کراچی: (ویب ڈیسک) سمندر پار پاکستانیوں نے مسلح افواج سے یکجہتی اور محبت کا اظہار کر دیا۔
سمندر پار پاکستانیوں کی جانب سے افواجِ پاکستان سے یکجہتی اور محبت کا اظہار کیا گیا ہے اور 9 مئی کے واقعات میں شہداء کی یادگاروں کی بے حرمتی کی مذمت کی گئی۔
انگلینڈ، ترکی، بیلجیئم، جرمنی سمیت یورپ کے کئی ممالک میں ریلیاں نکالی گئیں، جنوبی افریقہ میں بھی پاکستان آرمی کے حق میں ریلی نکالی گئی۔
ریلیوں میں گفتگو کرتے ہوئے سمندر پار پاکستانیوں کا کہنا تھا کہ پاکستان آرمی ہے تو ہم ہیں، ہمیں مل کر پاکستان کی بقاء اور سلامتی کی خاطر کام کرنا چاہیے۔
شرکاء نے کہا کہ پاکستان کی بات ہوگی تو ہم پاکستان آرمی کے ساتھ ملک کی بقاء کی خاطر کھڑے ہوں گے۔

اسلام آباد: (ویب ڈیسک) سوات میں پاکستان تحریک انصاف کے رہنما مراد سعید کی رہائشگاہ پر پولیس اور ایلیٹ فورس نے چھاپا مارا، تاہم چھاپے کے وقت مراد سعید گھر پر موجود نہیں تھے۔
تفصیلات کے مطابق سابق وفاقی وزیر کے گھر پر چھاپے کی سی سی ٹی وی فوٹیجز سامنے آگئی ہیں، جس میں دیکھا جاسکتا ہے کہ لاک نہ کھلنے پر اہلکار دروازہ پھلانگ کر گھر میں داخل ہوتے ہیں۔
رپورٹس کے مطابق رہنما تحریک انصاف مراد سعید کی غیر موجودگی پر اہلکار واپس روانہ ہوگئے۔
واضح رہے تحریک انصاف کے شاہ محمود قریشی، اسد عمر، فواد چوہدری، شیریں مزاری، فردوس شمیم نقوی اور علی زیدی سمیت کئی رہنما گرفتار ہوچکے ہیں۔

لاہور/ کراچی: (ویب ڈیسک) پاکستان میں حج آپریشن کا آغاز آج کراچی سے ہو گیا، پاکستان انٹرنیشنل ایئر لائنز (پی آئی اے) کی پہلی حج پرواز پی کے 773 کراچی سے 328 عازمین کو لے کر مدینہ منورہ پہنچ گئی۔
عازمین حج کو رخصت کرنے کیلئے ایک سادہ مگر پروقار تقریب منعقد کی گئی جس میں حجاج سے پاکستان کی سلامتی اور ترقی کیلئے خصوصی دعاؤں کی درخواست کی گئی۔
چیف آپریٹنگ آفیسر پی آئی اے امان اللہ قریشی، ڈائریکٹر جنرل بینظیر انکم سپورٹ پروگرام امتیاز شاہ، ڈائریکٹر حج کراچی سجاد حیدر، سول ایوی ایشن اتھارٹی اور پی آئی اے کے حکام نے عازمین کو رخصت کیا۔
حج آپریشن کے پہلے روز کراچی، اسلام آباد اور فیصل آباد سے افتتاحی پروازوں کے ذریعے تقریباً 700 سے زائد عازمین حج کو سعودی عرب پہنچایا جائے گا۔
اسلام آباد سے پہلی پرواز پی کے 743 آج رات 9 بج کر 15 منٹ پر مدینہ منورہ کیلئے روانہ ہوگی۔
ترجمان پی آئی اے کا کہنا ہے کہ حج آپریشن کیلئے پی آئی اے کے بوئنگ 777 اور ایئربس 320 طیارے استعمال کر رہی ہے۔
ترجمان کے مطابق رواں برس پی آئی اے 320 خصوصی حج اور شیڈول پروازوں کے ذریعے 65 ہزار سے زائد عازمین حج کو حجاز مقدس پہنچائے گی۔
قبل از حج آپریشن 22 جون تک جاری رہے گا جبکہ بعد از حج آپریشن 2 جولائی سے 2 اگست تک مکمل ہوگا۔
ترجمان کے مطابق پی آئی اے حج آپریشن کی پروازیں کراچی لاہور، اسلام آباد، کوئٹہ، پشاور، سیالکوٹ، فیصل آباد، سکھر اور رحیم یار خان سے آپریٹ ہوں گی۔
سی ای او پی آئی اے نے تمام ڈیپارٹمنٹس، پاکستان اور سعودی عرب میں تعینات حج ٹیموں کو عازمین کو بہترین سہولیات فراہم کرنے کی ہدایات جاری کی ہیں۔
وزیر مذہبی امور طلحہ محمود نے امید ظاہر کی ہے کہ سعودی عرب میں پاکستانی حجاج کا خاص خیال رکھا جائے گا۔

لاہور: (ویب ڈیسک) پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کے گھر زمان پارک کے راستے کھول دیئے گئے۔
پولیس نے زمان پارک کے اطراف میں سڑکوں پر لگائے گئے کنٹینرز اور کیمپ ہٹا دیئے، کلیئر کرائی گئی گرین بیلٹ پر نئے پودے بھی لگا دیئے گئے۔
زمان پارک کے اطراف میں تعینات کی گئی پولیس کی بھاری نفری بھی واپس بلا لی گئی ہے۔
واضح رہے کہ چیئرمین پی ٹی آئی کی رہائش گاہ والے علاقے زمان پارک میں ضلعی انتظامیہ اور پولیس نے آپریشن کلین اپ کر کے مکمل طور پر کنٹرول حاصل کر لیا تھا۔
زمان پارک میں عمران خان کی رہائش گاہ کی دونوں گلیوں کو بیریئرز اور کنٹینرز سے بند کیا گیا تھا اور زمان پارک کا علاقہ عام شہریوں کیلئے نو گو ایریا بن چکا تھا۔
ضلعی انتظامیہ نے کرینوں کی مدد سے دونوں گلیوں کے بیریئرز اور کنٹینرز ہٹانے کا کام شروع کیا تھا۔

اسلام آباد: (ویب ڈیسک) وزیراعظم شہباز شریف نے آج ملک میں امن و امان کی صورتحال سے متعلق اہم اجلاس طلب کرلیاہے ۔
تفصیلات کے مطابق وزیراعظم کی زیر صدارت اجلاس میں چاروں وزرائے اعلیٰ ، تمام تر صوبوں سے متعلق نمائندے وفاق سے متعلقہ افسران شرکت کریں گے ۔
اجلاس میں پنجاب حکومت 9مئی سے متعلق گرفتاریوں اور کارروائیوں کی جائزہ رپورٹ پیش کرے گی ۔
وزیراعظم کو وفاقی حکومت کی جانب سے بھی کیےگئے اقدامات پر بریفنگ دی جائے گی۔

سجاول: (ویب ڈیسک) برسوں سے بھارتی جیلوں میں قید 9 ماہی گیروں سمیت 22 پاکستانی بھارت سے رہا ہونے کے بعد واہگہ بارڈر پہنچ گئے۔
برسوں سے قید ماہی گیروں کی رہائی پر والدین کے چہرے پر رونق لوٹ آئی، مختلف ذات سے تعلق رکھنے والے 6 ماہی گیر ہیں جن میں قاسم، عبدالمناف تہیم، شیر علی سونارو ملہ، اچھر ملہ، سلیم ڈوریو، احمد جٹ شامل ہیں۔
تحصیل کے 26 ماہی گیر اب بھی بھارتی جیلوں میں قید ہیں، فشر فوک فورم نے دونوں ممالک میں قید ماہی گیروں کی آزادی کے لیے بھرپور کوششیں کیں، جس کے خاطر خواہ نتائج برآمد ہوئے۔

کراچی: (ویب ڈیسک) پی آئی اے کا ایک اور فضائی میزبان کینیڈا میں مبینہ طور پر لاپتہ ہو گیا۔
لاہور سے ٹورنٹو کی پرواز پرتعینات منتظرمہدی نامی فلائٹ اسٹیورڈ جمرات کو ٹورنٹو پہنچا تھا، لاپتہ فضائی میزبان نے جمعہ کو ٹورنٹوسے لاہور کی پرواز نمبر 798 پر فرائض انجام دینے تھے۔
پروازکے لئے مذکورہ فضائی میزبان نے ہوٹل میں دیگرعملے کے ساتھ رپورٹ نہیں کی، منتظر مہدی سے قبل بھی چار خاتون اور مرد فضائی میزبان مبینہ طور پر سلپ ہو چکے ہیں۔
پہلے سے لاپتہ ہونے والے فضائی میزبانوں کی پاکستانی شہریت ختم نہیں کرائی گئی، دیگر ممالک کی فضائی کمپنیوں کے لاپتہ میزبانوں کی شہریت فوری طور پر منسوخ کی جاتی ہے۔
لاپتہ فضائی میزبانوں کی وطن واپسی پر کارروائی کے لئےایف آئی اے کو کوائف بھی فراہم نہیں کئے گئے، مبینہ طور پر سلپ ہونے والے اپنے قومی شناختی کارڈز کی تجدید بھی با آسانی کرا لیتے ہیں۔

اسلام آباد: (ویب ڈیسک) وزارت منصوبہ بندی نے ترقیاتی پروگرام کے تحت جاری فنڈز کی تفصیلات جاری کر دیں، چوتھی سہ ماہی میں وفاقی ترقیاتی پروگرام کے تحت 72 ارب روپے کے فنڈز جاری کئے۔
اعلامیہ کے مطابق رواں مالی سال پی ایس ڈی پی کے تحت اب تک 566 ارب روپے سے زائد کے فنڈز جاری کئے گئے ہیں، گزشتہ مالی سال اسی عرصے میں 516 ارب روپے سے زائد کے فنڈز جاری کئے گئے۔
رواں مالی سال اب تک اعلیٰ تعلیمی کمیشن کے لیے 42 ارب، ہوا بازی ڈویژن کیلئے 33 ارب روپے سے زائد کے فنڈز جاری کئے گئے ہیں۔
اعلامیہ کے مطابق کابینہ ڈویژن کیلئے 90 ارب روپے، موسمیاتی تبدیلی کیلئے 4 ارب اور وزارت تجارت کیلئے ساڑھے پانچ ارب روپے سے زیادہ کے فنڈز جاری کئے، وزارت ہاؤسنگ و تعمیرات کیلئے 19 ارب روپے سے زائد رقم جاری کی گئی۔
ریلوے ڈویژن کیلئے 25 ارب 81 کروڑ، نیشنل ہائی وے اتھارٹی کیلئے 76 ارب 57 کروڑ ، وزارت قومی صحت کیلئے 11 ارب اور قومی تحفظ خوراک کیلئے 12 ارب روپے سے زائد کے فنڈز جاری کئے گئے۔

لاہور: (ویب ڈیسک) ملک بھر میں ماہ ذیقعد کا چاند نظر نہیں آیا، کل 21 مئی اتوار کو 30 شوال جبکہ 22 مئی سوموار کو یکم ذیقعد 1444ھ ہوگی۔
میڈیا رپورٹس کے مطابق ماہ ذیقعد 1444ھ کا چاند دیکھنے کیلئے لاہور، اسلام آباد، کراچی، پشاور اور کوئٹہ میں زونل رویت ہلال کمیٹیوں کے اجلاس منعقد ہوئے۔
چیئرمین مرکزی رویت ہلال کمیٹی پاکستان مولانا سید عبد الخبیر آزاد نے صوبائی دارالحکومت میں منعقدہ زونل رویت ہلال کمیٹی کے اجلاس کی صدارت کی جس میں ریجنل ڈائریکٹرمحکمہ موسمیات، سپارکوکے ذمہ داروں نے بھی شرکت کی۔
زونل رویت ہلا کمیٹیوں کو ملک بھر سے چاند دکھائی دینے کی ایک بھی شہادت موصول نہیں ہوئی جس کے بعد چیئرمین رویت ہلال کمیٹی مولانا سید عبد الخبیر آزاد نے پریس کانفرنس میں ملک بھر میں ذیقعد کا چاند دکھائی نہ دینے کا اعلان کردیا۔