بالی وڈ ڈائریکٹر روہت شیٹھی کی انڈسٹری کے بڑے ناموں پر مشتمل فلم ‘سنگھم اگین’ نے ریلیز کے پہلے ہی روز باکس آفس پر بھاری بزنس کرلیا۔
خیال رہے کہ اجے دیوگن، کرینہ کپور، رنویر سنگھ، ٹائیگر شروف جیسی ملٹی اسٹارر کاسٹ ‘سنگھم اگین’ کا کارتک آریان، دیویا بالن اور مادھوری ڈکشٹ پر مشتمل ‘بھول بھلیاں 3’ کے ساتھ کانٹے کا مقابلہ تھا۔
دونوں ہی فلمیں دیوالی کے موقع پر یکم نومبر کو سینما گھروں کی زینت بنیں اور فلمی پنڈتوں کو ان دونوں فلموں کی کارکردگی کا بے چینی سے انتظار تھا۔
روہت شیٹھی کی پولیس والوں کی دنیا کے گرد گھومتی اس فلم نے پہلے ہی روز زوردار اوپننگ کی اور اب تک کی اطلاعات کے مطابق ایک ہی دن تقریباً 45 کروڑ بھارتی روپے کما لیے۔
ٹریڈ ویب سائٹ سیکنلک ڈاٹ کام کے مطابق فلم نے جمعے کی رات 10 بجے تک 43.5 کروڑ روپے کا بزنس کرلیا تھا اور بہتر کارکردگی کا مظاہرہ کررہی ہے۔
اگر مختلف شوز میں شائقین کے ہجوم کی بات کی جائے تو صبح کے شو میں 39.9 فیصد، دوپہر کے شو میں 71.90 فیصد نشستیں بھری پائی گئیں۔
اس کے علاوہ شہروں کی بات کی جائے تو فلم نے جے پور، سورت، ممبئی اور پونے میں سینما گھ 60 سے 70 فیصد بھرے ہوئے تھے جبکہ دہلی میں دوپہر ایک بجے کے شو میں 50 فیصد سینما بھرے ہوئے پائے گئے۔
باکس آفس انڈیا کی رپورٹ کے مطابق بظاہر لگ رہا ہے کہ مہاراشٹرا میں سنگھم اگین نے بھول بھلیاں 3 کو پیچھے چھوڑ دیا ہے اس کے باوجود باکس آفس کے اعداد و شمار اتنے زیادہ نہیں ہیں جتنے عام طور پر روہت شیٹی کی فلم یا سنگھم فرنچائز سے متوقع تھے۔
قابل ذکر بات یہ ہے کہ اس ریلیز کے لیے کوئی بڑی تعداد میں خریداری یا رعایتی ٹکٹ نہیں دیے گئے، جس سے اس مرحلے پر باکس آفس کے نمبر نسبتاً سیدھے ہیں۔
سنگھم اگین ‘سپر ہٹ فرنچائز کی تیسری قسط ہے,’سنگھم’ 2011 میں ریلیز ہوئی تھی، جس میں کاجل اگروال اور پرکاش راج نے مرکزی کردار ادا کیے تھے، اس کے بعد 2014 میں سنگھم ریٹرنز آئی تھی، دونوں پراجیکٹس کو باکس آفس پر کامیاب قرار دیا گیا تھا۔
اجے دیوگن، کرینہ کپور خان، دیپیکا پڈوکون، اکشے کمار، ٹائیگر شروف اور رنویر سنگھ پر مشتمل فلم کا ٹریلر تقریباً پانچ منٹ لمبا تھا جو بالی وڈ ستاروں سے کی جھلک ایکشن مناظر اور مشہور مکالموں سے بھرا ہوا ہے۔
ٹریلر میں، اجے دیوگن کو ارجن کپور کے مدمقابل باجی راؤ سنگھم کا کردار ادا کرتے ہوئے دکھایا گیا ہے، فلم میں، کرینہ کپور اجے کی بیوی کا کردار ادا کر رہی ہیں، رنویر سنگھ اور اکشے کمار نے سمبا اور سوریا ونشی کے کرداروں کو دوبارہ نبھایا ہے۔
اس کاپ یونیورس میں ایک نیا اضافہ دیپیکا پڈوکون ہیں، جنہیں لیڈی سنگھم کے نام سے متعارف کرایا گیا ہے اور ٹائیگر شروف بھی اے سی پی ستیہ پٹنائک کے طور پر ٹیم میں انٹری کر رہے ہیں۔
