کراچی(بی این پی )قومی کرکٹ سلیکشن کمیٹی کے سربراہ انضمام الحق پی ایس ایل تھری فائنل کے کم درجے کے پاسز ملنے پر برہم ہوگئے۔ انضمام الحق کو نیشنل اسٹیڈیم کے فرسٹ کلاس ٹکٹ پیش کیے گئے جس پر وہ مبینہ طور پر سخت غصہ میں آگئے اور ملنے والے ٹکٹ ٹیبل پر پھینک دیے۔
، ان کا کہنا تھا کہ میں چیف سلیکٹر ہوں اور میرے لیے فرسٹ کلاس انکلوڑر کے ٹکٹ قابل قبول نہیں۔دریں اثنا ایکریڈیشن کارڈکیلیے اشرافیہ،مراعات یافتہ طبقہ اور اعلیٰ حکام کا تانتا لگ گیا، لاہور سے خصوصی طور پر آنے والا بورڈ کا عملہ ہفتے کی شب تک کارڈز بنانے کا کام کرتے رہا۔اس کے ساتھ بھاری تعداد میں جنرل، فرسٹ کلاس، پریمیئر اور وی آئی پی انکلوڑرز کے ٹکٹس بھی تقسیم کیے جانے کا عمل تواتر کے ساتھ جاری رہا، انتہائی اہم ترین شخصیات اور ان کے اہل خانہ کیلیے اسٹیڈیم کی مرکزی عمارت کیساتھ دونوں جانب قائم 15،15 ہوسپیٹلیٹی باکس بھی الاٹ کیے گئے ہیں۔یہ امر اہم ہے کہ مرکزی عمارت میں قائم چیئرمین اے اور بی باکس ناقابل استعمال قرار دیے جانے کے باوجود زیر استعمال رہیں گے۔

کراچی(آئی این پی) پشاور زلمی کے اسپن بالنگ کنسلٹنٹ ثقلین مشتاق کا کہنا ہے کہ کراچی میں پاکستان سپر لیگ (پی ایس ایل) کے فائنل کی تیاریوں میں کراچی والوں نے لاہوریوں کو بھی پیچھے چھوڑ دیا۔

میڈیا سے گفتگو کرتے ہوئے ثقلین مشتاق کا کہنا تھا کہ ان کی ٹیم کو پلے آف مرحلے کے تمام میچز جیتنا تھے اور اس حوالے سے ٹیم پر بہت دباو تھا۔انہوں نے کہا کہ سیکیورٹی کے بغیر کراچی میں سیر و تفریح کی اور وہ کراچی والوں کا پی ایس ایل فائنل کے لیے جوش و خروش دیکھ کر انتہائی خوش ہیں۔انہوں نے کہا کہ کراچی والوں نے پی ایس ایل کی تیاری اور جوش و خروش میں لاہور کو بھی پیچھے چھوڑ دیا۔

دبئی(آئی این پی) پاکستان کیخلاف سیریز کیلئے بھارت سے بھی آوازیں بلند ہونا شروع ہوگئیں۔دبئی میں ایک اسپورٹ مارکیٹنگ کمپنی کی جانب سے خصوصی تقریب کا انعقاد کیا گیا جس میں سابق بھارتی اوپنر وریندرسہواگ اور پاکستان کے شعیب اختر شریک ہوئے، دونوں نے اس بات پراتفاق کیاکہ پاکستان اور بھارت میں باہمی کرکٹ مقابلے شروع ہونے چاہئیں۔سہواگ نے کہاکہ بطور پلیئرز ہم لوگ امید کرتے ہیں کہ پاکستان اور بھارت میں سیریز ہونی چاہیے، اگر یہ دونوں ممالک میں نہیں ہوسکتی تو پھر اسے کسی اور جگہ منعقد ہونا چاہیے، چیمپئنز ٹرافی میں دو مرتبہ پاک بھارت ٹیمیں ایک دوسرے کے آمنے سامنے آئیں اور دونوں ہی مرتبہ نہ صرف اسٹیڈیم کھچا کھچ بھرا ہوا تھا بلکہ کروڑوں ناظرین ٹی وی پر ان میچز سے لطف اندوز ہوئے۔سابق اوپنر کا کہنا تھا کہ اگر روایتی حریفوں میں مقابلے جاری رہتے ہیں تو یہ خود کرکٹ کیلیے بہت اچھا ہوگا، انھوں نے آئندہ برس انگلینڈ میں ہی شیڈول ورلڈ کپ کیلیے اپنی ٹیم کو فیورٹ قرار دیا۔دوسری جانب شعیب اختر نے کہاکہ پڑوسی ممالک میں سیریز نہ ہونے پر میں کافی مایوس اور مجھے نئی نسل سے ہمدردی ہے جو سنسنی خیز میچز سے محروم ہیں، مگر یہ دنیا ایسی ہی ہے اور ہم اس میں رہتے ہوئے کچھ کرنہیں سکتے ہیں، مجھے امید ہے کہ ایک دن دونوں ممالک کے تعلقات بہتر ہوں گے اور ہم ایک دوسرے کے خلاف کھیل پائیں گے، ہمارے بھی کھلاڑی آئی پی ایل کا حصہ بنیں گے اور وہاں کے پلیئرز پی ایس ایل کھیلنے آئیں گے، یہ دونوں ہی ممالک کے لیے بہترین صورتحال ہوگی۔

لاہور(آئی این پی) ویسٹ انڈیز کے خلاف تین ٹی ٹوئنٹی میچز پر مشتمل سیریز کےلئے قومی ٹیم کا اعلان اگلے دو روز میں کیا جائے گا۔ذرائع کے مطابق چیف سلیکٹر انضمام الحق نے ہیڈ کوچ مکی آرتھر سے مشاورت مکمل کرلی جس کے بعد ویسٹ انڈیز کے خلاف قومی ٹیم کا اعلان کیا جائے گا۔یاد رہے کہ پاکستان اور ویسٹ انڈیز کے درمیان ٹی ٹوئنٹی سیریز کراچی میں کھیلی جائے گی جس کا آغاز یکم اپریل سے ہوگا۔ذرائع کا کہنا ہے کہ کپتان سرفراز احمد سے مشاورت مکمل کرنے کے بعد ٹیم کا اعلان کیا جائے گا اور آئندہ دو روز میں قومی ٹیم کا اعلان متوقع ہے۔ ذرائع کے مطابق ویسٹ انڈیز کے خلاف سیریز میں نوجوان کھلاڑیوں کو ہی موقع دینے پر اتفاق کیا گیا، سابق کپتان محمد حفیظ، عمر امین، عامر یامین اور حارث سہیل کی ٹیم میں جگہ برقرار رکھنا مشکل ہے ۔ذرائع کا کہنا ہے کہ آل راﺅنڈر رومان رئیس کی فٹنس مسائل کے باعث ٹیم میں شمولیت کا امکان نہیں ہے۔

دہلی (آئی این پی) کپتان ویرات کوہلی نے انگلینڈ میں اپنا سابقہ مایوس کن ریکارڈ بہتر بنانے کیلئے نئی حکمت عملی اختیار کرلی ہے جنہوںنے دورہ انگلینڈ سے قبل وہاں رواں موسم گرما میں کاﺅنٹی کرکٹ کھیلنے کا فیصلہ کرلیاہے ۔اور بی سی سی آئی نے بھارتی ٹیم کے دورہ انگلینڈکے پیش نظر ویرات کوہلی کو کاﺅنٹی کھیلنے کی اجازت بھی دیدی ہے۔کوہلی کے کاﺅنٹی کھیلنے کی صورت میں بھارتی ٹیم جون میں بنگلورمیں افغانستان کے پہلے ٹیسٹ میچ میں کوہلی کی خدمات سے محروم رہے گی۔واضح رہے کہ اس سے قبل سرے کاﺅنٹی کی درخواست پر بی سی سی آئی نے ویرات کوہلی کو ریلیز کرنے سے معذرت کرلی تھی کیونکہ بھارتی ٹیم نے جون میں افغانستان کے خلاف ٹیسٹ میچ کے علاوہ آئرلینڈکے خلاف ٹی ٹوئنٹی سیریز بھی کھیلنا ہے۔واضح رہے کہ ویرات کوہلی اس بار انگلینڈمیں اپنا ریکارڈ بہتر بنانے کیلئے دورے سے قبل ہی وہاں کی کنڈیشنز سے ہم آہنگ ہونا چاہتے ہیں کیونکہ 2014 کا گزشتہ ٹوران کیلئے بھیانک خواب ثابت ہواتھا جس میں وہ 13.40رنز فی اننگزکی کمتر اوسط سے صرف134رنزبناسکے تھے جس میں ان کا بیسٹ اسکور محض39رنزتھا۔اس ٹورمیں بھارت کو 3-1کے مارجن سے شکست کا بھی سامناکرنا پڑاتھا۔

کراچی (آئی این پی) پاکستان سپر لیگ تھری کی فائنلسٹ ٹیم پشاور زلمی کے ڈیرن سیمی اور کراچی کنگز کے شاہد آفریدی کے درمیان سوشل میڈیا پر دلچسپ مکالمہ ہوا ہے ۔ ڈیرن سیمی نے پریس کانفرنس میں شاہد آفریدی کو پاکستان کا بڑا اسٹار قرار دیا تھا، جس پر شاہد آفریدی نے ان کا شکریہ ادا کیا۔
شاہد آفریدی کا مزید کہناتھاکہ اپنے بارے میں آپ کے خیالات اور پاکستان میں کرکٹ کے فروغ کیلئے اقدام کو سراہتا ہوں۔انہوں نے یہ بھی کہا کہ میں فائنل میں آپ کی ٹیم کے لئے نیک خواہشات کا اظہار کرتا ہوں ۔آفریدی کے بیان پر ڈیرن سیمی پہلے ان کے خیالات کا شکریہ ادا کیا اور پھر کہا کہ شاہد آفریدی آپ لوگوں کے چیمپئن ہیں اور رہیں گے،آپ نے مجھے ہمیشہ سپورٹ کیا۔