لاہور: (ویب ڈیسک) نماز عید کے بعد سویاں بھی کھا لیں اور عیدی بھی وصول کر لی، اہداف پورے کرتے ہی بچہ پارٹی نے تفریح گاہوں کا رخ کر لیا۔
تفریح گاہوں میں تل دھرنے کو جگہ نہیں، کوئی جھولے لے کر خوش تو کوئی اونٹ کی سواری میں مگن ہے۔ گھروں میں خواتین مہمانوں کی خاطر مدارات کی تیاریوں میں لگ گئیں، کسی نے اماں تو کسی نے ساس کی ریسیپی سے فائدہ اٹھایا۔ بریانی، چکن کڑاہی، مٹن چانپ ، شامی کباب سے عزیز رشتہ داروں کیلئے لذیذ پکوانوں کی تیاری جاری ہے۔

کراچی: (ویب ڈیسک) وزیر اعلی سندھ سید مراد علی شاہ نے کہا ہے کہ ملک کو اس وقت شدید مالی اور اخلاقی بحران کا سامنا ہے، ہمیں ایک قوم بن کر ان بحرانوں سے سرخرو ہو کر نکلنا ہے۔
گڑھی خدا بخش بھٹو میں صحافیوں سے بات چیت کرتے ہوئے وزیراعلی سندھ مراد علی شاہ کا کہنا تھا کہ پیپلز پارٹی حکومت سندھ اور اپنی طرف سے پوری دنیا کے مسلمانوں کو عید الفطر کی مبارک باد پیش کرتا ہوں، اللہ تعالی عالم اسلام کی جانب سے رمضان المبارک میں کی جانے والی عبادات کو قبول فرمائے ، رمضان المبارک کی بدولت اللہ تعالی دنیا اور بالخصوص پاکستان میں امن امان قائم کرے۔
انہوں نے کہا کہ پاکستان میں امن امان پیدا ہوگا تو ہر آدمی خوش اسلوبی سے اپنے ملک کی خدمت کرسکے گا، اللہ تعالی سے دعا ہے کہ وہ ہمارے دلوں میں ایمان ڈالے اور ہمیں توفیق بخشے تاکہ ان بحرانوں کا مقابلہ کر سکیں۔ عمران خان اسلام آباد جانے کی کوئی تیاری نہیں کررہا، جورات کو مختصر احتجاج ہوا بس ویسے ہی ہوگا۔

اسلام آباد: (ویب ڈیسک) وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ دوسروں کی خوشیوں میں شریک ہوں اور عید کے پرمسرت موقع پر اختلافات اور نفرتیں بھلا کر ایک قوم کی طرح خوشیاں منائیں۔
وفاقی وزیر برائے ماحولیاتی تبدیلی سینیٹر شیری رحمان نے عید الفطر کے موقع پر پیغام میں تمام اہل وطن کو دل کی گہرائیوں سے عید الفطر کی مبارک باد پیش کی۔ انہوں نے کہا کہ انتشار، نفرت اور تقسیم سے دور رہیں، اپنے پیارے وطن اور سر سبز زمین کا ماں سمجھ کر خیال کریں۔
انہوں نے کہا کہ عید کے موقع پر سیر و تفریح کے مقامات پر پلاسٹک کی بوتلوں اور تھیلیوں کے استعمال سے گریز کریں، گلیوں اور شاہراہوں پر کوڑا اور کچرا پھیکنے سے گریز کریں کیوں کے کچرے سے ہی آلودگی پھیلتی ہے، پانی کا احتیاط سے استعمال کریں، پھول اور درخت لگائیں، عید کی خوشیاں منانے باہر نکلیں تو ہیٹ ویو سے بچنے کے احتیاتی تدابیر پر عمل کریں۔

لاہور: (ویب ڈیسک) پاکستان تحریک انصاف کے رہنما اور سابق وزیراعظم عمران خان کے معاون خصوصی شہباز گل نے اپنے پاکستان آنے کی وجہ بتا دی۔
پی ٹی آئی رہنما شہباز گل نے ایک ویڈیو پیغام جاری کیا جس میں انہوں نے بتایا کہ یہ جانتے بوجھتے کہ یہ لوگ ایک بعد دوسرا کیس بنائیں گے، میں آج واپس پاکستان آ رہا ہوں۔
شہباز گل کا کہنا تھا کہ ایک میں ضمانت لیں گے تو دوسرا تیار ہو گا، لیکن پاکستان آنے کی وجہ صرف ایک ہے اور وہ یہ کہ میری ماں باجوہ اور باپ گِل ہے۔
ان کا کہنا تھا کہ پاکستان کے ہر گھرانے کی طرح ہمارے گھر میں بھی پہلی چیز وفاداری سکھائی جاتی ہے، میں خان کے ساتھ مشکل وقت میں پوری وفاداری نبھاؤں گا۔
شہباز گل کا کہنا تھا کہ اس امپورٹڈ حکومت کے خلاف خان کے ساتھ وفاداری کا مطلب پاکستان کے ساتھ وفاداری ہے۔

پشاور: (ویب ڈیسک) عید کے پرمسرت موقع پر جہاں آج ہر طرف خوشیاں ہیں اور لوگ عید الفطر اپنے پیاروں کیساتھ منا رہے ہیں تو دوسری طرف پاک افغان بارڈر پر ایف سی نارتھ کے جوان ملکی سرحدوں کی حفاظت پر مامور ہیں۔
عید خوشیوں کا نام ہے، مذہبی تہوار کو اپنے پیاروں کے ساتھ جوش و جذبے اور محبت سے منانے کا لیکن اس سب کے لیے امن لازمی ہے۔ خوشیوں میں مگن قوم کی حفاظت اور امن و امان برقرار رکھنے کےلیے پاک افواج کے جوان ہمیشہ کی طرح آج بھی صف اول میں کھڑے ہیں۔
عید الفطر کے موقع پر پاک افغان بارڈر پر قائم بگ بین چیک پوسٹ پر ایف سی نارتھ کے جوان جہاں ملکی سرحدوں کی حفاظت کے فرائض سرانجام دے رہے ہیں تو وہیں اپنوں سے دورعید بھی منا رہے ہیں، سرحد پر نماز عید سمیت خصوصی دستر خوان کا اہتمام بھی کیا گیا۔
ملک و قوم کی سلامتی کےلیے کسی بھی قربانی سے دریغ نہ کرنے کے جذبے سے سرشار جوانوں کا کہنا ہے کہ وطن کی مٹی پر آنچ نہیں آنے دینگے۔
نماز عید کے بعد ملکی سلامتی کے علاوہ سیکورٹی فورسز کے شہداء کے درجات کی بلندی کے لیے خصوصی دعائیں کی گئیں۔