پاکستان تحریک انصاف نے غیر ملکی سازش کے الزام کی تحقیقات کے لیے وفاقی حکومت کے مجوزہ انکوائری کمیشن کو مسترد کر دیا۔

اسلام آباد میں پی ٹی آئی رہنماؤں کے ہمراہ پریس کانفرنس کرتے ہوئے فواد چوہدری کا کہنا تھا کہ ہم صرف وہ کمیشن قبول کریں گے جو آزاد عدلیہ کے تحت ہو اور کمیشن کی کارروائی براہ راست دکھائی جائے۔

عمران خان کے بیرونی سازش کے الزامات پر انکوائری کمیشن بنانے کا اعلان

وفاقی حکومت کے بشریٰ بی بی کی قریبی دوست پر الزامات کے حوالے سے فواد چوہدری نے کہا کہ فرح خان کے خلاف ابھی تک کوئی کیس نہیں بنا سکے، الزام لگا نہیں رہے، پریس کانفرنسیں کر رہے ہیں۔

یاد رہے کہ وفاقی وزیر اطلاعات مریم اورنگزیب نے سابق وزیراعظم عمران خان کی جانب سے لگائے گئے الزامات کی تحقیقات کے لیے انکوائری کمیشن بنانے کا اعلان کرتے ہوئے کہا تھا کہ کمیشن کا سربراہ ایسا شخص ہو گا جس پر کسی کو شک نہیں ہو گا۔

حکومت نے پاکستان تحریک انصاف (پی ٹی آئی) کے چیئرمین اور سابق وزیراعظم عمران خان کے سازش کے الزامات پر انکوائری کمیشن بنانے کا بڑا فیصلہ کرلیا ہے، کمیشن غیر جانبدار اور آزادانہ طور پر سفارتی مراسلے کی تحقیقات کرے گا۔

وفاقی وزیر اطلاعات مریم اورنگزیب نے پریس کانفرنس کرتے ہوئے کہا کہ آپ قوم کو بے وقوف نہیں بنا سکتے، حکومت نے فیصلہ کیا ہے کہ صبح شام تماشے پر غیرجانبدار انکوائری کمیشن بنایا جائے، سربراہ ایسا ہو گا جس پر کوئی انگلی نہیں اٹھا سکے گا، رپورٹ عوام کے سامنے رکھی جائے گی، ملک کو لوٹنے والا سازشی ٹولہ بچ نہیں سکتا، نیازی کی نالائق حکومت کا خمیازہ عوام بھگت رہے ہیں، عمران خان معیشت کیلئے بارودی سرنگیں کھود کر گئے ہیں۔

انہوں نے مزید کہا کہ کوئی بیرون ملک سازش نہیں ہوئی، جب اپنے اتحادی چھوڑ گئے تب آپ کو یاد آیا کہ بیرونی سازش ہوئی؟ جلسوں کا شیڈول بھی اپنی بے نامی کو بچانے کا پریشر ہے، افسران کے ذریعے پیسے کمائے گئے، ایک ایک تفصیل آ چکی ہے۔

قبل ازیں میڈیا سے گفتگو کرتے ہوئے مریم اورنگزیب نے کہا کہ معاشی بارودی سرنگیں بچھانے والے اپنی نالائقی کا ماتم کر رہے ہیں،سازشی ٹولے نے 4 سال ملک کو لوٹا اور عوام کے خلاف سازش کی، چور ٹولے نے 4 سال خزانہ اور توشہ خانہ لوٹا۔

وفاقی وزیر کا کہنا تھا کہ سازشی ٹولہ اب رو دھو اور چیخیں مار کے وقت گزار رہے ہیں، ملک میں مہنگائی کی شرح میں اضافہ عمران خان کی نالائقی اور لوٹ مار ہے، عوام کو 4 سال بعد صرف 2 ہفتوں میں سستا آٹا، چینی، گھی مل رہا ہے، سعودی عرب اور یو اے ای سے کاروباری شراکت داریاں ہو رہی ہیں۔

لودھراں کے اسپتال میں ڈاکٹروں کی مبینہ غفلت سے ڈیڑھ سالہ بچی انتقال کرگئی۔

ڈسٹرکٹ ہیڈ کوارٹر اسپتال لودھراں میں موجود بچی کے والد عبدالرزاق کا کہنا ہے کہ وہ گزشتہ رات 10 بجے اپنی بیٹی کو اسہال اور الٹی کی کیفیت میں اسپتال لے کر آئے تھے کہ ڈاکٹروں نے اسے چیک کرکے دوائی دی اور کہا بچی ٹھیک ہے اسے گھر لے جائیں۔

بچی کے والد عبدالرزاق کے مطابق طبعیت خراب ہونے پر دوبارہ بچی کو اسپتال لایا گیا لیکن عملے نے توجہ نہ دی اور ڈیوٹی پر موجود ڈاکٹر موبائل استعمال کرتا رہا۔

یہ بھی پڑھیں
ویڈیو: مبینہ غفلت سے مریض کی ہلاکت، احتجاج پر ینگ ڈاکٹرز کا لواحقین پر تشدد
مبینہ غفلت سے نوجوان کی ہلاکت کا ذمہ دار قرار دینے پر ینگ ڈاکٹرز نے دھرنا دیدیا
بچی کے والد عبدالرزاق نے الزام لگایا کہ ڈاکٹروں کی مبینہ غفلت اور لاپرواہی کی وجہ سے ان کی بیٹی فوت ہوئی ہے۔

بعد ازاں ورثاء نے بچی کی لاش اٹھا کر اسپتال میں احتجاج کیا اور اسپتال میں توڑ پھوڑ بھی کی۔ بچی کے والد کا یہ بھی کہنا ہے کہ احتجاج کرنے پر اسپتال کے سکیورٹی گارڈز نے تشدد کیا اور اسلحہ بھی تان لیا۔

اس حوالے سے ایم ایس ڈسٹرکٹ ہیڈ کوارٹر اسپتال کا کہنا ہے کہ واقعہ کی انکوائری کی جارہی ہے، غفلت ثابت ہونے پر عملے کے خلاف کارروائی کی جائے گی۔

اسلام آباد: وفاقی حکومت نے سابق وزیراعظم عمران خان کے گوشواروں اور آمدن کی جانچ پڑتال کرانے کا فیصلہ کیا ہے۔

ذرائع کا بتانا ہے کہ حکومت نے پی ٹی آئی سینٹرل سیکرٹریٹ کے 4 ملازمین کے بینک اکاﺅنٹس کی تفصیلات حاصل کرنے کا بھی فیصلہ کیا ہے۔

ذرائع کے مطابق جن ملازمین کی تفصیلات حاصل کرنے کا فیصلہ کیا ہے ان میں طاہر اقبال، محمد نعمان افضل، محمد ارشد اور محمد رفیق شامل ہیں، 2008 سے 2022 تک ان ملازمین کے نجی اکاﺅنٹس میں جتنی رقوم آئیں ان کا ریکارڈ حاصل کیا جا رہا ہے۔

ذرائع کا کہنا ہے کہ پی ٹی آئی کے 4 ملازمین کے نجی اکاﺅنٹس میں آنے والی بھاری رقوم کا ریکارڈ اسٹیٹ بینک سے منگوایا جا رہا ہے، شواہد کی روشنی میں گرفتاریاں بھی عمل میں آئیں گی۔

حکومتی ذرائع کا بتانا ہے کہ پی ٹی آئی فارن فنڈنگ کے 2013 سے 2022 کا ریکارڈ بھی منگوایا جا رہا ہے، پی ٹی آئی فارن فنڈنگ کیس میں صرف 5 سال تک کے عرصے کا ریکارڈ ہے۔

ذرائع کے مطابق آزاد آڈیٹرز کے ذریعے ریکارڈ کی فارنزک جانچ پڑتال کروائی جائے گی جبکہ ایف آئی اے اور  ایف بی آر  اپنی اپنی سطح پر ریکارڈ حاصل کرکے کارروائی کریں گے۔

حکومتی ذرائع کا کہنا ہے کہ پی ٹی آئی اور عمران خان کے انٹرنیشنل بینک اکاﺅنٹس کے ریکارڈ کے لیے عالمی بینکس کو خط لکھنےکا فیصلہ بھی کیا گیا ہے۔

حکومتی ذرائع کا بتانا ہے کہ سابق وزیر خزانہ اسحاق ڈارکے دور میں ڈیٹا ایکسچینج معاہدہ ہوا تھا جس کے تحت کارروائی کی جائے گی، معاہدے کے تحت ایف بی آر کو قانونی اختیار حاصل ہے کہ وہ عالمی بینکس سے ریکارڈ لے سکتا ہے۔

ذرائع کا یہ بھی بتانا ہے کہ امریکا، برطانیہ، کینیڈا، ناروے، فن لینڈ، نیوزی لینڈ اور آسٹریلیا سمیت دیگر غیر ملکی بینک اکاﺅنٹس کا ریکارڈ حاصل کیا جائے گا۔

ذرائع کے مطابق وفاقی حکومت نے عمران خان کے گوشواروں اور آمدن کی جانچ پڑتال کرانے کا بھی فیصلہ کیا ہے، گوشواروں اور ریکارڈ کا تقابلی جائزہ لے کر قانونی کارروائی کی جائے گی۔