لاہور: (ویب ڈیسک) پاکستان مسلم لیگ ن کے رہنما عطا تارڑ نے کہا ہے کہ خان صاحب کو کسی نے شاید جیل بھرو تحریک کا مطلب غلط بتایا ہے۔
سماجی رابطے کی ویب سائٹ ٹوئٹر پر اپنے پیغام میں عطا تارڑ نے کہا کہ ایسی تحریک چلنے پر تمام زیر سماعت اور زیر التوا مقدمات میں درخواست کی ضمانتیں واپس لی جاتی ہیں۔
عطا تارڑ نے سوال کیا کہ کیا خان صاحب فارن فنڈنگ کیس، سائفر کیس اور توشہ خانہ کیس میں ضمانت کی درخواستیں واپس لیں گے؟ دیگر رہنما بھی جیل جائیں گے؟

نیویارک: (ویب ڈیسک) اقوام متحدہ میں پاکستان کے مستقل مندوب منیر اکرم نے افغانستان میں خواتین کی تعلیم سے متعلق اپنے بیان پر شدید تنقید کے بعد معافی مانگ لی۔
گزشتہ دنوں پاکستان کے مستقل مندوب منیر اکرم نے اقوام متحدہ میں افغانستان کے بارے میں بریفنگ دیتے ہوئے بیان دیا تھا کہ طالبان حکومت کی جانب سے خواتین کی تعلیم پر پابندیوں کا تعلق مذہبی نقطہ نظر سے زیادہ پشتون ثقافت سے ہے۔
انہوں نے کہا تھا کہ پشتون ثقافت میں خواتین کا گھر میں رہنا ضروری ہے اور یہ ثقافتی حقیقت سیکڑوں سال سے نہیں بدلی ہے۔
اب شدید تنقید کے بعد منیر اکرم نے معافی مانگ لی ہے۔ اس حوالے سے انہوں نے کہا کہ میرے تبصروں سے ہونے والی تکلیف کیلئے معذرت خواہ ہوں۔
ان کا کہنا تھاکہ میرے الفاظ پاکستان کی صحیح عکاسی نہیں کرتے، خواتین اور لڑکیوں کو تعلیم کے حصول سے روکنا نا اسلامی کلچر ہے اور نہ ہی پختون کلچرہے۔

لاہور: (ویب ڈیسک) وفاقی وزیر منصوبہ بندی احسن اقبال نے کہا ہے کہ سیاسی تبدیلی کے باعث معاشی پالیسی پھل پھول نہ سکی۔
وزیرمنصوبہ بندی احسن اقبال نے لاہور میں معیشت سے متعلق کانفرنس سے خطاب میں کہا کہ سیاسی تبدیلی ہر چیز کو تباہ کردیتی ہے۔ پینسٹھ کی لڑائی مول لے کر معاشی کیچ ڈراپ کر دیا گیا تھا۔ سی پیک سے دنیا مقناطیس کی طرح پاکستان میں کھینچی چلی آئی تھی اورچین کی 100 کمپنیوں نے اسلام آباد میں دفتر کھول لئے تھے۔
انہوں نے کہا کہ 2018 میں ملک میں تبدیلی لانے والوں کو چین نے سمجھانے کی کوشش کی کہ الیکشن میں مداخلت نہ کریں کیونکہ جو تبدیلی آپ لانا چاہتے ہیں اس سے سی پیک کو بہت نقصان پہنچے گا تاہم چین کو جواب دیا گیا کہ آپ فکر نہ کریں ، جو بھی تبدیلی آئے گی وہ سی پیک کو جاری رکھے گی۔
وفاقی وزیر نے کہا کہ پاکستان میں سیاسی تبدیلی سے معاشی پالیسی پھل پھول نہ سکی۔ ضیا و مشرف کے پلان کا خطیر حصہ ملٹری ہارڈ وئیرپر خرچ ہوا۔ تھر کول ایران اورسعودی عرب کے تیل سے بڑا خزانہ ہے۔

نوشہرہ ورکاں: (ویب ڈیسک) منگنی توڑنے کی رنجش پر نوجوان نے فائرنگ کرکے تین افراد کو قتل کر دیا۔
افسوسناک واقعہ نوشہرہ ورکاں کے موضع نتھو سیویا میں پیش آیا جہاں ملزم نے اپنے ماموں، ممانی اور منگیتر کو گولیاں مار کر موت کے گھاٹ اتار دیا۔
ریسکیو ذرائع کے مطابق ملزم اپنی والدہ کے ساتھ سسرالیوں سے رشتہ توڑنے پر بات کرنے آیا تھا، دوران گفتگو ملزم طیش میں آگیا اوراندھا دھند فائرنگ کردی ۔
فائرنگ کے بعد فرار ہوتے ملزم کو اہل دیہہ نے تعاقب کرکے پکڑ لیا، پولیس نے موقع پر پہنچ کر ملزم کو گرفتار کر لیا جبکہ لاشوں کو ضروری کارروائی کے بعد ورثاء کے حوالے کردیا گیا۔