ریاض(این این آئی)یمن کی حوثی ملیشیا نے سعودی دارالحکومت ریاض کے اہم تجارتی مرکز کنگ عبداللہ فنانشل ڈسٹرکٹ کے ایک بلند ٹاور کو نشانہ بنایا ہے جس کے نتیجے میں ٹاور اور قریبی عمارتوں کو جزوی نقصان پہنچا تاہم سعودی فضائی دفاعی نظام نے جنوبی علاقوں کی جانب داغے گئے متعدد بیلسٹک میزائل، ڈرون طیارے فضا میں ہی تباہ کر دیے۔ غیر ملکی خبر رساں ادارے کے مطابق سعودی وزارتِ خارجہ اور عرب اتحادی افواج کے ترجمان میجر جنرل ترکی المالکی نے تصدیق کی کہ شہری آبادیوں، معاشی مراکز پر حملے بین الاقوامی قوانین کی کھلی خلاف ورزی ہیں۔سعودی عرب کی قیادت میں قائم عرب اتحادی افواج نے یمن کے شمالی صوبوں صعدہ اور ذمار میں بروقت فضائی کارروائی کرتے ہوئے حوثی ملیشیا کے دو جدید بیلسٹک میزائل لانچنگ پلیٹ فارمز کو مکمل طور پر تباہ کر دیا ہے۔ غیر ملکی خبر رساں ادارے کے مطابق اتحادی افواج کے ترجمان نے ریاض سے جاری کردہ سرکاری بیان میں تصدیق کی کہ حوثی باغی ان خفیہ پلیٹ فارمز کو سعودی عرب کے جنوبی شہروں اور شہری آبادیوں پر میزائل حملوں کے لیے استعمال کرنے کی تیاری مکمل کر چکے تھے۔ بیان میں کہا گیا کہ جدید جاسوس طیاروں کی نشاندہی پر اتحادی لڑاکا طیاروں نے انتہائی درست نشانہ لگا کر میزائل لانچرز، اسلحہ ڈپو کو تباہ کر دیا جس سے بڑے جانی نقصان کا خطرہ ٹل گیا۔ عسکری ماہرین کا کہنا تھا کہ اتحادی افواج کی اس کامیاب کارروائی سے حوثی ملیشیا کی سرحد پار حملے کرنے کی صلاحیت کو شدید ضرب پہنچی ہے۔
٭٭٭٭٭
