لاہور (مانیٹرنگ ڈیسک) زینب کے اہل خانہ سمیت دیگر متاثرہ خاندانوں کی ملزم عمران سے ملاقات کروا دی گئی جس میں متاثرہ خاندان ملزم کو دیکھ کر آبدیدہ ہوگئے اور اسے کوستے رہے نجی ٹی وی کے مطابق ملزم عمران سے تمام متاثرہ خاندانوں کی ملاقات جے آئی ٹی ممبران کی موجودگی میں سی ٹی ڈی سینٹر چوہنگ میں کروائی گئی۔ زینب کے اہلخانہ والدین اور متاثرہ خاندانوں نے اس سے مختلف سوالات بھی کئے جن کے وہ جوابات بھی دیتا رہا۔ واضح رہے کہ ملزم عمران نے معصوم زینب کو زیادتی کا نشانہ بنانے کے بعد اسے قتل کرکے کوڑے کے ڈھیر میں پھینک دیا اور موقع سے فرار ہوگیا تاہم زینب کو تلاش کرنے کیلئے ان کے گھر والے دن رات ایک کرتے رہے مگر کوئی اچھی خبر نہ مل سکی اور آخر کار اس کی لاش کوڑے کے ڈھیر سے برآمد ہوئی جس پر ریاستی ادارے حرکت میں آئے اور ملزم عمران کو ڈی این اے ٹیسٹ کے بعد 23تاریخ کو گرفتار کرلیا گیا۔ حکام نے زینب کے والد کے ملزم سے ملاقات کا مطالبہ پورا کرتے ہوئے ان کی ملاقات کروادی۔ امین انصاری کی جانب سے کئی مقامات پر یہ مطالبہ کیا گیا کہ ان کی ملزم سے ملاقات کروائی جائے جس پر آخر کار ان کا مطالبہ مانتے ہوئے ملاقات کروا دی گئی ہے۔
