کراچی (شوبز ڈیسک) ٹی وی اداکارہ سونیا حسین کی پہلی بطور ہیروئین فلم آزادی کی ریلیز کی تیاریاں شروع ہوگئیں۔ فلم کی تشہیری مہم کا آغاز 27 مارچ کی شب مقامی سینما میں ٹریلر ریلیز کرکے کیا جائیگا۔ ماضی کے لیجنڈ ہدایتکار پرویز ملک کے بیٹوں نے پرویز ملک فلمز کے تحت پہلی فلم مکمل کرلی جسکی کہانی عمران ملک نے لکھی ہے جو فلم کے ہدایتکار بھی ہیں۔فلم کے قابل ذکر فنکاروں میں معمر رانا، ندیم بیگ ، جاوید شیخ، مریم انصاری ، علی فتح کے نام شامل ہیں۔ مکالمے واجد زبیری نے لکھے جبکہ موسیقار ساحر علی بگا ہیں۔

ممبئی (شوبز ڈیسک)بالی وڈ اداکارہ تبو نے اجے دیوگن کو اپنا بہترین دوست قرار یدیا۔بھارتی ذرائع ابلاغ کے مطابق تبو نے کہاکہ اجے دیوگن ان کے بہترین دوست ہیں،وہ ان سے ہر قسم کی بات شیئر کر سکتی ہیں۔اداکارہ نے کہا کہ اجے دیوگن ایک بہترین انسان ہے جو حقیقی زندگی میں بھی فیملی ،دوستوں اور رشتہ داروں کے لئے کھڑا رہتا ہے اور ان کے لئے وہ کچھ بھی کرسکتا ہے۔اداکارہ تبو نے روہت شیٹھی کی فلم گول مال ریٹرن میں اجے دیو گن کے ساتھ اداکاری کے جوہر دکھائے اور وہ آجکل اپنی نئی فلم مسنگ کی عکسنبدی میں مصروف ہیں جس میں وہ منوج باجپائی کے ساتھ نظر آئیں گی۔

لاہور (شوبزڈیسک) سینئر اداکار قوی خان نے کہا ہے کہ اسٹیج ڈرامے میں رقص کو شامل کر کے اس کے اصل حسن برباد کیا جا رہا ہے،ذرا سوچیں اسٹیج ڈرامے کا جو مقصد تھا کیا آج وہ حاصل ہو رہا ہے اور اس کا جواب یقینانہیں میں ہوگا۔ خصوصی گفتگو کرتے ہوئے سینئر اداکار کا کہنا تھاکہ کون کہنا ہے رقص کے بغیر اسٹیج ڈرامہ نہیں ہو سکتا کیا ماضی میں رقص کے بغیر کامیاب اسٹیج ڈراموں کی مثالیں موجود نہیں ہیں۔” مرزا غالب “ اور ” تعلیم بالغاں “ ایسے لازوال ڈرامے ہیں جس میں رقص کا دور دور تک کوئی نشان نہیں۔ قوی خان نے کہا کہ حکومت بھی اس طرف توجہ دینے کے لئے تیار نظر نہیں آتی حالانکہ یہ معاشرے کی اصلاح کا سستا ترین ذریعہ ہے۔

لاہور(شوبزڈیسک) اداکارہ وماڈل مایا علی نے کہا ہے کہ پاکستانی فلموں کے معیارمیں تبدیلی سے انٹرنیشنل مارکیٹ تک رسائی اب آسان ہورہی ہے۔میڈیاسے گفتگو کرتے ہوئے مایا علی نے کہاکہ ہالی وڈ اوربالی وڈ میں ایسی بے شمارمثالیں موجود ہیں، جن میں نہ توفلم کی پکچرائزیشن پرکروڑوں روپے خرچ ہوئے اورنہ ہی سٹارکاسٹ شامل کی گئی۔ بس فلم کی کہانی اورجدید ٹیکنالوجی سے ایک ایسی فلم بنائی گئی، جس نے ریلیز ہوتے ہی سب کواپنا گرویدہ بنالیا۔مایا نے کہا کہ یہ بحث تو اب دم توڑچکی ہے کہ ایک اچھی اورسپرہٹ فلم بنانے کے لیے کثیرسرمایہ سب سے ضروری ہوتا ہے۔ یہی نہیں اگرہم دنیا بھرمیں بہترین فلمیں قراردی جانے والی فلموں کی فہرست کا جائزہ لیں توان میں اکثریت کی کہانی بہت مضبوط تھی۔

لاہور(شوبزڈیسک) گلوکار ہ سائرہ ارشد نے کہا ہے کہ پاکستان میں گلوکاری کے شعبے کو مضبوط بنانے کیلئے حکومتی سطح پر اقدامات ضروری ہیں کہیں گلوکاری کا شعبہ بھی فلم انڈسٹری جیسی مشکلات کا شکار نہ ہو جائے۔ اپنے ایک انٹرویو کے دوران گلوکار ہ سائرہ ارشد نے کہا کہ اس بات میں کوئی شک نہیں کہ پاکستان میں بڑی تیزی کے ساتھ گلوکاری کے شعبے میں نئے لوگ سامنے آ رہے ہیں جو انتہائی محنت کے ساتھ اپنا نام بھی بنا رہے ہیں لیکن میں سمجھتا ہوں کہ اس شعبے کو مزید مضبوط بنانے کیلئے حکومتی سطح پر کسی اکیڈمی کا قیام اور اس کیلئے فنڈز مختص کرنا بھی ضروری ہے۔