اسلام آباد(ویب ڈیسک) پانامہ کیس میں مشترکہ تحقیقاتی ٹیم کے لئے چیف جسٹس نے خصوصی بنچ تشکیل دے دیا، جسٹس اعجاز افضل تین رکنی بنچ کے سربراہ ہوں گے، تینوں ججز پانامہ کیس سننے والے پانچ رکنی بنچ کا حصہ رہے، سماعت کل ڈیڑھ بجے کھلی عدالت میں ہو گی، جے آئی ٹی ہر دو ہفتے بعد سپریم کورٹ میں رپورٹ پیش کرے گی۔
پانامہ کا ہنگامہ ابھی ختم نہیں ہوا۔ پانامہ کیس کے فیصلے کے بعد جے آئی ٹی کی تشکیل کا معاملہ بھی تکمیل کے قریب پہنچ چکا ہے۔ چیف جسٹس ثاقب نثار نے سپریم کورٹ کا خصوصی بنچ تشکیل دیدیا ہے۔ جسٹس اعجاز افضل خان کو تین رکنی بنچ کا سربراہ مقرر کر دیا گیا ہے۔ دیگر ارکان میں جسٹس شیخ عظمت سعید اور جسٹس اعجاز الاحسن شامل ہیں۔
پانامہ کیس کی مشترکہ تحقیقاتی ٹیم کی تشکیل کیلئے خصوصی بنچ کھلی عدالت میں سماعت کرے گا۔ اس سلسلے میں آئی ایس آئی، ایم آئی سمیت تمام اداروں نے سپریم کورٹ کو نام بھجوا دئیے ہیں۔ عدالتی حکم کے مطابق، جے آئی ٹی ہر دو ہفتے بعد تحقیقات میں پیشرفت کے حوالے سے خصوصی بنچ کو آگاہ کرے گی۔ سپریم کورٹ کے پانچ رکنی بنچ نے بیس اپریل کو اکثریتی فیصلے میں پانامہ کیس پر جے آئی ٹی بنانے کا حکم دیا تھا۔
