شوبز انڈسٹری کو دین کی خاطر خیرباد کہنے والی معروف اداکارہ اور رقاصہ غزالہ ادریس المعروف نرگس نے بھارتی متنازع شخصیت راکھی ساونت کے ڈانس چیلنج پر اپنے ردِعمل کا اظہار کیا ہے۔
نرگس نے اپنے انسٹاگرام اکاؤنٹ پر ایک پوسٹ شیئر کی، جس میں انہوں نے حجاب میں اپنی تصویر کے ساتھ راکھی ساونت کی ڈانس چیلنج ویڈیو کا کولاج بنایا۔ اس پوسٹ میں نرگس نے راکھی ساونت کے چیلنج پر جواب دیتے ہوئے کہا کہ ‘محترمہ! الحمدللّٰہ، میں شوبز کو چھوڑ چکی ہوں۔‘
یاد رہے کہ کچھ دن پہلے راکھی ساونت کی ایک ویڈیو سوشل میڈیا پر خوب وائرل ہوئی تھی، جس میں انہوں نے پاکستان کی مشہور اداکارہ ہانیہ عامر اور معروف رقاصاؤں کو ڈانس کے ذریعے ہرانے کا چیلنج کیا تھا۔
راکھی ساونت کی اس ویڈیو پر ہانیہ عامر نے بھی دلچسپ انداز میں اپنا ردِعمل ظاہر کیا۔ ہانیہ نے اپنی انسٹاگرام اسٹوری پر لکھا کہ ‘پہلے زندگی کافی بورنگ تھی، پھر راکھی جی آ گئیں!‘
ہانیہ نے مزید کہا کہ راکھی ساونت کی درخواست قبول ہے اور انہوں نے مزاحیہ انداز میں کہا: ‘راکھی جی، میں آپ کو ایئرپورٹ لینے آ رہی ہوں!‘
یہ بھی یاد رہے کہ راکھی ساونت نے بھارتی وزیرِاعظم نریندر مودی کو دھمکی دی تھی کہ اگر بھارت میں ٹک ٹاک پر عائد پابندی ختم نہ کی گئی تو وہ پاکستان منتقل ہو جائیں گی۔ راکھی نے کہا تھا کہ وہ پاکستان جا کر حلوہ پوری کھائیں گی اور کسی پاکستانی سے شادی کریں گی۔
اس بیان کے ساتھ، راکھی ساونت نے مزید کہا تھا کہ پاکستان جا کر وہ ہانیہ عامر، نرگس، اور دیدار سے ملاقات کریں گی۔ انہوں نے ہانیہ عامر سے اپنی محبت کا اظہار کرتے ہوئے درخواست کی کہ وہ انہیں ایئرپورٹ پر ریسیو کریں اور اپنے گھر میں ٹھہرنے کی جگہ فراہم کریں۔
راکھی ساونت کے ان بیانات اور چیلنجز نے سوشل میڈیا پر خوب ہلچل مچائی ہے، جبکہ نرگس اور ہانیہ عامر کے دلچسپ ردِعمل نے اس واقعے کو مزید یادگار بنا دیا۔
