اسلام آباد: (ویب ڈیسک) نیپرا نے ملک بھر کے بجلی صارفین کے لیے فی یونٹ 57 پیسے اضافے کی منظوری دے دی۔
عوام کے لیے ایک اور بری خبر سامنے آئی ہے، نیپرا نے بجلی کی قیمتوں میں 57 پیسے فی یونٹ اضافے کی منظوری دے دی۔ اضافے کا اطلاق کے الیکٹرک کے سوا ملک بھر کے تمام بجلی صارفین پر ہوگا۔
نیپرا کے مطابق قیمت میں اضافہ مالی سال 2021-22ء کی پہلی سہ ماہی ایڈجسٹمنٹ کی مد میں کیا گیا، صارفین سے بجلی کی چوری اور لاسز کے چارجز بھی وصول کیے جائیں گے، فیصلے سے صارفین پر 3 ماہ میں 14 ارب 33 کروڑ روپے کا اضافی بوجھ پڑے گا۔
نیپرا نے کہا ہے کہ بجلی کی قیمتوں میں اضافے کا اطلاق یکم جون سے ہوگا، نیپرا نے نوٹی فکیشن کے لیے فیصلہ وفاقی حکومت کو بھجوادیا۔

اسلام آباد: (ویب ڈیسک) مسلم لیگ ن کے رہنما اور رکن قومی اسمبلی ایاز صادق نے کہا ہے کہ اگر صدر کو کوئی کام نہیں کرنا تو گھر چلے جائیں۔
قومی اسمبلی اجلاس کے دوران اظہار خیال کرتے ہوئے مسلم لیگ ن کے رکن ایاز صادق نے کہا کہ صدر مملکت نے وزیر اعظم کی تمام ایڈوائس کو مسترد کرنے کا طے کر لیا ہے۔ وزیر اعظم نے گورنر پنجاب کو ہٹانے کی ایڈوائس دی مگر صدر نے مسترد کی، کیا وزیر اعظم کو صوبوں میں گورنر تعینات کرنے کا اختیار نہیں ہے ؟
انہوں نے کہا کہ ایوان صدر میں آئین اور قانون کی پامالی ہو رہی ہے لیکن اگر صدر کو کوئی کام نہیں کرنا تو گھر چلے جائیں۔ صدر مملکت کے اقدامات کے خلاف قرار داد تیار کر لی ہے جسے ایوان میں پیش کرنا چاہتے ہیں۔
رہنما مسلم لیگ ن نے کہا کہ صدر مملکت کو کسی پارٹی کا نمائندہ نہیں ہونا چاہیے اور صدر مملکت آئین کی خلاف ورزی کر رہے ہیں۔ صدر مملکت مشترکہ اجلاس میں خطاب کیسے کریں گے ؟
ن لیگ نے صدر مملکت کے اقدامات پر بحث بھی کرانے کا مطالبہ کیا جبکہ مسلم لیگ ن نے صدر مملکت کے اقدامات کے خلاف مذمتی قرارداد پیش کرنے کا فیصلہ کر لیا۔

کراچی: (ویب ڈیسک) کینجھر جھیل میں پانی کی سطح ڈیڈلیول کے قریب پہنچ گئی جس سے کراچی میں پانی کی قلت کا خطرہ پیدا ہوگیا ہے۔
کینجھر جھیل کے اسسٹنٹ انجینئر کا کہنا ہےکہ جھیل میں پانی کی سطح 56 سےکم ہوکر48 فٹ پر آگئی اور پانی کا لیول42 فٹ ہونے پرکراچی کوپانی کی فراہمی بند ہوجائے گی۔
اسسٹنٹ انجینئر نے بتایا کہ کراچی کو اس جھیل سے 1200کیوسک پانی یومیہ فراہم کیا جاتا ہے، گلیشیئرز اوربارشوں کا پانی جھیل میں نہ آیا تو صورتحال مزید خراب ہوسکتی ہے۔

اسلام آباد: (ویب ڈیسک) آرٹیکل 63 اے کی تشریح سے متعلق صدارتی ریفرنس کی سماعت کے دوران جسٹس اعجاز الاحسن نے ریمارکس دیئے ہیں کہ روایت بن گئی ہے کہ پیسوں سے حکومت گرائی جاتی ہے۔ چند لوگوں کی خرید و فروخت سے 22 کروڑ عوام کا مستقبل دائو پر ہوتا ہے۔ اراکین کی خرید و فروخت کے ذریعے حکومت گرانے کا سلسلہ بند ہونا چاہیے۔
چیف جسٹس عمرعطا بندیال کی سربراہی میں 5 کنی لارجر بینچ نے آرٹیکل 63 اے کی تشریح سے متعلق صدارتی ریفرنس کی سماعت کی۔
تحریک انصاف کے وکیل بابر اعوان نے دلائل دیبے کہ یوٹیلیٹی بلز ادا نہ کرنے والا بھی رکنیت کا اہل نہیں ہوتا۔ مدت کا تعین نہ ہو تو نااہلی تاحیات ہوگی۔
اس پرجسٹس جمال مندوخیل نے استفسار کہ کوئی امیدوار آئندہ الیکشن سے پہلے بل ادا کردے تو کیا تب بھی نااہل ہوگا۔
جسٹس اعجاز الاحسن نے کہا کہ بل ادا کرنے کے بعد نااہلی ختم ہوجائے گی۔ آرٹیکل 62 ون ایف کے تحت ہی نااہلی تاحیات ہے۔ جب تک نااہلی کا ڈکلیریشن عدالت ختم نہ کرے نااہلی برقرار رہے گی لیکن یوٹیلیٹی بلز کی عدم ادائیگی پر نااہلی تاحیات نہیں ہوسکتی۔ ہم نے آپ کا نقطہ نوٹ کرلیا ہے۔ آپ کہہ رہے ہیں نااہلی کی میعاد نہ ہونے پر تاحیات نااہلی ہوگی۔آپ چاہتے ہیں آرٹیکل 63 اے کو اتنا سخت بنایا جائے کہ کوئی انحراف نہ کرسکے؟
جسٹس جمال مندوخیل نے کہا کہ قانون میں جرم کی مختلف سزائیں دی گئی ہیں۔ کیا عدالت سزا میں ایک دن کا بھی اضافہ کرسکتی ہے؟ آرٹیکل 63 اے منحرف ارکان کے خلاف کارروائی کا فورم مہیا کرتا ہے۔
عدالت نے سماعت کل 12 بجے تک ملتوی کردی۔

اسلام آباد: (ویب ڈیسک) وفاقی کابینہ نے تین ملین ٹن گندم درآمد کرنے کی منظوری دے دی۔
وزیراعظم شہباز شریف کی زیر صدارت وفاقی کابینہ کا اجلاس ہوا جس میں فواد اسد اللہ کو ڈی جی آئی بی اور ریئر ایڈمرل (ر) سلیمان کو کراچی شپ یارڈ کا ایم ڈی تعینات کرنے کی منظوری دی گئی۔
کابینہ نے تین ملین ٹن گندم درآمد کرنے کی بھی منظوری دی اور ممبر فنانس کو چیرمین واپڈا کا اضافی چارج دے دیا۔
اجلاس میں وزیر خارجہ بلاول بھٹو زرداری نے ملک میں پانی کی قلت کا معاملہ اٹھادیا۔ انہوں نے کہا کہ پانی کی قلت کی وجہ سے عوام بالخصوص کاشت کار مسائل کا سامنا کررہے ہیں، پانی کی قلت کی ایک بڑی وجہ ارسا کی جانب سے صوبوں کو پانی کے جائز حصے کی فراہمی میں خلل ہے، ملک میں ایک فوڈ سیکیورٹی ٹاسک فورس بنائی جائے تاکہ ہم ممکنہ غذائی بحران کا مقابلہ کرسکیں۔
بعدازاں کابینہ اجلاس پر بریفنگ دیتے ہوئے وفاقی وزیر اطلاعات مریم اورنگزیب نے کہا کہ اجلاس میں 1947 پاسپورٹ ایکٹ کے تحت ایک سے زیادہ غیرملکی پاسپورٹوں کو منسوخ کرنے کی منظوری دےدی گئی۔ انہوں نے کہا کہ پنجاب میں آئین شکنی جاری ہے، عمران خان آئین پر حملے کو دہرا رہے ہیں۔
وفاقی وزیر قانون اعظم نزیر تارڑ نے کہا کہ گورنر پنجاب کے حوالے سے صدر مملکت نے آئین پر عمل نہیں کیا، ریاستی امور کے فیصلے عوام کے منتخب نمائندے کریں گے، کوئی آئینی عہدیدار آئینی حدود سے تجاوز نہ کرے، اختیارات کا جھکاؤ کسی بھی طرح قبول نہیں کیاجائےگا، حکومتیں تبدیل ہوتی ہیں لیکن ملک میں ایسی صورتحال کبھی پیدا نہیں ہوئی۔
وفاقی وزیر توانائی خرم دستگیر نے کہا کہ وزیراعظم نے یکم مئی سے لوڈشیڈنگ ختم کرنے کا اعلان کیا تھا، آج ملک میں لوڈشیڈنگ صفر ہے، سو ارب روپے اضافی دیے جائیں تو گرمیوں میں لوڈشیڈنگ کم کرسکتےہیں۔