لاہور (اپنے سٹاف رپورٹر سے) وزےراعلیٰ پنجاب محمد شہبازشرےف نے لندن سے سول سیکرٹریٹ لاہور میں 3گھنٹے طویل ویڈیوکانفرنس کی،جس میں آزادی کپ 2017اور ورلڈ الیون کے دورہ لاہور کے دوران سکیورٹی اوردیگر انتظامات کا جائزہ لیا گیا۔ وزیراعلی محمد شہباز شریف نے ویڈیوکانفر نس سے خطاب کرتے ہوئے کہا کہ ورلڈ الیون کے بین الاقوامی کھلاڑیوں کو پاکستان آمد پر دل کی اتھاہ گہرائیوں سے خوش آمدید کہتے ہیں۔ انہوںنے کہاکہ ورلڈ الیون او رپاکستان الیون کے میں میچوں کا لاہو رمیں انعقاد بڑا ایونٹ ہے اور آپ سب نے مل کر اس ایونٹ کو کامیاب بنانے کے لئے دن رات محنت کرنا ہے۔سکیورٹی آپ کی نمبرون ترجیح ہے اور آپ سب نے مل کر اس کو فول پروف بنانا ہے۔وزیراعلی نے ہدایت کی کہ ورلڈ الیون کے دورہ لاہور کے دوران سکیورٹی اور دیگرانتظامات خوب سے خوب تر ہونے چاہئیں اورورلڈ الیون کے میچوں کی سکیورٹی اوردیگر انتظامات پی ایس ایل فائنل سے بڑھ کر ہوں تاکہ شائقین کرکٹ کو اچھا کھیل دیکھنے کو ملے۔انہوںنے کہا کہ پرامن اور پرسکون ماحول میں میچوں کا انعقاد یقینی بنایا جائے گا ۔یہ پاکستان کی عزت کا معاملہ ہے ، اس پر حرف نہیں آنے دیں گے۔متعلقہ ادارے او رمحکمے آپس میں قریبی رابطہ رکھتے ہوئے فرائض سرانجام دیں اورکابینہ کمیٹی برائے ا من وامان سکیورٹی اور دیگر انتظا مات کا باقاعدگی سے جائزہ لے۔وزیراعلی نے ہدایت کی کہ ٹریفک پلان اور متبادل راستوں کے حوالے سے کئے گئے انتظامات کے بارے میں عوام کو بھرپور آگاہی دی جائے۔ میچوں کے دوران کھلاڑیوں کی سٹیڈیم آمد او رروانگی کے حوالے سے کثیر الجہتی حکمت عملی اختیار کی جائے اورسکیورٹی کے لئے وضع کردہ پلان پر من وعن عملدرآمد یقینی بنایا جائے۔انہوںنے کہاکہ میچوں اور دیگر مقامات پر فرائض سرانجام دینے و الی پولیس فورس اور دیگر عملے کےلئے کھانے پینے کا بہترین انتظام ہونا چاہیئے۔اس ضمن میں کسی قسم کی شکایت ملی تو متعلقہ حکام کے خلاف سخت ایکشن لوں گا۔ میچوں کے دوران داخلی وخارجی راستوں پر بلا تعطل بجلی کی فراہمی یقینی بنائی جائے۔روٹ کو بھی برقی قمقموں سے روشن کیا جائے ۔انہوںنے کہاکہ شائقین کرکٹ کو پارکنگ سے سٹیڈیم تک لانے او رلے جانے کے لئے مفت شٹل سروس چلائی جائے گی۔وزیراعلی نے ہدایت کی کہ سٹیڈیم کے اندر اور باہر صفائی کے بہترین انتظامات ہونے چاہئیں ۔ کارپارکنگ میں ڈرائیور حضرات کے لئے منرل واٹر ،چائے ، بسکٹ کا خصوصی انتظام کیا جائے اور سٹیڈیم کے اندر واش رومز کی صفائی پر بھی خصوصی توجہ دی جائے۔ وزےراعلیٰ پنجاب نے سرگودھا میں خاتون اسسٹنٹ کمشنر کو آفس میں بند کرنے کے واقعہ کا نوٹس لیتے ہوئے تحقیقات کا حکم دے دیا ہے۔وزیراعلیٰ نے ہدایت کی کہ واقعہ کی ہر پہلو سے تحقیقات کر کے رپورٹ پیش کی جائے اور ذمہ داروں کے خلاف کارروائی کی جائے۔ وزیر اعلیٰ پنجاب نے سینئر سیاستدان و سابق رکن قومی اسمبلی رانا تاج احمد نون کے انتقال پر افسوس کا اظہار کیا ہے۔ تعزیتی پیغام میں سوگوار خاندان سے تعزیت کا اظہار کیا۔
شہباز شریف

اسلام آباد (خصوصی رپورٹ)ڈرگ ریگولیٹری اتھارٹی پاکستان نے 8000 سے زائد ادویات کی قیمتوں میں اضافے کی سفارش کردی ہے،ادویات کی قیمتوں میں اضافہ کی حالیہ تجویز وزارت قومی صحت کو ارسال کی جائے گی۔ڈر گ ریگولیٹری اتھارٹی پاکستان کی پرائس کنٹرول کمیٹی کی23ویں میٹنگ میں ادویات کی قیمتوں میں اضافہ کا جائزہ لیا گیا۔ڈریپ کی پرائس کنٹرول کمیٹی نے شیڈول ادویات کی قیمتوں میں 2.08 فیصد نان شیڈول ادویات کی قیمتوں میں 2.91 فیصد اور کم قیمت ادویات کی قیمتوں میں 4.16 فیصد اضافہ کی تجویز دی ہے۔ ادویات کی قیمتوں میں اضافہ کی حتمی منظوری وفاقی کابینہ دے گی۔ڈریپ نے ہیپاٹائٹس کی دوا ڈیکلا سوفو کی درآمد کےلئے بھی سولہ کمپنیوں کو اجازت دے دی ہے، جب کہ ڈیکلا سوفو کی قیمت فی پیکٹ 29 ہزار روپے مقرر کی گئی ۔

لاہور (اپنے سٹاف رپورٹر سے)سابق وزیراعظم میاں محمد نواز شریف کی صاحبزادی اور مسلم لیگ (ن) کی مرکزی رہنما مریم نواز نے کہا ہے کہ نواز شریف کی نا اہلی کے بعد سٹاک مارکیٹ زمین پر آنے لگی،پاکستان کی ترقی اور نواز شریف کا رشتہ گہرا ہے،پاکستان کو ضرورت ہے نواز شریف کی ، جب نواز شریف اقتدار میں نہیں ہوتا تو پاکستان کو دہشت گردی اور لوڈشیڈنگ کا تحفہ ملتا ہے، نواز شریف کواقتدار کے ایوان سے نکال دو مگر دلوں سے کیسے نکالوگے،لاہور نے سازشیوں ،مہروں اور سازشوں کی سیاست کرنے والوں کو مسترد کر دیا ہے،اگر نواز شریف نے کوئی کام نہیں کیا توایک سال انتظار کر لیتے،پانامہ ،اقامہ، تنخواہ سب بہانہ ہے، نواز شریف نشانہ ہے،بات نہ کرپشن کی ہے اور نہ ہی پانامہ کی، بات صرف یہ ہے کہ 2018میں پاکستان مسلم لیگ (ن) اور نواز شریف کی فتح نظر آ رہی ہے،عمران خان نے کہا کہ شکر ہے ہمیں 2013میں حکومت نہیں ملی، اگر ملی ہوتی تو پاکستان کو وہی حال ہوتا جو خیبرپختونخوا کا ہوا ہے،میری حسرت ہے کہ ایک دفعہ میدان میں آکر نواز شریف کا مقابلہ کرو، کبھی انگلی، کبھی الیکشن کمیشن اور کبھی عدلیہ کے پیچھے چھپتے ہو، اپنا کیا ہے تمہارا، نواز شریف نے 11000میگاواٹ بجلی سسٹم میں لائی، الزامات میں سچائی تھی تو اقامہ کا سہارا کیوں لینا پڑا، پاکستانی تاریخ کا یہ پہلا مقدمہ ہے جس میں چار مرتبہ فیصلہ آ چکا ہے، انہوں نے کہا کہ جب نواز شریف کو نا اہل کر دیا گیا تو سٹاک مارکیٹ زمین پر آنے لگی،پاکستان کو ضرورت ہے نواز شریف کی ، پاکستان کی ترقی اور نواز شریف کا رشتہ گہرا ہے، نواز شریف کو ایوان سے نکال دو مگر دلوں سے کیسے نکالوگے۔ انہوں نے کہا کہ جب نواز شریف اقتدار میں نہیں ہوتا تو پاکستان کو دہشت گردی کا تحفہ ملتا ہے، لوشیڈنگ کے اندھیرے ملتے ہیں،70سالوں میں ملک میں اتنی بجلی پیدا نہیں کی گئی ،نواز شریف نے 11000میگاواٹ بجلی سسٹم میں لائی، آج سڑکیں بن رہی ہیں، گیس کی لوڈشیڈنگ دور ہو رہی ہے۔ مریم نواز نے کہا کہ جب سے نواز شریف نے اقتدار سنبھالا تو کبھی دھاندلی، کبھی دھرنے اور کبھی پانامہ آ جاتا ہے اور نا اہلی اقامہ پر ہوتی ہے، لاہور نے سازشیوں کو مسترد کر دیا، مہروں کو مسترد کر دیا اور سازشوں کی سیاست کرنے والوں کو مسترد کر دیا ہے،لاہور سے شروع کی جانے والی سازشوں کو لاہوریوں نے دفن کر دیا،ان مہروں کو سمجھ نہیں آرہی کہ پاکستان بدل رہا ہے،اب پانامہ، اقامہ کی سیاست اور دھرنوں کی سیاست نہیں چلے گی۔ مریم نواز نے کہا کہ عمران خان نے کہا کہ شکر ہے ہمیں 2013میں حکومت نہیں ملی، اگر ملی ہوتی تو پاکستان کو وہی حال ہوتا جو خیبرپختونخوا کا ہوا ہے، لاہور سے باہر جا کر لاہور کی ترقی کو گالیاں کیوں دیتے ہیں، پولیس کو گالیاں کیوں دیتے ہیں اور پھر لاہور میں آ کر کس منہ سے ووٹ مانگتے ہیں۔

لاہور(صباح نیوز) اسپیکر قومی اسمبلی ایاز صادق نے کہاہے کہ نوازشریف کے خلاف فیصلے کی ایک سال قبل ہی پیشگی اطلاع تھی تاہم ہم سپریم کورٹ کے فیصلے کو مانتے ضرور ہیں لیکن اتفاق نہیں کرتے۔ میڈیا سے بات کرتے ہوئے اسپیکر قومی اسمبلی کا کہنا تھا کہ ہماری خواہش ہے کہ کوئی ایسا قدم نہ اٹھایا جائے جس سے ملک کا نقصان ہو لیکن یہاں ہر کوئی ڈیڑھ اینٹ کی مسجد بنانے میں مصروف عمل ہے، اداروں میں کچھ لوگوں کی وجہ سے مسائل پیدا ہوتے ہیں اور اگر ادارے اپنی حدود سے باہر نکلیں تو نقصان پاکستان کا ہوگا، ملکی استحکام کے لیے ضروری ہے کہ ادارے اپنی حدود میں رہ کر کام کریں۔ایاز صادق کا کہنا تھا کہ پاناما کیس میں سپریم کورٹ کے فیصلے سے ایک سال قبل ہی آگاہ تھے، ہمیں امید تھی کہ فیصلہ نوازشریف کے خلاف ہی آئے گا تاہم ہم نے فیصلے کو من وعن قبول کیا لیکن اس فیصلے سے اتفاق نہیں کرتے، نیب نے بھی جے آئی ٹی رپورٹ پر ریفرنسز دائر کئے ہیں ابھی کیس چلے گا اور دیکھا جائے گا اور 12 ستمبرکو ہونے والی سماعت میں اچھے نتائج کی توقع ہے۔سپیکرنے کہا کہ نوازشریف کی نااہلی کے بعد شریف خاندان کے لئے مشکل حالات پیدا ہوئے تاہم مریم نواز اور ان کی والدہ نے کٹھن حالات میں سیاسی سفر کا آغاز کیا، این اے 120 میں کامیابی کلثوم نوازکی منتظر ہے، ہمیں نوازشریف کا ہرفیصلہ قبول ہے اور وہ جسے قائد بنائیں گے وہی ہمارا قائد ہوگا۔ انہوں نے کہا ہے کہ ہماری خواہش ہے کہ کوئی ایسا قدم نہ اٹھایا جائے جس سے ملک کا نقصان ہو۔ 12ستمبر کو کیس کی سماعت ہے انشاءاللہ اچھے نتائج آئیں گے مریم نواز مشکل حالات میں سیاست میں آئی ہیں ان میں سیاسی پختگی آجائے گی۔ نوازشریف جسے قائد بنائیں گے وہ ہمارا قائد ہوگا۔ انہوں نے کہا کہ دہشتگردی کیخلاف ہمیشہ گلی محلے میں بھی چوکنا رہنا ہوگا۔ دہشتگردی کے خلاف پوری قوم نے قربانیاں دی ہیں جوانوں نے جانوں کے نذرانے دیئے قوم کا اربوں روپے کا نقصان ہوگیا۔ خواش ہے کہ کوئی ایسا قدم نہ اٹھایا جائے جس سے ملک کا نقصان ہو۔ ایاز صادق نے کہا کہ ڈونلڈ ٹرمپ نے پاکستان کے خلاف بیان دیا تو پوری قوم نے متحد ہوکر اس پر ردعمل دیا وزیر خارجہ خواجہ آصف کے ہاﺅس ان آرڈر کرنے کا مقصد عالمی سطح پر رابطوں کا تھا۔ انہوں نے کہا کہ مسلم لیگ ن کی حکومت نے گزشتہ الیکشن میں قوم سے کئے گئے وعدے پورے کئے ہیں اور آئندہ بھی وعدے پورے کرے گی۔ ایاز صادق نے کہا اگر ہم پاکستان کی بقاءاور اسے مستحکم دیکھنا چاہتے ہیں تو ہر ادارے کو اپنے دائرہ کار میں رہنا ہوگا۔ کیونکہ اس راستے سے ہٹنے کا نقصان ہوگا۔ پاکستان اس وقت مشکلات میں گھرا ہوا ہے جس کا مقابلہ صرف اتحاد سے ہی ممکن ہے جے آئی ٹی رپورٹ مفروضوں اور فوٹو کاپیوں پر مشتمل ہے۔ ایک اور سوال کے جواب میں انہوں نے کہا کہ بے نظیر بھٹو نے بہت جدوجہد کی سیاست میں مریم بیٹی ہے مشکل حالات میں نکلی ہیں وہ بہت جلد میچور ہوں گی انہوں نے بتایا کہ خواجہ آصف سے چھ ستمر کو ملاقات ہوئی ہے وہ کہتے ہیں اب بین الاقوامی پالیسی بنائیں گے تاکہ مشکلات دور ہوسکیں۔

لندن (مانیٹرنگ ڈیسک) سابق وزیر اعظم میاں محمد نواز شریف کی اہلیہ بیگم کلثوم نواز کا دوسرا آپریشن بھی کامیابی سے مکمل ہوگیا۔ میڈیا رپورٹس کے مطابق بیگم کلثوم نواز کے جسم سے گلٹیاں نکال لی گئی ہیں جس کے بعد انہیں ریکوری روم میں منتقل کردیا گیا ہے۔ انہیں گیارھویں روز میں دوسری مرتبہ اسپتال میں داخل کیا گیا تھا، کلثوم نواز کی پہلی سرجری گردن کے ایک طرف کی گئی تھی، دوسری سرجری میں سینے سے گلٹیاں نکالی گئیں ہیں۔ اس سے قبل کلثوم نواز آج صبح نواز شریف اور بیٹوں کے ہمراہ اسپتال پہنچیں، آپریشن کے بعد میاں نواز شریف اور ان کے دونوں بیٹے بھی کلثوم نواز کے ساتھ موجود رہے۔ سابق وزیراعظم اپنی اہلیہ کے ہمراہ اسپتال میں ہی رہیں گے۔