اسلام آباد: (ویب ڈیسک) صدر مملکت ڈاکٹر عارف علوی نے قومی اسمبلی کا اجلاس پیر 9 مئی کو سہ پہر چار بجے طلب کرلیا۔
اجلاس آئین کے آرٹیکل 54 اے کے تحت وزیر اعظم کے مشورے پر طلب کیا گیا ہے جس کے لیے وزارت پارلیمانی امور نے تیاریاں مکمل کرلی ہیں۔
اجلاس میں پی ٹی آئی ارکان کے استعفوں کا معاملہ بھی زیر بحث آئے گا جبکہ عام انتخابات سے قبل انتخابی اصلاحات سمیت دیگر امور قومی اسمبلی اجلاس میں زیر بحث آئیں گے۔
ذرائع کے مطابق اسپیکر قومی اسمبلی راجہ پرویز اشرف انتخابی اصلاحات کے سلسلے میں سابق وزیراعظم عمران خان سمیت پارلیمانی لیڈرز کو خطوط ارسال کرچکے ہیں۔ قومی اسمبلی اجلاس کے دوران ہی تمام جماعتوں کی جانب سے انتخابی اصلاحات کے لیے ممبران کے نام پیش کیے جائیں گے۔
ذرائع کے مطابق اسپیکر قومی اسمبلی پارلیمانی جماعتوں کی نمائندگی کے ساتھ ہی کمیٹی تشکیل دیں گے، اسپیکر قومی اسمبلی پی ٹی آئی ارکان کے استعفوں کے بارے میں فرداً فرداً تصدیق کا عمل بھی شروع کریں گے۔ قومی اسمبلی اجلاس کے دوران قائمہ کمیٹیوں کے چیئرمینز کا بھی فیصلہ کیا جائے گا۔

اسلام آباد: (ویب ڈیسک) پاکستان پیپلز پارٹی کے چیئر مین اور وفاقی وزیر خارجہ بلاول بھٹو زرداری نے کہا کہ گلگت بلتستان میں گلیشیئرز کا تیزی سے پگھلنا لمحہ فکریہ ہے۔
گلگت میں سیلابی صورتحال پر اپنے بیان میں انہوں نےکہا کہ شیشپر گلیشیئر پر جھیل پھٹنے کے نتیجے میں پیدا ہونے والی صورتحال سے ہنگامی بنیادوں پر نمٹنے کی ضرورت ہے، یقینی بنایا جائے مقامی آبادیوں کو کسی طرح کا نقصان نہ پہنچے، زمینی راستے بھی کھلے رہیں۔
بلاول بھٹو زرداری نے کہا کہ اُمید ہے انتظامیہ یقینی بنائے گی عام لوگوں، سیاحوں کو مشکلات کا سامنا نہ کرنا پڑے، گلگت بلتستان کی عوام کو پیپلز پارٹی مشکل گھڑی میں اکیلا نہیں چھوڑے گی، گلیشیئرز کا تیزی سے پگھلنا لمحہ فکریہ ہے، موسمیاتی تبدیلیوں پر اب شترمرغ کی طرح ریت میں سر مزید چھپایا نہیں جاسکتا، موسمیاتی تبدیلیوں کے معاملے پر اجتماعی و مربوط کوششیں حالات کا تقاضا ہیں۔

اسلام آباد: (ویب ڈیسک) وزیراعظم نے اشتراوصاف علی کو اٹارنی جنرل تعینات کرنے کی منظوری دے دی۔
وزیراعظم شہباز شریف نے سابق اٹارنی جنرل اشتراوصاف علی کو ایک بار پھر اٹارنی جنرل تعینات کرنے کی منظوری دے دی۔
اشتراوصاف سابق وزیراعظم نواز شریف کے دور میں بھی اٹارنی جنرل رہ چکے ہیں۔ وہ 2015-16ء میں وزیراعظم کے اسپیشل اسسٹنٹ قانون و انصاف بھی رہ چکے ہیں۔
اشتراوصاف علی دو بار 1998-99ء اور 2012-13ء میں ایڈووکیٹ جنرل پنجاب بھی رہے ہیں۔ وہ 2011-12ء میں صوبے کے پراسیکیوٹر جنرل کے فرائض بھی انجام دے چکے ہیں۔

کراچی: (ویب ڈیسک) پاکستان پیپلزپارٹی نے 15 مئی کو کراچی میں جلسے کا اعلان کر دیا۔ وزیر خارجہ بلاول بھٹو زرداری خطاب کرینگے۔
صوبائی وزیرمحنت سعید غنی نے سندھ اسمبلی میں پریس کانفرنس میں بتایا کہ بلاول بھٹو زرداری نے عمران خان کی نااہل حکومت گرانے کی تحریک کی قیادت کی تھی۔۔ 15 مئی کو کراچی میں جلسہ کریں گے فی الحال جگہ کا تعین نہیں ہوا۔
صوبائی وزیر کا کہنا تھا کہ عمران خان کی پریس کانفرنس میں بھی کچھ اداکاراورپسند کے صحافی بلائے جاتے ہیں۔ بلاول بھٹو نے 27 فروری سےلانگ مارچ شروع کیا اور کہا کہ الیکشن کرواو۔ عمران خان نے عدم اعتماد پرکہاکہ میں شکراداکرتا ہوں یہ سب اکٹھے ہوئے ہیں میں اللہ کاشکراداکرتاہوں۔
انہوں نے کہا کہ اس مرتبہ اسٹیبلشمنٹ نیوٹرل رہی اگر عدلیہ افواج اور دیگر اداروں نے اپنا آئینی کردار ادا کیا تو ہمیں اس کو سراہنا چاہئے۔ ایک کروڑ نوکریاں پچاس لاکھ گھربنانے کی باتیں کی چینی، آٹا، آئل، مالم جبا، بی آرٹی سمیت کئی اداروں کے سکینڈل اس کے ہیں۔
سعید غنی کا کہنا تھا کہ کیاعوام عدلیہ سیاستدانوں سمیت سب غدارہیں۔ عمران خان اس ملک کے لئے سب سے بڑا سیکیورٹی تھریث ہے۔ عمران خان نے 66 سالا زندگی میں اتنانہیں کمایاجتنا وزیرآعظم بننے کے پہلے دوماہ میں کمایا۔

چونیاں : (ویب ڈیسک) پنجاب کی تحصیل چونیاں کے تھانہ سٹی کی حدود میں سگے بھائی نے اپنے بھائی کے گندم کے کھیت میں آگ لگا دی۔
تفصیلات کے مطابق تین ایکٹر کے گندم کے کھیت آگ لگنے سے کٹی ہوئی گندم کے بنڈلز اور راس راکھ بن گئی جبکہ لاکھوں مالیت گندم کا نقصان بھی ہوا۔ فائر بریگیڈ عملہ نے موقع پر پہنچ کر آگ پر قابو پا کر فصل کو مزید بڑے نقصان سے بچا لیا۔ ذرائع کے مطابق خود کی گندم کی پیدوار کھیت میں کم ہونے پر بھائی اقبال نے بھائی سردار محمد کے کھیت میں آگ لگا دی۔
خیال رہے کہ متاثرہ بھائی سردار محمد کی بیوی بلقیس بی بی نے خاوند کے بھائی کے خلاف سٹی تھانہ میں درخواست دے دی۔واضح رہے کہ چونیاں پولیس نے کارروائی کا آغاز کر دیا ہے۔