ہے اور ہم کام پورا کر لیتے ہیں۔’
پریانکا کا ماننا ہے کہ،’ یہاں بالی وڈ میں ہم اس کے بارے میں تھوڑے رومانوی ہیں جیسے ‘ارے ہو جائے گا، کر لیں گے’، تو یہ کام کرنے کا ایک بہت مختلف طریقہ ہے، لیکن ہر ملک کی اپنی خصوصیت بھی ہے۔ میرا خیال ہے کہ ہماری تخلیقی صلاحیتیں بعض اوقات بہت قدرتی اور بے ساختہ ہو سکتی ہیں۔ یہی سب سے بڑا فرق ہے جو میں نے محسوس کیا ہے، ورنہ دنیا بھر میں فلم سازی ایک جیسی زبان بولتی ہے۔’
علاوہ ازیں پریانکا نے مزاحیہ انداز میں مزید کہا کہ،’ انہیں بالی وڈ کی فلموں میں سلو موشن میں ڈانس اور گانوں پر لپ سنک کرنا یاد آتا ہے’۔
کام کے محاذپر بات کریں تو پریانکا کو آخری بار امریکی رومانوی کامیڈی فلم ’لو اگین’میں دیکھا گیا تھا جبکہ وہ جلد ہی ’ہیڈ آف اسٹیٹ ’ اور ’دی بلف’ میں نظر آئیں گی۔
