لاہور: (ویب ڈیسک) اقوام متحدہ میں پاکستان کے مستقل مندوب منیر اکرم نے کہا ہے کہ ہتھیاروں کی دوڑ، اسلاموفوبیا اور نفرت انگیز تقاریر سے عالمی مسائل میں اضافہ ہوا۔
چین اور ترقی پذیر ممالک پر مشتمل گروپ 77 کی انفارمیشن کمیٹی اجلاس سے خطاب میں ان کا کہنا ہے کہ کورونا وبا اور آب و ہوا کی تبدیلی جیسے مسائل نے چیلنجز بڑھا دیے۔
ا نہوں نے کہا ہے کہ بیشتر ممالک کو خوراک،توانائی اور سپلائی چین کی رکاوٹ جیسے سنگین چیلنجز کا سامنا ہے۔ترقی یافتہ اور ترقی پذیر دنیا کے درمیان ڈیجیٹل فرق وسیع ہورہا ہے۔
منیر اکرم کا کہنا تھا کہ عالمی امن و استحکام کے لیے پیغامات کو واضح اور موثر انداز میں سنا جانا چاہیے۔وسیع عالمی معاونت کیلئے اطلاعات اور معلومات کی کمیٹی کا کردار اہم ہے۔

گورنر پنجاب عمر سرفراز چیمہ نے وزیر اعظم ،وزیر اعلی پنجاب اور سیاسی قائدین کو  آئین کی کتاب بطور عید تحفہ بھجوا دی۔ 

گورنر پنجاب  کے مطابق پاکستان کے آئین کی کتاب بطور عید کاتحفہ کے ان تمام سیاسی لیڈروں کو بھیجیں ہیں جو آئین پڑھے بغیر  بلاوجہ احمقانہ بیانات دے رہے ہیں یا غصہ کر رہے ہیں۔گورنر پنجاب نے وزیر اعظم شہباز شریف ،وزیر اعلی پنجاب حمزہ شہباز شریف ،مریم صفدر کو آئین پاکستان کی کتاب بھجوائی۔

گورنر پنجاب نے سابق صدر مملکت آصف علی زرداری ،بلاول بھٹو زرداری ،عطاء اللہ تارڈ ،خواجہ محمد آصف ،راجہ پرویز اشرف ،احسن اقبال ،قمر الزماں کائرہ ،خورشید شاہ ،مریم اورنگزیب ،شریں رحمان ،بلال چودھری ،مولانا فضل الرحمان اور سید یوسف رضا گیلانی کو بھی آئین پاکستان کی کتاب بھجوائی۔

کراچی : (ویب ڈیسک) کراچی میں عید کے روزٹریفک حادثات میں 12افرادجاں بحق ہو گئے۔
ریسکیو ذرائع کا کہنا ہے کہ کراچی میں عید کے روز تیز رفتاری اور بے احتیاطی کے باعث ٹریفک حادثات میں 12 افراد جان سے ہاتھ دھوبیٹھے۔ مختلف حادثات میں 200سےزائدافراد زخمی ہوئے۔
جاں بحق اورزخمی ہونےوالوں میں اکثرموٹرسائیکل سوارہیں۔ حادثات حب چوکی،رزاق آباد،پاورہاوس نیوکراچی کےقریب پیش آئے۔ یونیورسٹی روڈ،عیسیٰ نگری،اسٹیل ٹاون ،بلدیہ ٹاون کےمقام پرحادثات ہوئے۔

اسلام آباد: (ویب ڈیسک) پی ٹی آئی رہنما شہباز گل امریکہ سے واپس اسلام آباد پہنچ گئے۔
ایئرپورٹ پر قانون نافذ کرنے والے اداروں کو الرٹ رکھا گیا۔ شہباز گل کو امیگریشن کے بعد ایف آئی نے نہیں روکا۔
شہباز گل کو اسلام آباد ہائیکورٹ کے احکامات پر گرفتار نہیں کیا گیا۔ ان کی آمد پر اٹک پولیس بھی اسلام آباد ایئرپورٹ پر موجود تھی۔
واضح رہے کہ شہباز گل نے توہین مذہب کے مقدمات پر اسلام آباد ہائیکورٹ سے حفاظتی ضمانت لے رکھی ہے۔
اس سے قبل اسی کیس میں ایم این اے شیخ راشد شفیق کو بھی وطن واپسی پر ائیر پورٹ سے گرفتار کر لیا گیا تھا۔

فیصل آباد: (ویب ڈیسک) فیصل آباد میں عرصہ دراز سے ٹوٹ پھوٹ کا شکار بنی بیشتر مین شاہراہیں ٹریفک کی روانی میں مسائل پیدا کرنے لگی ہیں،خستہ حال سڑکوں کے سبب حادثات کا بھی باعث بن رہی ہیں۔
فیصل آباد کی سڑکوں پر کہیں گردوغبار کے بادل، ملبے کے ڈھیر، تو کہیں گہرے گڑھے آمدورفت کو جان جوکھم کا سبب بنا رہے ہیں۔ سرگودھا روڈ، سمندری روڈ، جڑانوالہ روڈ، جھمرہ روڈ اور ستیانہ روڈ سمیت شہر کی بیشتر مین شاہراہیں عرصہ دراز سے بدحالی کا شکار ہیں جس سے شہریوں کیلئے سفر کرنا عذاب بن کررہ گیا ہے۔
کچھ عرصہ قبل سڑکوں کی تعمیر کا کام شروع تو کیا گیا لیکن اسے پایئہ تکمیل تک پہنچانا شاید ایجنڈے میں شامل ہی نہیں جس پر شہری بھی حکام سے نالاں ہیں۔
معاملے پر ایڈیشنل ڈپٹی کمشنر کہتے ہیں کہ سڑکوں کی تعمیر کا کام جاری ہے، جلد کام مکمل کرتےہوئے مسائل پر قابو پالیا جائے گا۔ تعمیراتی کام میں تاخیر کی وجہ سے زیر تعمیر سڑکوں کے کناروں پر واقع دکانوں کے مالکان کی کاروباری سرگرمیاں بھی بُری طرح سے متاثر ہورہی ہیں۔

لاہور: (ویب ڈیسک) ہربنس پورہ انڈر پاس کے قریب کار کی ٹکر سے موٹر سائیکل پر سوار تین بہن بھائیوں میں سے 32 سالہ بہن عاطقہ موقع پر جاں بحق، دو بھائی قادر اور اویس زخمی ہو گئے جنہیں طبی امداد کے لیے سروسز ہسپتال منتقل کر دیا گیا۔
پولیس کے مطابق ایک بھائی قادر کو سروسز ہسپتال سے طبی امداد کے بعد ڈسچارج کر دیا گیا جبکہ دوسرے بھائی اویس اکبر کو ہڈی وارڈ میں منتقل کر دیا گیا ہے۔ ایس پی کینٹ کا کہنا ہے نا معلوم افراد کے خلاف مقدمہ درج کرکے سی سی ٹی وی کیمروں کی مدد سے ملزمان تک پہنچا جائے گا۔
پولیس نے مقدمہ درج کر کے جاں بحق ہونے والی خاتون کی لاش کو پوسٹ مارٹم کے لیے مردہ خانہ منتقل کر دیا۔ ورثا کے مطابق خاتون کا خاوند بیرون ملک دبئی میں روزگار کے سلسلے میں رہائش پذیر ہے، خاتون کے تین بچے لاہور کے علاقہ ہربنس پورہ میں والدین کے گھر کے قریب رہتے ہیں۔

لاہور: (ویب ڈیسک) ملک کے مختلف شہروں میں رات گئے تیز ہواؤں کے ساتھ بارش سے موسم خوشگوار ہو گیا، موسم کا حال بتانے والوں نے آج بھی پنجاب، خیبرپختونخوا اور شمالی بلوچستان میں مزید بارش کی پیشگوئی کر دی۔
پنجاب میں منچن آباد، وہاڑی، پنڈ دادن خان اوردیگر کئی علاقوں میں بارش برسی۔ لنڈی کوتل، ڈیرہ اسماعیل خان ، ٹانک میں بھی بارش سے موسم خوشگوار ہو گیا، موسم کا حال بتانے والوں نے آج لاہور، گوجرانوالہ، سیالکوٹ اور جنوبی پنجاب کے مختلف علاقوں میں بھی بارش کی پیشگوئی کی ہے۔
شمالی بلوچستان میں بھی ابر رحمت برسنے کی توقع ہے، کشمیر اور گلگت بلتستان میں بھی گرج چمک کے ساتھ بارش کا امکان ہے۔