تل ابیب: (ویب ڈیسک) روسی وزیر خارجہ سرگئی لاوروف کے تازہ بیان پر اسرائیل نے شدید برہمی کا اظہار کرتے ہوئے ان پر یہود دشمنی کے جذبات پھیلانے اور ہولو کاسٹ کی اہمیت کم کرنے کے الزامات عائد کیے ہیں۔
برطانوی خبر رساں ایجنسی روئٹرز اور مؤقر امریکی اخبار واشنگٹن پوسٹ کے حوالے سے بتایا ہے کہ ایک اطالوی ٹی ریٹے 4 نے دوران انٹرویو جب روسی وزیر خارجہ سرگئی لاوروف سے استفسار کیا گیا کہ روس کس طرح کہہ سکتا ہے کہ اسے یوکرین کو نازی اثر و رسوخ سے پاک کرنے کی ضرورت ہے جب کہ ملک کے صدر ولادیمیر زیلینسکی تو یہودی ہیں؟ تو انہوں نے کہا کہ جب وہ کہتے ہیں کہ ہم تو خود یہودی ہیں تو کس طرح سے یہ نازی ازم ہے؟ میں سمجھتا ہوں کہ ایڈولف ہٹلر بھی یہودیوں سے تعلق رکھتا تھا اسی لیے ان کی بات کا کوئی مطلب نہیں ہے۔
سرگئی لاوروف نے مترجم کے ذریعے بات کرتے ہوئے کہا کہ اب تو کافی عرصے سے ہم عقلمند یہودی لوگوں کو یہ کہتے ہوئے بھی سن رہے ہیں کہ یہود مخالف سب سے بڑے خود یہودی ہیں۔
عالمی خبر رساں ایجنسی کے مطابق روسی وزیر خارجہ کے اس انٹرویو پر اسرائیل نے سخت برہمی کا اظہار کرتے ہوئے کہا کہ اس طرح کے جھوٹ کا مقصد یہودیوں کے اپنے خلاف ہونے والے تاریخ کے سب سے بڑے اور ہولناک جرائم کا الزام خود یہودیوں پر ہی لگانا ہے۔ اس ردعمل کا اظہار خود اسرائیلی وزیراعظم نفتالی بینیٹ نے کیا ہے۔
اسرائیل کے وزیر اعظم نے کہا کہ سیاسی مقاصد کے لیے یہودیوں کے ہولوکاسٹ کا استعمال فوری طور پر بند ہونا چاہیے۔
اسرائیل نے اسی پر اکتفا نہیں کیا بلکہ وزیر خارجہ سرگئی لاوروف سے مطالبہ کیا ہے کہ وہ اپنے انٹرویو پر معافی مانگیں۔ اسرائیلی وزارت خارجہ نے اس کے لیے روسی سفیر کو بھی طلب کیا۔
اسرائیلی وزارت خارجہ کے مطابق ایڈولف ہٹلر کو یہودی قرار دینا ایسا ہی ہے جیسے یہ کہا جائے کہ یہودیوں نے خود کو ہلاک کیا۔ وزارت خارجہ کے مطابق یہودیوں پر یہود مخالف ہونے کا الزام لگانا نسل پرستی کی سب سے گری ہوئی سطح ہے۔ روسی وزارت خارجہ نے تاحال اپنے ردعمل کا اظہار نہیں کیا ہے۔
خبر رساں ادارے کے مطابق ہولوکاسٹ میں مارے جانے والے 60 لاکھ یہودیوں کی یادگار ید واشیم کے چیئرمین دانی دیان کا کہنا ہے کہ روسی وزیر خارجہ کے ریمارکس حقیقی نازی ازم کے متاثرین کی توہین اور ان کے لیے بڑا دھچکہ ہیں۔
امریکی اخبار کے مطابق اسرائیلی وزارت خارجہ نے روسی وزیر خارجہ سرگئی لاوروف کے اس دعوے کو مسترد کر دیا ہے کہ نازی حامی عناصر یوکرین کی حکومت اور فوج پر تسلط رکھتے ہیں۔
اسرائیلی وزیر خارجہ جن کے دادا بھی ہولو کاسٹ میں مارے گئے تھے ان کا کہنا تھا کہ یوکرینی نازی نہیں ہیں، صرف نازی ہی نازی تھے اور صرف انہوں نے یہودی لوگوں کی منظم نسل کشی کی۔
جرمن حکومت کے ترجمان نے اس معاملے پر رد عمل دیتے ہوئے کہا ہے کہ ایڈولف ہٹلر کے بارے میں سرگئی لاوروف کا تبصرہ مضحکہ خیز پروپیگنڈہ تھا۔

نئی دہلی: (ویب ڈیسک) بھارتی ریاست اتراکھنڈ میں ہندوؤں کی مقدس کتابوں بھگوت گیتا، رامائن اور ویدوں کو اسکولوں کے نصاب میں شامل کرنے کا فیصلہ کیا گیا ہے۔
بھارتی میڈیا کے مطابق بی جے پی کی حکومت چار ریاستوں میں پہلے ہی بھگوت گیتا کو اسکولوں میں بطور نصاب پڑھانے کی منظوری دے چکی ہیں۔
اترکھنڈ کے وزیر تعلیم دھان سنگھ راوت نے کہا ہے کہ وفاق کی جانب سے جاری کردہ نئی تعلیمی پالیسی پر عمل کرتے ہوئے ریاست بھر کے اسکولوں میں بھگوت گیتا پڑھانے کا فیصلہ کیا ہے۔
وزیر تعلیم نے مزید کہا کہ بھگوت گیتا کے علاوہ اسکولوں کے نصاب میں رامائن اور ویدوں کو بھی شامل کیا جائے گا جب کہ بچوں کو اترکھنڈ کی تاریخ پڑھانے کا بھی فیصلہ کیا ہے۔
وزیر تعلیم دھان سنگھ نے مزید کہا کہ اس حوالے سے تعلیمی ماہرین اور عوام سے تجاویز بھی طلب کی ہیں۔
اترکھنڈ کی مسلمان تنظیموں نے اس فیصلے کو متعصبانہ اور مذہبی آزادی کے خلاف قرار دیتے ہوئے حکومت سے فی الفور اپنا فیصلہ واپس لینے کا مطالبہ کیا ہے۔
واضح رہے کہ مارچ میں بھارتی ریاست گجرات میں بھارتیہ جنتا پارٹی حکومت نے چھٹی سے بارہویں جماعت کے نصاب میں ہندوؤں کی مقدس کتاب ’بھگوت گیتا‘ کو پڑھنا لازمی قرار دے دیا تھا۔

بغداد: (ویب ڈیسک) عراق کے شمالی شہر اربیل میں ایک آئل ریفائنری پر 6 میزائل داغے گئے جس کے نتیجے میں مرکزی آئل ٹینک میں آگ لگ گئی۔
عالمی خبر رساں ادارے کے مطابق عراق کے شمالی شہر اریبل میں ایک آئل ریفائنری میں میں 6 میزائل گرے جس سے مرکزی آئل ٹینک میں آگ بھڑک اُٹھی اور ملک کے دیگر حصوں کو تیل کی سپلائی معطل ہوگئی۔
فائر بریگیڈ کے عملے نے 3 گھنٹے کی مشقت کے بعد آگ پر قابو پالیا۔ تاحال کسی شدت پسند گروپ نے حملے کی ذمہ داری قبول نہیں کی ہے۔ عراقی سکیورٹی فورسز کو نینوا صوبے میں وہ مقام مل گیا ہے، جہاں سے یہ راکٹ داغے گئے۔ اس مقام کے نزدیک ہی کرد علیحدگی پسندوں کا گڑھ بھی ہے۔
عراقی وزیراعظم مصطفیٰ الکاظمی نے آئل ریفائنری پر میزائل حملوں کو بزدلانہ قرار دیتے ہوئے کہا ہے کہ ان میں ملوث افراد کو انصاف کے کٹہرے میں لاکر سخت سے سخت سزا دی جائے گا۔