پشاور: (ویب ڈیسک) پولیس لائنز حملہ آور کی مبینہ سہولت کار کے ساتھ تصویر دنیا نیوز نے حاصل کر لی۔
پشاور پولیس لائنز دھماکہ میں سی ٹی ڈی اور پولیس ٹیم کو اہم پیش رفت حاصل ہوئی، تحقیقاتی ٹیموں کی تفتیش میں مبینہ حملہ آور کی رنگ روڈ پر موجودگی اور سہولت کار کے ساتھ تصویر سامنے آگئی، خودکش حملہ آور کو مبینہ سہولت کار نے رنگ روڈ پر پہنچنے میں مدد فراہم کی۔
پولیس ذرائع کے مطابق حملہ آور رنگ روڈ کے راستے جی ٹی روڈ پر داخل ہوا، حملہ آور رنگ روڈ تک موٹر سائکل پر سہولت کار کے ساتھ رہا، حملہ آور کا مبینہ سہولت کار رنگ روڈ پر موٹر سائیکل سے الگ ہوگیا۔
ذرائع کے مطابق مبینہ سہولت کار جمیل چوک سے آگے رنگ روڈ پر حملہ آور سے الگ ہوا، مبینہ سہولت کار موٹر سائیکل چلا رہا تھا جبکہ حملہ آور موٹر سائیکل کے پیچھے بیٹھا تھا۔

پشاور: (ویب ڈیسک) ترجمان پولیس کا کہنا ہے کہ پشاور پولیس لائنز مسجد میں ہونے والے خودکش دھماکے میں شہدا کی مصدقہ تعداد 84 ہے۔
ترجمان پولیس کے مطابق خودکش دھماکے میں پولیس اہلکاروں اور افسران بشمول سویلینز مجموعی طور پر شہید ہونے والوں کی تعداد 84 ہے، ابتدائی اعداد و شمار میں ابہام کی بنیادی وجہ یہ تھی کہ کچھ شہیدوں کے نام فہرست میں ایک سے زائد مرتبہ لکھے گئے تھے۔
پولیس نے جاری اعداد و شمار میں بتایا ہے کہ ابتدائی طور پر عدم شناخت والے شہداء کے نام بعد از شناخت بھی عدم شناخت والے ناموں کی فہرست میں موجود رہے جس ابہام پیدا ہوا۔

لاہور: (ویب ڈیسک) نگران وزیراعلیٰ پنجاب محسن نقوی کسانوں اور کاشتکاروں کے مسائل کے حل کے لئے ایکشن میں آگئے، زراعت کی بہتری کے لیے ٹاسک فورس قائم کرنے کی منظوری دیدی۔
نگران وزیراعلیٰ محسن نقوی سے پروگریسو فارمرز کے 50 رکنی وفد کی وزیراعلیٰ آفس میں ملاقات ہوئی، ملاقات میں زرعی اجناس، لائیو سٹاک اور مچھلی کی زیادہ پیداوار کے لئے موثر اقدامات کرنے اور ریسرچ کو فروغ دینے پر اتفاق کیا گیا، اپٹما فاؤنڈیشن کی طرف سے کاٹن کی کاشت بڑھانے کیلئے ریسرچ کی خاطر 100 کروڑ روپے کے فنڈ کے قیام کا اعلان کیا گیا۔
نگران وزیراعلیٰ محسن نقوی نے زرعی شعبہ کی بہتری، پیداوار میں اضافے اور مارکیٹ تک آسان رسائی کے لئے ٹاسک فورس کے قیام کی منظوری دیدی، نگران وزیراعلیٰ محسن نقوی ٹاسک فورس کے چیئرمین ہوں گے، ٹاسک فورس میں نگران صوبائی وزیر صنعت ایس ایم تنویر، سیکرٹریز زراعت، آبپاشی، لائیو سٹاک، زرعی ریسرچ اداروں کے سربراہان، گوہر اعجاز، سید یاور علی، ذکا اشرف اور فواد مختار شامل ہوں گے۔
ٹاسک فورس 7 روز میں زرعی پیداوار میں اضافے، نئے بیجوں کے استعمال، مارکیٹ تک آسان رسائی اور دیگر امور کے بارے میں سفارشات پیش کرے گی، ٹاسک فورس کی سفارشات کی روشنی میں فی الفور فیصلے کئے جائیں گے۔
محسن نقوی نے تمام وزرا کو ڈویژن کی سطح پر کاشتکاروں کے ساتھ ملاقات کا ٹاسک دے دیا، صوبائی وزراء کمشنرز کے ساتھ مل کر کاشتکاروں کے مسائل سنیں گے اور موقع پر ہی حل کریں گے، اپٹما فاؤنڈیشن زرعی یونیورسٹیوں میں کاٹن او ردیگر فصلوں کے بہتر بیج پر ریسرچ کے لئے فنڈنگ کرے گی۔
نگران وزیراعلیٰ محسن نقوی نے کھاد کی فراہمی اور بلیک مارکیٹنگ روکنے کے لئے موثر اقدامات، لمپی سکن ویکسی نیشن مہم تیز کرنے کی ہدایت کی، اس موقع پر ٹیوب ویل کے بجلی بل میں جی ایس ٹی پر سبسڈی بحال کرنے کے لئے وفاقی حکومت سے رجوع کرنے کا فیصلہ بھی کیا گیا۔

فیصل آباد: (ویب ڈیسک) فیصل آباد میں پاکستان تحریک انصاف (پی ٹی آئی) کے دفتر میں ٹکٹوں کی تقسیم کے معاملے پر بے نظمی دیکھنے میں آئی ہے۔
پی ٹی آئی کارکنوں نے پی ٹی آئی ویسٹ ریجن پنجاب کے صدر فیض اللہ کموکی کی پریس کانفرنس کے دوران احتجاج کیا، کارکنوں کا کہنا تھا کہ پارٹی کیلئے قربانیاں دینے والوں کو نظر انداز کیا جا رہا ہے، احتجاج کے باعث پی ٹی آئی رہنما فیض اللہ کموکی پریس کانفرنس چھوڑ کر چلے گئے۔
فیصل آبادمیں پی ٹی آئی ویسٹ ریجن پنجاب کے صدر فیض اللہ کموکی کی جانب سے آئندہ انتخابات کیلئے ٹکٹوں کی تقسیم کے معاملے پر پارلیمانی بورڈ بنائے جانے کے معاملے پر پریس کانفرنس کے دوران ناراض کارکنوں نے احتجاج شروع کرد یا۔
کارکنوں کا کہنا تھا کہ ٹکٹوں کی تقسیم کے معاملے میں پارٹی کیلئے قربانیاں دینے والے کارکنوں کو مکمل طور پر نظر انداز کیا جا رہا ہے اور من پسند افراد کو ٹکٹ دینے کی کوششیں ہو رہی ہیں جنہیں کارکن کبھی قبول نہیں کریں گے بلکہ اس طرح کے فیصلوں کے نتیجے میں کارکن اپنی پارٹی کے خلاف آزادنہ طور پر انتخابات میں حصہ لیں گے جس سے پارٹی ووٹ تقسیم ہوگا اور پارٹی کے منتخب امیداوار کو نقصان ہو گا ۔

پشاور: (ویب ڈیسک) آئی جی خیبر پختونخوا معظم جاہ انصاری نے کہا ہے کہ دہشتگردی کے خاتمے کیلئے افغان حکومت سے تعاون کا فیصلہ کیا گیا ہے۔
میڈیا سے گفتگو کرتے ہوئے انہوں نے کہا کہ اگر کسی سے بات کی ضرورت پڑی تو طاقتور پوزیشن سے بات کی جائے گی،پولیس اور سی ٹی ڈی کے استعداد کار کو بڑھایا جائے گا۔
ان کا کہنا تھا کہ افغانستان سے کوئی معلومات چاہئے ہوگی تو باہمی قانونی معاونت ہوگی،افغانستان کو کہیں گے کہ پاکستان کو غیر مستحکم کرنے والوں کیخلاف کارروائی کرے۔
آئی جی خیبر پختونخوا معظم جاہ انصاری نے کہا کہ ہماری سیاسی قیادت افغانستان کی سیاسی قیادت سے بات کرے گی،عسکری قیادت افغانستان کی عسکری قیادت سے بات کرے گی جب کہ مذہبی رہنما افغانستان کے مذہبی رہنماوں سے بات کریں گے۔
انہوں نے کہا کہ ایپکس کمیٹی میں سمت کا تعین کر لیا گیا ہے کہ آگے کیسے بڑھنا ہے، دھماکا خیز مواد جہاں بنتا اور استعمال ہوتا ہے اس کی ای ٹیگنگ کی جائے گی۔