اسلام آباد(آن لائن)قومی کرکٹ ٹیم کے کپتان سرفراز احمد نے انکشاف کیا ہے کہ ہماری فرسٹ کلاس کرکٹ کا نظام کمزور ہے جسے مضبوط بنانے کیلئے ہنگامی اقدامات اٹھانا ہوں گے ، کئی بار عمدہ پرفارمنس کے باوجود ٹیم میں جگہ نہیں بناسکا ، آئی سی سی ٹرافی کیلئے لندن جانے سے قبل ٹیم منیجمنٹ سمیت سب کا خیال تھاکہ اگر سیمی فائنل تک بھی رسائی ہو گئی تو یہ بہت بڑا کارنامہ ہوگا۔تفصیلات کے مطابق قومی کرکٹ ٹیم کے کپتان نے انکشاف کیا کہ وہ متعدد بار عمدہ پرفارمنس کے باوجود بھی قومی ٹیم میں جگہ بنانے میں ناکام رہے اور اس کا ذمہ دار کمزور فرسٹ کلاس سسٹم ہے جسے مضبوط بنانے کیلئے ہمیں ہنگامی بنیادوں پر اقدامات اٹھانے ہونگے ۔ انہوں نے کہاکہ آئی سی سی ٹورنامنٹ میں نوجوان کھلاڑیوں نے عمدہ کارکردگی کا مظاہرہ کیا جس سے پاکستان کرکٹ کو نیا ولولہ ملا ہے اور اب قوم کی امیدیں زیادہ وابستہ ہوگئی ہیں۔انہوں نے مزید کہا کہ آئی سی سی ٹرافی کیلئے لندن جانے سے قبل ٹیم منیجمنٹ سمیت سب کا خیال تھاکہ اگر سیمی فائنل تک بھی رسائی ہو گئی تو یہ بہت بڑا کارنامہ ہوگا۔انہوں نے کہاکہ آئی سی سی کے آٹھویں درجے کی ٹیم کےلئے ایونٹ جیت لینا کسی خواب سے کم نہیں ،سری لنکا کیخلاف فتح نے سیمی فائنل تک رسائی کا موقع فراہم کیا جس کے بعد تمام دباﺅ ختم ہو گیا اور ہم نے وہ حاصل کیا جس کا کوئی سوچ بھی نہیں سکتا تھا۔انہوں نے کہاکہ پاکستان کو چیمپئن ٹرافی کا تاج سر پرسجانے کا مرحلہ کبھی نہیں بھول سکتا جس کی ایک بڑی وجہ یہ بھی ہے کہ ایونٹ کے ناک آﺅٹ مرحلے میں ہم نے روایتی حریف بھارت سے چیمپئن ٹرافی چھین لی۔
