لاہور (کرائم رپورٹر) آزادی کپ سکیورٹی تیاریاں، قذافی سٹیڈیم میں کرکٹ ٹیموں کی پریکٹس کے باعث پورا لاہور 8 گھنٹے تک جام رہا۔ لیڈی ہیلتھ ورکرز احتجاج اور انتخابی مہم، صوبائی دارالحکومت پورا دن مفلوج ہو کر رہ گیا ، شہر کی تمام مین اور اہم شاہراﺅں پر ٹریفک کا شدید دباﺅ ، گاڑیوں کی لمبی لائنیں لگی رہیں ، ایمبولینسز ، فائر بریگیڈ اور پولیس سمیت دیگر ریسکیو اور امدادی ٹیموں کی گاڑیاں بھی ٹریفک جام میں پھنسی رہیں،بارہا کوششو ں کے باوجود ٹریفک پولیس ٹریفک کی روانگی کو یقینی نہ بنا سکی ، لیڈی ہیلتھ ورکرز اور انتخابی جلسوں کے اختتام کے بعدسڑکوں پر خوار ہونے والے شہریوں کے رات گئے اپنی اپنی منزل مقصود پرپہنچنے کے بعد ٹریف بہاﺅ بہتر ہوا ۔ بتایا گیا ہے کہ جہاں شہر میں آزادی کپ کی تیاری کیلئے شہر کی چند ایک شاہرائیں سکیورٹی خدشات کی بناءپر عارضی طور پر بند ہیں وہیں لیڈی ہیلتھ ورکرز کی جانب سے مال روڈ بلاک کرکے احتجاج کرنے اور سیاسی جماعتوں کی انتخابی مہم کی وجہ سے منعقد ہونے والے جلسے ا ور جلوسوں کی وجہ سے گزشتہ روز صوبائی دارالحکومت میں ٹریفک کا نظام درہم برہم رہا اور پورے شہرمیں بد ترین ٹریفک جام رہا ۔ٹریفک کے شدید دباﺅ کی وجہ سے مسلسل کئی گھنٹوں تک بلاک رہنے والی شاہراﺅں میں مال روڈ ، جیل روڈ ، فیروز پور روڈ ، لٹن روڈ ، بہاولپور روڈ ، اپر مال ، کینال روڈ ، گلبرگ مین بلیوارڈ ، وحدت روڈ ، شاہرا قائداعظم، سرکلر روڈ ، چائنہ چوک ، شادمان چوک ، ڈیوس روڈ ، بیڈن روڈ ، ریگل چوک ، شملہ پہاڑی چوک ، ایبٹ روڈ ، بوہڑ والا چوک ، گڑھی شاہو چوک ، موج دریا روڈ اور جین مندر چوک سمیت دیگر ملحقہ علاقو ں میں اس قدر بدترین ٹریفک جام رہی کہ ٹریفک میں پھنسے شہری سڑکوں پر اپنی گاڑیاں اور موٹر سائیکلیں بند کرکے ٹریفک بحال ہونے کا انتظار کرتے رہے ۔ اس موقع پر شہر میں پھنسی ہوتی ٹریفک کو بحال کرنے کیلئے ٹریفک پولیس کے تمام اقدامات بے سود ثابت ہوئے اور تمام تر تدبیروں کے باوجود سٹی ٹریفک پولیس ٹریفک بحال نہ کرسکی ۔ٹریفک جام میں پھنسے رہنے کی وجہ سے سکول ، کالجز اور دیگر تعلیمی اداروں میں حصول تعلیم کیلئے آنیوالے بچے بھی دوپہر کو چھٹی ہونے کے بعد شام کو اپنے گھروں کو پہنچے جس پر انکے والدین پریشنانی کے عالم میں سکو ل کالجز اور دیگر تعلیمی اداروں کی انتظامیہ ، سکول بس اور وین والوں سے خیریت دریافت کرتے رہے جبکہ اپنے طور پر اربن ٹرانسپورٹ پر سفر کرنے والے وہ طلبہ و طالبہ جن کے پاس موبائل نہیں تھے ان کے والدین پورا دن پریشانی کے عالم میں اپنے بچوں کی راہ تکتے رہے ۔ تعلیمی اداروں کے بچوں کے علاوہ فائر بریگیڈ ، ایمبولینسز ، جیل قیدیوں کی بسیں، پولیس کی گاڑیاں ، ڈولفن اور پی آ ر یو سکواڈ ،اور دیگر امدادی ٹیمیں بھی ٹریفک جام میں کئی گھنٹے پھنسی رہیں۔ سارا دن سٹی ٹریفک پولیس کی جانب سے ہر قسم کا جتن کرنے کے بعد بھی ٹریفک کا نظام معمول پر نہیں آسکا تاہم لیڈی ہیلتھ ورکرز کے ساتھ مزاکرات کے بعد ان کا احتجاج ختم ہونے اور سیاسی جماعتوں کے انتخابی جلسوں کے اختتام کے بعدسڑکوں پر خوار ہونے والے شہریوں کے رات گئے اپنی اپنی منزل مقصود پرپہنچنے کے بعد ٹریف کا بہاﺅ معمول پر آیا ۔ جیل روڈ پر ٹریفک جام کی وجہ سے سروسز ہسپتال ، کارڈیالوجی (دل ہسپتال)، کوئنز روڈ ،ٹیمپل روڈ اور لارنس روڈ وغیرہ بلاک ہونے کی وجہ سے گنگا رام ہسپتال ، شاہراءقائد اعظم ، سرکلر روڈ ، آﺅٹ فال روڈ اور راوی روڈ پر ٹریفک جام ہونے کی وجہ سے میو ہسپتال ، کینال روڈ پر ٹریفک کا شدید دباﺅ ہونے کی وجہ سے جناح ہسپتال اور ڈاکٹرز ہسپتال جبکہ فیروز پور روڈ پر ٹریفک کا نظام درہم برہم ہونے کے باعث جنرل ہسپتال میں مریضوں کو لانے اور لیجانے کے حوالے سے شدید پریشانی کا سامنا رہا اور متعد د مریضوں کی حالتیں انتہائی تشویشناک ہو گئیں جس پر ورثاءکی جانب سے ٹریفک جام اور اس کا سد باب نہ کرےنے پر ٹریفک پولیس کو شدید تنقید کا نشانہ بنایا جاتارہا ۔ ٹریفک جام کے حوالے سے پولیس حکام کا کہنا تھا کہ آزادی کپ کی سکیورٹی تیاریوںکیلئے مختلف شاہراﺅں کو بند کیا گیا تھا جس کے کیلئے متبادل ڈائیورشن پوائنٹ بنائے گئے تھے جس سے ٹریفک کا نظام قطعی طور پر درہم برہم نہیں ہوسکتا تھا۔ فیروز پور روڈ پر واقع قذافی سٹیڈیم میں ورلڈ الیون اور قومی کرکٹ ٹیم کے درمیان میچز کی سکیورٹی فول پروف بنانے کےلئے راستے بند ہونے کی وجہ سے بھی ٹریفک کا نظام شدید متاثر ہوا۔ مال روڈ، ایمپریس روڈ، شملہ روڈ، ڈیوس روڈ، شملہ پہاڑی، ٹیمپل روڈ، فیروز پور روڈ، قرطبہ چوک، غوث الاعظم روڈ، لبرٹی مارکیٹ، کینال روڈ سمیت علاقوں میں سڑکوں پر شدید ٹریفک جام ہونے سے گاڑیوں کی لمبی قطاریں لگی رہیں جبکہ کئی مقامات پر شہری ایک دوسرے سے الجھتے رہے۔ اس موقع پر سی ٹی او لاہور کیپٹن(ر) رائے اعجاز احمد نے کہا کہ ورکنگ ڈیز میں میچز ہونے کی وجہ سے شہر میں ٹریفک کا دباﺅ زیادہ ہو گیا ہے۔ ٹریفک دباﺅ کم کرنے کےلئے شہر بھر میں ٹریفک وارڈنز کی ٹیمیں تشکیل دے دی گئی ہیں جو ٹریفک کی روانگی کو بہتر بنانے میں مصروف ہیں۔

لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل پروگرام ”ضیا شاہد کے ساتھ“ میں گفتگو کرتے ہوئے معروف صحافی و تجزیہ کار ضیا شاہد نے کہا ہے کہ صدر، وزیراعظم، وزراءاعلیٰ اور اہم شخصیات کی جانب سے آنے والے پیغامات پی آر او بناتا ہے پھر دیگر افسران دیکھ لیتے ہیں اس کے بعد محترم سائن (دستخط) کر دیتے ہیں۔ پاکستان کے صف اول کے اخباروں کے مضامین ہر چند سال بعد دہرا دیئے جاتے ہیں۔ اہم لکھنے والے نسیم حجازی اپنے مضامین خود لکھتے تھے اور پھر اس پر دستخط کرتے تھے۔ دوسرے حمید نظامی (مرحوم) اپنے مضامین و ایڈیٹوریل خود مرتب کرتے تھے۔ آج کے ایڈیشن زیادہ تر پرانے ہوتے ہیں۔ یہی حال ہمارے علماءکرام کا ہے۔ خلفائے راشدین و دیگر مذہبی تہواروں پر ان کے نام سے چھپنے والے تمام مضامین اور ایڈیشن لکھے لکھائے ہوتے ہیں اور وہ اس سے قبل دس دس مرتبہ چھپ چکے ہوتے ہیں۔ صرف نام تبدیل کر کے دوبارہ چھاپ دیئے جاتے ہیں۔ خدارا ایڈیٹر صاحبان تو ان مضامین کو خود پڑھ لیا کریں۔آزاد کشمیر کے ایک وزیراعظم گزرے ہیں عبدالحمید خان وہ لندن گئے ہوئے تھے۔ ایک ہی وقت میں ان کا بیان لندن سے اور ریڈیو پاکستان آزاد کشمیر (تراڑ کھل) سے نشر ہوا۔ موصوف ایک ہی دن لندن میں اخبار والوں سے بات بھی کر رہے تھے اور آزاد کشمیر میں خطاب بھی کر رہے تھے ہم لوگ ایک فراڈ قسم کا کھیل کھیلتے ہیں۔ سارے ہی جھوٹ بولتے، لکھتے اور سنتے ہیں۔ قائداعظم کے فرمودات پر میں نے ایک کتاب لکھا۔ قائد کے ہر تیسرے چوتھے فرمان کو پڑھ کر میں رونے ولا ہو جاتا ہوں۔ اخبار فروش لیڈر چوہدری نذیر صاحب کو سلیوٹ کرتا ہوں۔ جنہوں نے تمام اخبارات میں ایک سیاسی امیدوار کی پمفلٹ تقسیم کئے۔ بھائی خدارا تمام امیدواروں کے پمفلٹ اسی طرح بانٹا کرو۔ ان سے پوچھو تو وہ قبول نہیں کرتے کہ ہم نے یہ پمفلٹ نہیں رکھا۔ 9/11 کے واقعہ کو رونما ہوئے عرصہ گزر گیا۔ شروع میں تو سارا ملبہ پاکستان پر ڈالا گیا۔ بعد میں پتہ چلا کہ وہاں مرنے والے لوگوں میں مسلمانوں کا تعلق سعودی عرب سے تھا۔ امریکہ، سپر پاور ہے ہر کسی کو کہتا ہے ”ڈومور“ 9/11 کے بعد ہزارہا مضامین لکھے جا چکے ہیں لیکن ایک بھی تحقیقاتی رپورٹ، تصدیق شدہ منظر عام پر نہیں آئی۔ برائے مہربانی بتاﺅ تو سہی اس واقعہ کے پیچھے کون تھا۔ کس کو پکڑا گیا۔ کن کن کو سزا ملی۔ ان کے سہولت کار کون تھے۔ ان کے پیچھے کون لوگ تھے۔ پہلے ہم نے بلاول کی تعریف کی آج مریم نواز کو کہنا چاہتا ہوں کہ وہ اچھا بولتی ہیں۔ گھن گرج سے بولتی ہیں۔ یہ تو سچ ہے کہ ان کا موازنہ بینظیر بھٹو سے نہیں لیکن وہ ایک ابھرتی ہوئی پُرجوش سیاستدان ہیں۔ مریم بی بی حلقہ 120 کی انتخابی مہم میں تمام ہی تقاریر ایک جیسی ہوتی ہیں۔ ”مجھے کیوں نکالا؟“ ”پانامہ سے اقامہ“ ”شیر کا ساتھ دو گے ووٹ دو گے“ کے علاوہ اس میں کوئی نئی بات نہیں ہوتی۔ ہمارے چینل نے تمام دن کوریج کی ہے۔ مختلف سمتوں میں ہماری تین ٹیموں نے کوریج کی اور رپورٹ مرتب کی ہے۔ اس کے مطابق تو حلقہ این اے 120 میں مریم نواز سب سے نمبر ون رہی ہے اس کا مقابلہ کسی نے نہیں کیا۔ سب ان سے پیچھے رہ گئے ہیں پسند نہ پسند اپنی جگہ لیکن سچ یہ ہے کہ انتخابی مہم کا معرکہ مریم نواز نے جیت لیا ہے۔ لوگوں کا خیال تھا کہ نمبر2 یاسمین راشد، نمبر3 پی پی پی کے ممبر ہوں گے لیکن عجیب بات یہ ہے کہ جماعت اسلامی، جماعت الدعوة، ملی مسلم لیگ نے اتنی زبردست مہم چلائی ہے کہ سب حیران ہو گئے ہیں۔ یعقوب صاحب تو سب کو خاموشی کا درس دیتے ہوئے کہہ رہے ہیں کہ اس دن جا کر ہمیں ووٹ ڈال دینا شور نہ کریں ورنہ خرید لئے جاﺅ گے یہ مذہبی جماعتیں 10 سے 15 ہزار تک ووٹ مسلم لیگ (ن) کا ضرور توڑ لیں گی۔ تحریک انصاف کے موٹے موٹے لوگ یاسمین راشد کی سپورٹ نہیں کر رہے زمینی حقائق کے حساب سے یاسمین راشد نے ڈور ٹو ڈور مہم سب سے اچھی چلائی ہے۔ جماعت اسلامی کے سیاسی یتیم کے پیچھے ایک بھی بڑا بندہ نہیں آیا۔ بلال گنج کے 75 سالہ بابے کی بات ضرور کروں گا جس نے نڈر ہو کر کہا ”کاکا پاکستان وچ ایکو الیکشن فیئر اینڈ فری ہوئے او 1970ءدے سن“ وجہ اے سی یحییٰ خان نے الیکشن سی، تے اودھی پارٹی کوئی نئیں سی۔ نہ پولیس نوں انٹرسٹ سی کہہ کینوں جتوانا اے۔ لوکی بھٹو دے نال سن تے اناں گھج وس کے ووٹ دیئے تھے۔ 1970ءتوں بعد آج تک جنہیں الیکشن ہوئے اوتھے پولیس، بدمعاش تے کن ٹوٹے ووٹ پواندے نئیں۔ یا ٹوری دواندے سَن۔ کاکا لہور وچ الیکشن اینج ای ہوندے نئیں۔ پولیس آلے کہندے نیں ایتھے رہناں اے یا نئیں۔ ٹولیاں وچ ووٹ پواندے نئیں۔“ حلقہ این اے 120 میں کلثوم نواز کو سب سے زیادہ برتری حاصل ہے وہ وزیراعظم کی بیوی ہیں۔ اس وقت بیمار ہیں۔ ہمدردی کا ووٹ بھی ہے۔ مریم نواز ان کی مہم چلا رہی ہیں۔ اگلی وزیراعظم بھی انہیں کہا جا رہا ہے۔ یہ بہت بڑے فیکٹر ہوا کرتے ہیں۔ حلقے میں دو ایم پی اے، اور تمام بلدیاتی سسٹم ان کے پاس ہے۔ آج کل وزیراعظم شاہد خاقان عباسی بھی ان کے وزیراعظم ہیں۔ ملک میں ان کی پارٹی کی حکومت ہے۔ کوئی بھی ہارنے والوں کو ووٹ دینا پسند نہیں کرتا۔ لوگوں کی خواہش ہوتی ہے کہ پاور فل کو ووٹ دیا جائے ان سے نوکریا لینی ہیں۔ داخلے کروانے ہیں یا سڑکیں ٹھیک کروانی ہیں۔ کلثوم نواز کا پلڑا سب سے بھاری ہے۔ چیف رپورٹر خبریں طلال اشتیاق نے کہا ہے کہ حلقہ این اے 120 کے تمام علاقوں کا دورہ کرنے کے بعد لوگوں کی رائے لی تھی کہ ان کے حلقے میں 30 سال میں کوئی کام نہیں ہوا۔ سڑکیں ٹوٹی ہوئی تھیں۔ گندا پانی پھیلا ہوا تھا۔ ملی مسلم لیگ، منظم پارٹی مہم چلا رہی ہے۔ یہ (ن) لیگ اور پی پی پی کے علاوہ تحریک انصاف کے ووٹ بھی توڑے گی۔ شہزادہ امبر سوشل میڈیا پر الیکشن مہم چلا رہے ہیں۔ کل 31 امیدوار میدان میں ہیں۔ حلقے میں سب سے زیادہ انتخابی دفاتر مسلم لیگ (ن) کے ہیں دوسرے نمبر پر تحریک انصاف کے تیسرے نمبر پر ملی مسلم لیگ کے اور چوتھے نمبر پر جماعت اسلامی کے جبکہ پی پی پی کے رکن کا کہیں بھی زور شور نظر نہیں آ رہا۔ پی پی پی کا دور دور شہرہ نہیں ہے۔