جنیوا(ویب ڈیسک) اقوام متحدہ نے خبردار کیا ہے کہ اگر جنگلی حیات، قدرتی ماحول اور حیاتیاتی تنوع کے بے دریغ خاتمے کو نہیں روکا گیا تو خود انسانی بقا کو خطرہ لاحق ہوجائے گا۔اقوامِ متحدہ میں حیاتیاتی تنوع (بایو ڈائیورسٹی) کی سربراہ کرسٹیانا پشکا پامر نے کہا ہے اس ضمن میں دو سال میں ہمیں نئے اور قابلِ عمل معاہدے پر کام کرنا ہوگا ورنہ خود انسانی بقا کو شدید خطرات لاحق ہوسکتے ہیں۔ انہوں نے تمام ممالک کے باشندوں سے کہا ہے کہ وہ اپنی اپنی حکومتوں پر زور دیں تاکہ 2020ءتک حشرات، پرندوں، پودوں اور ممالیوں کے تحفظ کے لیے قابلِ عمل اہداف بناسکیں اور غذائی تحفظ کو یقینی اور کاربن ڈائی آکسائیڈ کے اخراج میں کمی کی جاسکے۔ایک اخبار سے بات کرتے ہوئے کرسٹینا نے کہا کہ حیاتیاتی تنوع کا نقصان (انسانوں کے لیے) خاموش قاتل ہے، اگرچہ یہ کلائمٹ چینج سے مختلف ہے لیکن کم اہم نہیں کیونکہ ہمیں جنگلی حیات کی موت کا احساس اس وقت ہوتا ہے جب وقت گزرچکا ہوتا ہے تمام جان دار ایک دوسرے سے وابستہ ہیں اور خود انسان کی زندگی بھی انہی سے جڑی ہے۔اس ضمن میں 195 ممالک اور یورپی یونین مصر کے شہر شرم الشیخ میں جمع ہوکر جنگلی حیات اور ماحول کی بقا پر غور کریں گے اور کسی فریم ورک پر متفق ہونے کا بھی امکان ہے۔ اس میں 2020ءمیں چین میں ہونے والی کانفرنس کے لیے قابلِ عمل اہداف کے تعین میں مدد مل سکے گی۔جانوروں اور قدرتی ماحول کے تحفظ کے لیے کام کرنے والی انجمنوں کا عرصے سے مطالبہ ہے کہ اس موضوع کو بھی آب و ہوا میں تبدیلی کی طرح اہمیت دی جائے اور پیرس کلائمٹ معاہدے کی طرح ایک قابلِ عمل اور منظم لائحہ عمل مرتب کیا جائے۔اس سے قبل 2002ء اور 2010ئ میں حیاتیاتی تنوع کی بین الاقوامی کانفرنسز میں دو اہم معاہدے ہوئے تھے لیکن ان پر عمل نہیں ہوسکا اور عین اسی عرصے میں زمین پر جانوروں کی معدومیت اور ان کے ماحول کی تباہی کے اتنے بڑے سانحات رونما ہوئے کہ انہیں ڈائنوسار کے خاتمے کے بعد جان داروں کا سب سے بڑا نقصان تصور کیا جارہا ہے۔کرسٹینا پامر نے امید ظاہر کی کہ شرم الشیخ کی کانفرنس سے خاطر خواہ نتائج برا?مد ہوسکتے ہیں۔

نئی دہلی(ویب ڈیسک) اگرچہ شادی کی تقاریب میں قریبی عزیزوں اور رفقا کو ہی مدعو کیا جاتا ہے لیکن بھارت میں شادیوں کی تقاریب کئی دن جاری رہتی ہیں اور ان میں نہ صرف اجنبیوں بلکہ غیرملکی سیاحوں کو بھی بلایا جارہا ہے اور اس کے بدلے ان سے معاوضہ لیا جارہا ہے۔بھارتی ویب سائٹ غیرملکیوں کو ہندوستانی شادیوں میں مدعو کررہی ہے جسے شادی بیاہ کی سیاحت یا ویڈنگ ٹورزم کا نام دیا جارہا ہے اس ضمن میں جوائن مائی ویڈنگ نامی ویب سائٹ بہت مقبول ہورہی ہے۔ ویب سائٹ پر ایسے جوڑوں کی تصاویر دیکھی جاسکتی ہیں جن کی شادی مستقبل میں ہونے والی ہے اور وہ غیرملکیوں کو خوش آمدید کہنا چاہتے ہیں۔ اس ضمن میں ویب سائت اپنا کچھ معاوضہ رکھتی ہے۔ویب سائٹ کے مطابق اس طرح غیرملکی افراد کم وقت میں بھارتی ثقافت سے آگاہ ہوسکتے ہیں اور شادیوں کی تقاریب کا تجربہ اور خوشی میں شریک ہوسکتے ہیں، اس کے ساتھ ساتھ غیرملکی مقامی کھانوں اور مزاج سے بھی واقفیت حاصل کرسکتے ہیں۔ویب سائٹ کی بانی اورسی پرکانی کہتی ہیں کہ اب تک 25 بھارتی شادیوں میں 100 سے زائد غیرملکی سیاح شریک ہوچکے ہیں اور دونوں جانب سے اس کی ضرورت بڑھ رہی ہے۔ وہ کہتی ہیں کہ تقریب میں غیرملکی سیاح خصوصی مہمان ہوتے ہیں اور سب گھر والے ان کا خیال رکھتے ہیں۔ اسی طرح بعض خاندان سیاحوں کے لیے مقامی لباس بھی تیار کرکے دیتے ہیں۔اس ضمن میں ایک دن کی تقریب کے لیے غیرملکیوں سے 150 ڈالر اور دو روزہ تقریب کے لیے 250 ڈالر کی رقم لی جاتی ہے۔ اگرچہ اس میں فراڈ کا امکان رہتا ہے اور اسی بنا پر ویب سائٹ کے اراکین شادی والے گھر کے ذمے داروں سے گھنٹوں بات کرتے ہیں اور سیاحوں کی حفاظت کے ہر پہلو کو مدِ نظر رکھا جاتا ہے۔

ریاض(ویب ڈیسک) سعودی وزیرخارجہ عادل الجبیر نے کہا ہے کہ سعودی ولی عہد جمال خاشقجی کے قتل میں ہر گز ملوث نہیں۔بین الاقوامی خبر رساں ادارے کے مطابق سعودی وزیر خارجہ عادل الجبیر نے کہا ہے کہ سعودی ولی عہد جمال خاشقجی کے قتل میں ہر گز ملوث نہیں ہیں اور اب سعودی بادشاہت یا ولی عہد کے حوالے سے مزید توہین برداشت نہیں کی جائے گی۔ عادل الجبیر کا کہنا تھا کہ سعودی شاہ اور ولی عہد کی نمائندگی ملک کا ہر شہری کرتا ہے لہٰذا محمد بن سلمان کا ہٹانے کا مطالبہ سرخ لکیر ثابت ہوگا۔سعودی وزیر خارجہ نے واضح کردیا کہ جمال خاشقجی کا قتل انٹیلی جنس ایجنسی کی بددیانتی پر مبنی کارروائی ہے تاہم قتل کی تحقیقات جاری ہیں اور مجرموں کو سزا ضرور ملے گی۔واضح رہے کہ سعودی وزیر خارجہ عادل الجبیر صحافی جمال خاشقجی کے قتل سے متعلق امریکی تفتیشی ادارے سی آئی اے رپورٹ کی سخت الفاظ میں تردید کر چکے ہیں۔

خرطوم(ویب ڈیسک) جنوبی سوڈان سے تعلق رکھنے والے ایک بے رحم شخص نے اپنی بیٹی کو فیس بک پر نیلام کردیا۔بین الاقوامی میڈیا رپورٹس کے مطابق یہ انسانیت سوز واقعہ منظر عام پر آنے کے بعد سے فیس بک کو زبردست تنقید کا سامنا کرنا پڑرہا ہے، عوامی حلقے اس بات پر شدید نالاں ہیں کہ فیس بک نے اپنے پلیٹ فارم پر اس گھناﺅنے عمل کو روکنے کے لیے کچھ نہیں کیا۔بچوں کے حقوق کی عالمی تنظیم ’پلان انٹرنیشنل‘ کا کہنا ہے کہ 17 سالہ لڑکی کو اس کے والد نے فیس بک پر نیلام کرنے کے لیے ایک ایونٹ منعقد کیا جس میں مختلف لوگوں نے بولیاں لگائیں اور ان میں کچھ حکومتی افسران بھی شامل تھے۔نیلامی میں شامل ہر شخص نے لڑکی کو حاصل کرنے کی کوشش کی اور کچھ نہ کچھ پیشکش کی تاہم لڑکی سے تین گنا زائدعمر کے ایک شخص نے اسے خریدلیا۔ رپورٹس کے مطابق بڑی عمر کے شخص نے 500 گائیں، دو لگڑری کار، 10 ہزار امریکی ڈالر، اسمارٹ فونز اور دیگر مراعات کے عوض اسے خریدا۔انسانی حقوق کی تنظیموں اور فلاحی اداروں نے انسانی نیلامی کے عمل پر شدید تشویش کا اظہار کرتے ہوئے کہا کہ اس طرح کی ریت چل پڑی تو لوگ اپنی بیٹیوں کو نیلام کرنا شروع کردیں گے۔اس نیلامی کے لیے استعمال ہونے والے پلیٹ فارم فیس بک نے وضاحت پیش کی ہے کہ 25 اکتوبر کو یہ پوسٹ لگائی گئی اور جب اس بارے میں معلوم ہوا تو فوری کارروائی کرتے ہوئے اسے نہ صرف ہٹادیا گیا بلکہ اکاﺅنٹ بھی بند کردیا گیا۔

واشنگٹن(ویب ڈیسک) امریکی چیف جسٹس جان رابرٹس نے ڈونلڈ ٹرمپ کی جانب سے سپریم کورٹ کے فیصلے پر تنقید کرنے پر جواب دیتے ہوئے کہا ہے کہ ہمارے پاس کوئی اوباما، ٹرمپ، بش یا کلنٹن جج نہیں۔امریکی صدر ڈونلڈ ٹرمپ اپنے عامیانہ رویے کی وجہ سے پوری دنیا میں جانے جاتے ہیں اور آئے روز متنازع بیانات کی وجہ سے مشکلات کھڑی کردیتے ہیں، اب ڈونلڈ ٹرپ نے اپنے ہی ملک کے چیف جسٹس کو تنقید کا نشانہ بناکر نیا تنازع کھڑا کردیا ہے۔صدر ڈونلڈ ٹرمپ نے امریکی چیف جسٹس کے فیصلے کو تنقید کا نشانہ بنایا جس پر چیف جسٹس جان رابرٹس نے صدر ٹرمپ کو جواب دیتے ہوئے کہا کہ ہمارے ہاں کوئی اوباما، ٹرمپ، بش یا کلنٹن جج نہیں ہے، ہمیں آزاد عدلیہ کا شکریہ اداکرنا چاہیے جب کہ ہمارے ججز برابری کی بنیاد پر فیصلے کرتے ہیں۔صدر ٹرمپ نے سیاسی پناہ کیلیے میکسیکو سے آنے والے تارکین وطن کے داخلے پر پابندی کا حکم دیا تھا جسے امریکا کے چیف جسٹس جان رابرٹس نے کالعدم قراردے دیا تھا، سپریم کورٹ کے فیصلے کے بعد صدر ٹرمپ نے جج کو تنقید کا نشانہ بناتے ہوئے کہا تھا کہ ایک اوباما جج نے پابندی کو کالعدم قرار دیا ہے۔امریکی صدر ڈونلڈ ٹرمپ کا کہنا تھا کہ عدلیہ میں یقیناً اوباما ججز ہیں جن کا نکتہ نظر مختلف ہے، آزاد عدلیہ ہوتی تو بہت اچھا ہوتا، عدلیہ کے فیصلے ملک کوغیر محفوظ بنارہے ہیں جو کہ خطرناک اوراحمقانہ ہے۔