190 ملین پاؤنڈز کیس میں ملزمان نے عدالت میں جوابات جمع نہیں کرائے اور نہ ہی بشریٰ بی بی پیش ہوئیں۔ عدالت نے سماعت ملتوی کردی۔
بانی چیئرمین پی ٹی آئی عمران خان اور بشریٰ بی بی کے خلاف 190 ملین پاؤنڈز ریفرنس کی سماعت اڈیالہ جیل میں احتساب عادلت کے جج ناصر جاوید رانا نے کی۔ قبل ازیں عدالت نے ملزمان کو آج 342 کے سوال ناموں پر جواب داخل کرانے کی ہدایت کررکھی تھی۔
ملزمان کی جانب سے آج بھی 342 کے تحت جاری سوال ناموں کے جواب داخل نہیں کرائے اور نہ ہی ملزمہ بشریٰ بی بی آج عدالت میں پیش ہوئیں۔ ان کی جانب سے طبی بنیاد پر حاضری سے ایک روزہ استثنا کی درخواست منظور کرلی گئی۔
دوران سماعت نیب کے وکلا نے مؤقف اختیار کیا کہ ملزمان نے استثنا کے باوجود تاحال اپنا پلیڈر مقرر نہیں کیا۔
بعد ازاں عدالت نے سماعت بغیر کسی کارروائی کے جمعہ 22 نومبر تک ملتوی کردی۔
