اسلام آباد (ویب ڈیسک) وزیراعظم نواز شریف کے مشیر برائے خارجہ امور سرتاج عزیز نے مسئلہ کشمیر کیلئے دو طرفہ مذاکرات کے حل کی بھارتی تجویز کو مسترد کرتے ہوئے کہا کہ نئی دہلی نے گذشتہ دو دہائیوں کے درمیان ہونے والے ‘بامعنی مذاکرات کی تمام کوششوں کو ناکام بنایا’ ہے۔دفتر خارجہ کا جاری بیان ایسے موقع پر سامنے آیا ہے جب بھارت نے ترکی کے صدر رجب طیب اردگان کی جانب سے مسئلہ کشمیر کے حل کیلئے ثالثی کا کردار ادا کرنے کی پیش کش کو مسترد کردیا۔
سرتاج عزیز کے حوالے سے دفتر خارجہ نے کہا کہ ‘بھارت کی جانب سے پیش کی جانے والی تجویز کہ وہ پاکستان سے دو طرفہ مذاکرات کیلئے تیار ہے اب مزید معتبر نہیں رہی کیونکہ گذشتہ دو دہائیوں کے دوران بھارت نے اقوام متحدہ کی سلامتی کونسل کی منظورہ کردہ قرار دادوں کے مطابق مسئلہ کشمیر کے حل کیلئے بامعنی مذاکرات کے تمام مواقع ناکام بنادیئے ہیں’۔مشیر کا کہنا تھا کہ طیب اردگان کی جانب سے مسئلہ کشمیر کیلئے دونوں اسٹیک ہولڈرز کو مذاکرات کے عمل کو مضبوط کرنے اور ان کی جانب سے جموں اور کشمیر کے معاملے کو کثیر جہتی نقطہ نظر کے ذریعے حل کرنے کے مطالبے کو خوش آمدید کہا جائے گا’۔
سرتاج عزیز کا کہنا تھا کہ ہندوستان کے زیر انتظام کشمیر میں انسانی حقوق کے مسائل کو حل کرنے اور مسئلہ کشمیر کے حل کیلئے پاکستان تمام بیانات اور کوششوں کو خوش آمدید کہتا ہے’۔یاد رہے کہ بھارت کے دو روزہ دورے سے قبل طیب اردگان نے میڈیا کے نمائندوں سے بات چیت کرتے ہوئے تجویز پیش کی تھی کہ مسئلہ کشمیر کے حل کیلئے پاکستان اور بھارت کو ‘کثیر جہتی مذاکراتی عمل کو مضبوط’ کرنا چاہیے۔ہندوستان کی وزارت خارجہ کے ترجمان گوپال باگلے نے پاکستان کا نام لیے بغیر کہا تھا کہ مسئلہ کشمیر سرحد پار دہشت گردی کے ساتھ واضح طور پر منسلک ہے، اور مسئلہ کشمیر کے دوطرفہ حل سے قبل ان لوگوں کی جانب سے اسے روکا جانا چاہیے جو اس میں ملوث ہیں۔
سرتاج عزیز نے بھارتی وزارت خارجہ کے ترجمان کے اس بیان کو مسترد کرتے ہوئے کہا کہ بھارت کی جانب سے مسئلہ کشمیر کو سرحد پار دہشت گردی سے جوڑنا، ایک ایسا دعویٰ ہے جو آج دنیا میں کوئی بھی تسلیم کرنے کو تیار نہیں ہیں’۔انھوں نے مزید کہا کہ اسلامی تعاون کی تنظیم نے اپریل میں ایک قرار داد منظور کی تھی ‘جس میں بھارت کی جانب سے کشمیریوں کے حق خود ارادیت کی کوششوں کو دہشت گردی قرار دینے کے اقدامات کی مخالفت کی گئی تھی’۔
