اسلام آباد(نیوز ایجنسیاں)نائب وزیراعظم اور وزیر خارجہ سینیٹر اسحاق ڈار نے کہا ہے کہ جنوبی ایشیا کی ترقی اور خوشحالی کیلئے باہمی تعاون کا فروغ ناگزیر ہے ،پاکستان بنگلا دیش سمیت تمام دوست ممالک کواہمیت دیتا ہے اور باہمی احترام، اعتماد اور خیر سگالی کے جذبے کے تحت بنگلہ دیش کے ساتھ اپنے تعلقات کو مزید مستحکم بنانے کیلئے پرعزم ہے۔ترجمان دفتر خارجہ کے مطابق ان خیالات کااظہار انہوں نے بنگلہ دیش کے 35سینئر سول سرونٹس پر مشتمل وفد سے خطاب کرتے ہوئے کیا ۔ملاقات میں دونوں ممالک کے دوستانہ تعلقات پر تبادلہ خیال کیا گیا ۔ نائب وزیراعظم نے کہا کہ ہم بنگلہ دیشی وفد کو خوش آمدید کہتے ہیں، ایسے وفود اور ملاقاتوں سے دوطرفہ تعلقات کو وسعت ملے گی، دورہ بنگلہ دیش کی خوشگوار یادیں آج بھی تازہ ہیں۔انہوں نے کہا کہ پاکستان اپنے دوست ممالک کو انتہائی اہمیت دیتا ہے، پاک بنگلہ دیش تعلقات میں مثبت پیشرفت کا خیرمقدم کرتے ہیں، پاکستان بنگلہ دیشی طلبہ کو تعلیمی وظائف فراہم کر رہا ہے۔ان کا کہنا تھا کہ خیالات اور سوچ کا تبادلہ دونوں ملکوں کیلئے سود مند ثابت ہو سکتا ہے، تعلیمی اصلاحات اور موسمیاتی تبدیلی پر باہمی تجربات سے استفادہ کرنا چاہیے۔انہوں نے پاکستان اور بنگلا دیش نالج کوریڈور کی اہمیت پر روشنی ڈالتے ہوئے کہا کہ یہ منصوبہ تعلیم، پیشہ ورانہ تربیت اور ادارہ جاتی تبادلوں کے فروغ میں اہم کردار ادا کر رہا ہے۔وزیر خارجہ نے امید ظاہر کی کہ اس تربیتی پروگرام کے ذریعے دونوں ممالک کے سرکاری افسران کو حکومتی امور اور عوامی انتظامی نظام سے متعلق اپنے تجربات اور مہارتوں کے تبادلے کا موقع ملے گا۔اسحاق ڈار کا کہنا تھا کہ ایسے پروگرام نہ صرف پیشہ ورانہ روابط کو فروغ دیتے ہیں بلکہ دونوں ممالک کے افسران کے درمیان دیرپا تعلقات اور دوستی کے رشتے قائم کرنے میں بھی مددگار ثابت ہوتے ہیں ۔اس موقع پر نائب وزیراعظم و وزیر خارجہ نے بنگلہ دیشی وفد کے اراکین کیلئے پاکستان میں ایک ثمر آور اور یادگار قیام کے لئے نیک تمنائو ں کا اظہار بھی کیا۔دفتر خارجہ کے مطابق بنگلا دیشی افسران کا وفد پاکستان اور بنگلا دیش کے درمیان قائم نالج کوریڈور کے تحت ایگزیکٹو لیڈرشپ ٹریننگ پروگرام میں شرکت کے لئے پاکستان میں موجود ہے ۔
اسحق ڈار
