کراچی(شوبز ڈیسک)پاکستانی ٹی وی ڈراموں کے ذریعے بالی ووڈ میں تہلکہ مچانے والی اداکارہ سجل علی نے کہا کہ فنکارانہ صلاحیتیں ہی کسی بھی فنکار کو چھوٹا بڑا بنا دیتی ہیں، میری خوش نصیبی ہے کہ پہلی بھارتی فلم ہی لیجنڈ ہدایتکار بونی کپور اور لیجنڈ اداکارہ سری ویوی کیساتھ کرنے کو ملی ان شخصیات نے جس طرح میری حوصلہ افزائی کی اس کو الفاظ میں بیان کرنے سے قاصر ہوں۔فلم مام کی بھارت بھر میں مقبولیت میرے لئے اعزاز ہے۔ شائقین میرا مقابلہ اگر بھارتی فنکاروں سے کررہے ہیں تو یہ ان کی مہربانی ہے ،بھارتی میڈیا کی دپیکا پڈوکون اور کترینہ کیف سمیت دیگر فنکاراﺅں کیلئے مستقبل قریب میں خطرہ قرار دینے کی خبریں دیکھ کر فنکارہ ہونے کے ناطے مجھے مسرت ہوئی۔
لیکن جن فنکاراﺅں کے مقابل مجھے لاکر کھڑا کیا جارہا وہ ان کی خواہش ہوسکتی ہے۔یہ سب بہت بڑی فنکارائیں ہیں انکے کریڈٹ پر کئی کامیاب ترین فلمیں ہیں جنکا بزنس دنیا بھر میں کروڑوں میں ہوا ہے۔ان خیالات کا اظہار انہوں نے گفتگو کرتے ہوئے کیا۔ ان کا کہنا تھا مام میں میری متاثر کن پرفارمنس میں عدنان صدیقی، سری دیوی ، نوازالدین سمیت پوری ٹیم کا بھی بڑا ہاتھ ہے ، میں ایک چھوٹی سی اداکارہ ہوں ، صف اول کی بھارتی فنکاراﺅں کے مستقبل کیلئے مجھے خطرہ قرار دینا بھارتی میڈیا کا بڑا پن ہے ابھی طفیل مکتب ہوں ، اپنے کام سے دنیا بھر میں ملک کا نام روشن کرنا چاہتی ہوں۔ فنکارہ ہونے کے ناطے ثقافتی سفیر کے طور پر بھارتی فلموں میں کام کیا ،اسی گروپ کی مزید دو فلموں کا معاہدہ بھی کرلیا ہے جسکی عکسبندی کا فیصلہ پروڈیوسر جلدکرینگے۔انہوں نے کہا دونوں ممالک کے درمیان بہتر تعلقات بالخصوص ثقافتی تعلقات کے ذریعے فنکار اپنا کردار ادا کرسکتے ہیں۔ ان کا کہنا تھا بھارتی فلم انڈسٹری دنیا بھر کے ٹیلنٹ کو متعارف کراتی ہے مجھ سے قبل کئی سینئر فنکاروں نے بھی اس انڈسٹری میں جاکر اپنی صلاحیتوں کو منوایا ، ماہرہ خان، صبا قمر، ماورا حسین ، فواد خان، علی ظفر، عدنان صدیقی ، حمائمہ ملک و دیگر موجودہ دور میں بھارتی فلم انڈسٹری میں اپنی فنی صلاحیتوں کی بنا پر رنگ دکھا چکے ہیں۔انہوں نے کہا بھارتی فلموں کیساتھ ساتھ پاکستانی فلموں میں کام کی آفرز بھی ہیں جس کیلئے ٹی وی ڈراموں کا شیڈول بھی اب نئے سرے سے ترتیب دوں گی۔
